ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ແຂວງຄຳມ່ວນ ເຊິ່ງໄດ້ຮັບການຕ້ອນຮັບ ຈາກທ່ານ ບຸນມີ ພີມມະສອນ ຮອງເລຂາພັກແຂວງ, ປະທານສະພາປະຊາຊົນແຂວງຄຳມ່ວນ ໃນວັນທີ 11 ກັນຍາ 2023 ທີ່ແຂວງຄໍາມ່ວນ.

ໂອກາດທີ່ ທ່ານປະທານສູນກາງແນວລາວສ້າງຊາດ ເຄື່ອນໄຫວເຮັດວຽກຢູ່ແຂວງຄຳມ່ວນຄັ້ງນີ້, ໄດ້ພົບປະໂອ້ລົມພະນັກງານຫຼັກແຫຼ່ງຂອງແຂວງ, ຄະນະກຳມະການແນວລາວສ້າງຊາດແຂວງ, ແນວລາວສ້າງຊາດເມືອງທ່າແຂກ; ເຊິ່ງໃນນີ້, ທ່ານ ພິດສະໄໝ ກອງຊາເດດ ຄະນະປະຈຳພັກແຂວງ, ປະທານແນວລາວສ້າງຊາດແຂວງຄຳມ່ວນ ໄດ້ລາຍງານສະພາບການຈັດຕັ້ງປະຕິບັດວຽກງານແນວລາວສ້າງຊາດໄລຍະຜ່ານມາໃຫ້ທ່ານປະທານສູນກາງແນວລາວສ້າງຊາດ ຮັບຊາບ ເຊິ່ງຕະຫຼອດໄລຍະຜ່ານມາຄະນະກຳມະການແນວລາວສ້າງຊາດແຕ່ລະຂັ້ນຂອງແຂວງໄດ້ເອົາໃຈໃສ່ເຕົ້າໂຮມຄວາມສາມັກຄີປະຊາຊົນລາວບັນດາເຜົ່າ, ສາສະໜາ, ຊັ້ນຄົນ, ເພດ-ໄວ ຢ່າງເປັນປົກກະຕິ, ໄດ້ຜັນຂະຫຍາຍມະຕິ XI ຂອງພັກ, ມະຕິ XI ຂອງແນວລາວລາວສ້າງຊາດ ເວົ້າລວມ ເວົ້າສະເພາະແມ່ນເປັນເຈົ້າການໃນການປຸກລະດົມຂົນຂວາຍປະຊາຊົນລາວບັນດາເຜົ່າເຂົ້າຮ່ວມໃນການຈັດຕັ້ງປະຕິບັດສອງວາລະແຫ່ງຊາດ ເຊິ່ງໄດ້ຫັນເອົາບັນດາແຜນງານເປັນແຜນລະອຽດເຂົ້າໃນວຽກງານຕົວຈິງສາມາດຈັດຕັ້ງປະຕິບັດຂະບວນການສ້າງຄອບຄົວ ແລະ ສາມັກຄີປອງດອງ ທີຮັບຮອງ 74,748 ຄອບຄົວ, 519 ບ້ານ ແລະ 10 ເມືອງ; ພ້ອມກັນນີ້, ຄະນະກຳມະການແນວລາວສ້າງຊາດແຂວງໄດ້ປຸກລະດົມເຄື່ອງຊ່ວຍປະຊາຊົນທີ່ຖຶກຜົນກະທົບໄພພິບັດນໍ້າຖ້ວມຢູ່ 3 ເມືອງຄື: ເມືອງຄູນຄໍາ, ເມືອງນາກາຍ ແລະ ເມືອງຫີນບູນ ເຊິ່ງເຄື່ອງທີ່ໄດ້ຮັບລວມມູນຄ່າ 4,9. ຕື້ກວ່າກີບ ແລະ ເງິນສົດ 8 ຕື້ກວ່າກີບ.

ໃນນີ້, ທ່ານປະທານສູນກາງແນວລາວສ້າງຊາດ ມີຄຳເຫັນໂອ້ລົມຕໍ່ກອງປະຊຸມ ເຊິ່ງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ບັນດາຜົນງານທີ່ຄະນະນຳຂອງແຂວງ ກໍຄືຄະນະກຳມະການແນວລາວສ້າງຊາດແຕ່ລະຂັ້ນຍາດມາໄດ້ໄລຍະຜ່ານມາ ແລະ ໄດ້ຍົກໃຫ້ເຫັນ 4 ບັນຫາສຳຄັນຄື: ສະພາບຂອງສາກົນ-ພາກພື້ນ, ຄຳຄິດຄຳສະເໜີ ຂອງຄະນະກຳມະການແນວລາວສ້າງຊາດແຂວງ, ແນະນຳວຽກງານແນວລາງສ້າງຊາດ ແລະ ວຽກງານຈຸດສຸມ 3 ເດືອນທ້າຍປີ2023. ພ້ອມກັນນີ້ ທ່ານໄດ້ເນັ້ນໃຫ້ຄະນະກຳມະການແນວລາວສ້າງຊາດແຂວງສືບຕໍ່ຜັນຂະຫຍາຍ, ຈັດຕັ້ງປະຕິບັດບັນດາວຽກງານຈຸດສຸມດັ່ງນີ້: 4 ຄາດໝາຍ, 4 ການຫັນປ່ຽນ ແລະ 6 ແຜນວຽກຕົ້ນຕໍຄື: (1) ເຕົ້າໂຮມຄວາມສາມັກຄີປອງດອງທົ່ວປວງຊົນລາວທັງຊາດ; (2)ເພີ່ມທະວີການປຸກລະດົມຂົນຂວາຍປະຊາຊົນທຸກຊັ້ນຄົນເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາ; (3) ເສີມຂະຫຍາຍປະຊາທິປະໄຕ, ສິດເປັນເຈົ້າ ແລະ ປົກປ້ອງຜົນປະໂຫຍດຂອງປະຊາຊົນ; (4) ປັບປຸງຮູບແບບການຮ່ວມສຳພັນກັບອົງການພາຄີ ແລະ ຮ່ວມມືກັບພາກສ່ວນອື່ນ; (5) ເພີ່ມທະວີຄວາມສາມັກຄີສາກົນ ແລະ ເປີດກວ້າງການພົວພັນການທູດປະຊາຊົນ; (6) ສ້າງຄວາມເຂັ້ມແຂງໃຫ້ວຽກງານແນວລາວສ້າງຊາດມີບາດກ້າວໃໝ່ ແລະ ກ່າວອີກວ່າ: ໃຫ້ຄະນະກຳມະການແນວລາວສ້າງຊາດແຂວງປຸກລະດົມຂົນຂວາຍໃຫ້ຜູ້ໄດ້ຮັບຜົນກະທົບໄພພິບັດໄດ້ຮັບການຊ່ວຍເຫຼືອ ແລະ ຟື້ນຟູຊີວິດການເປັນຢູ່ຂອງປະຊາຊົນໃນເຂດດັ່ງກ່າວກັບຄືນໂດຍໄວ, ປຸກລະດົມຂະບວນການແຂ່ງຂັນຮັກຊາດ ແລະ ພັດທະນາ ເປັນຕົ້ນແມ່ນສົ່ງເສີມການຊື້ສິນຄ້າລາວ ແລະ ເສີມຂະຫຍາຍຂະບວນການຮັກບ້ານເກີດໃຫ້ເປັນຮູບປະທຳ.

ຂ່າວ+ພາບ ເລົ່າລໍ່

ບກ: ສືເຊັ່ງ ຈື້ໄຊ