ສູນກາງແນວລາວສ້າງຊາດ

Lao Front For National Development

ທ່ານປະທານ ສນຊ ນໍາພາຜູ້ແທນກໍາມະການ ສນຊ ຢ້ຽມຊົມຫໍພິພິທະພັນກອງທັບ ແລະ ງານວາງສະແດງສິນຄ້າກອງທັບ

     ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ(ສນຊ) ໄດ້ເປັນກຽດນໍາພາຄະນະຜູ້ແທນກໍາມະການ ສນຊ, ຜູ້ຊົງຄຸນວຸດທິ ໄປຢ້ຽມຊົມຫໍພິພິທະພັນ ແລະ ງານວາງສະແດງສິນຄ້າ ຂອງກອງທັບ ເນື່ອງໃນໂອກາດທີ່ຄະນະກໍາມະການ ສນຊ ທົ່ວປະເທດ ດໍາເນີນກອງປະຊຸມສາມັນຄົບຄະນະກໍາມະການ ສນຊ ຄັ້ງທີ 3 ສະໄໝທີ XI ພ້ອມທັງຮັບຟັງການປາຖະກະຖາ ການກໍາເນີດ, ເຕີບໃຫຍ່, ມູນເຊື້ອ ແລະ ຜົນງານ ຂອງກອງທັບປະຊາຊົນລາວ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ຊຶ່ງໄດ້ຈັດຂຶ້ນລະຫວ່າງວັນທີ 10-12 ມັງກອນ 2024 ທີ່ນະຄອນຫລວງວຽງຈັນ.
     ໃນການຢ້ຽມຊົມຫໍມູນເຊື້ອ ໄດ້ຮັບການຕ້ອນຮັບຈາກຄະນະຮັບຜິດຊອບຫໍພິພິທະພັນກອງທັບ, ຈາກນັ້ນ ທ່ານປະທານ ສນຊ ໄດ້ໃຫ້ກຽດວາງກະຕ່າດອກໄມ້ຕໍ່ໜ້າຮູບປັ້ນທ່ານປະທານ ໄກສອນ ພົມວິຫານ ຊຶ່ງທ່ານເປັນຜູ້ນໍາພາປະກາດສ້າງຕັ້ງກອງຮ້ອຍລາດຊະວົງ ເປັນຕົ້ນກໍາເນີດຂອງກອງທັບປະຊາຊົນລາວໃນປັດຈຸບັນ; ໂອກາດດຽວກັນນັ້ນ ຄະນະຜູ້ແທນກໍາມະການ ສູນກາງແນວລາວສ້າງຊາດ ໄດ້ພ້ອມກັນຮັບຟັງການບັນຍາຍບັນດາເນື້ອໃນການວາງສະແດງພາຍໃນຫໍພິພິທະພັນ ໂດຍປະກອບມີ 4 ພາກໃຫຍ່ຄື: ພາກເປີດສາກ ເມືອງລາວ ຄົນລາວ, ພາກການຕໍ່ສູ້ຕ້ານຈັກກະພັດລ່າເມືອງຂຶ້ນແບບເກົ່າ, ພາກການຕໍ່ສູ້ຕ້ານຈັກກະພັດລ່າເມືອງຂຶ້ນແບບໃໝ່ ແລະ ພາກການປົກປັກຮັກສາ ແລະ ສ້າງສາພັດທະນາປະເທດຊາດ ໃນລະບອບໃໝ່.
     ພ້ອມກັນນັ້ນ, ກໍ່ໄດ້ນໍາພາຄະນະຜູ້ແທນ ໄປຢ້ຽມຊົມງານວາງສະແດງສິນຄ້າຂອງກອງທັບ ໂດຍໄດ້ຮັບການຕ້ອນຮັບຈາກຄະນະຮັບຜິດຊອບຈັດງານຂອງກອງທັບ; ງານວາງສະແດງສິນຄ້າດັ່ງກ່າວປະກອບມີ 50 ກ່ວາຫົວໜ່ວຍ, ຫ້າງຮ້ານ ມາວາງສະແດງ ແລະ ຈະດໍາເນີນໄປຮອດວັນທີ 18 ມັງກອນ 2024.
 
info@lfnd.org.la | 021 213754 | (856-21) 453191