ໃນວັນທີ 11 ມີນາ 2024 ນີ້, ທ່ານ ຄໍາໄຫຼ ສີປະເສີດ ກໍາມະການສູນກາງພັກ, ຮອງປະທານຜູ້ປະຈໍາການສູນກາງແນວລາວສ້າງຊາດ (ສນຊ) ພ້ອມດ້ວຍຄະນະໄດ້ເຂົ້າພົບປະຢ້ຽມຢາມທ່ານ ບົວຄົງ ນາມມະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆບໍ່ແກ້ວ ເຂົ້າຮ່ວມມີທ່ານ ດາລີວັນ ພູສະຫວັນ ຄະນະປະຈໍາພັກແຂວງ, ປະທານແນວລາວສ້າງຊາດ ແຂວງ ບໍ່ແກ້ວ ເຂົ້າຮ່ວມ ທີ່ຫ້ອງວ່າການປົກຄອງແຂວງບໍ່ແກ້ວ.

     ທ່ານຮອງປະທານ ສນຊ ໄດ້ສະແດງຄວາມຂອບໃຈຢ່າງສູງຕໍ່ທ່ານເຈົ້າແຂວງທີ່ໄດ້ເສຍສະຫຼະເວລາອັນມີຄ່າໃນການຕ້ອນຮັບຄັ້ງນີ້, ພ້ອມທັງແຈ້ງຈຸດປະສົງໃນການມາພົບປະຢ້ຽມຢາມ ແລະ ຊຸກຍູ້ວຽກງານແນວໂຮມ ຢູ່ແຂວງບໍ່ແກ້ວ. ເພື່ອເປັນການຍົກສູງບົດບາດ ແລະ ເພິ່ມທະວີຄວາມສາມາດໃນການນໍາພາ ຂອງແນວລາວສ້າງຊາດແຕ່ລະຂັ້ນໃຫ້ມີຄວາມເຂັ້ມແຂງ, ແນໃສ່ໃຫ້ຄະນະປະຈໍາພັກ ແຂວງ, ຄົ້ນຄວ້າປະກອບບຸກຄະລາກອນຜູ້ທີ່ຈະມາເປັນການນໍາ ຂອງແນວລາວສ້າງຊາດແຕ່ລະຂັ້ນ ຖືກຕ້ອງຕາມມາດຖານ ແລະ ເງື່ອນໄຂ ພ້ອມທັງຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ ຂອງອົງການແນວລາວສ້າງຊາດ ນັບແຕ່ນີ້ ຫາ ປີ 2029 ໃຫ້ບັນລຸຕາມຈຸດປະສົງຄາດໝາຍທີ່ວາງໄວ້.

     ທ່ານເຈົ້າແຂວງໄດ້ສະແດງຄວາມຂອບໃຈ ແລະ ຕີລາຄາສູງຕໍ່ກັບການມາຢ້ຽມຢາມ ແລະ ເຮັດວຽກຢູ່ແຂວງບໍ່ແກ້ວ ຂອງທ່ານຮອງປະທານຜູ້ປະຈໍາການ ສູນກາງແນວລາວສ້າງຊາດ ໃນຄັ້ງນີ້, ເຊິ່ງທ່ານເຈົ້າແຂວງໄດ້ລາຍງານສະພາບລວມ ແລະ ຈຸດພິເສດການພັດທະນາຂອງແຂວງໂດຍຫຍໍ້ ຊິ່ງແຂວງບໍ່ແກ້ວພວກເຮົາ ໄດ້ຖືສໍາຄັນວຽກງານແນວໂຮມ ເພື່ອສຶກສາການເມືອງ-ແນວຄິດ, ໃຫ້ແກ່ປະຊາຊົນລາວບັນດາເຜົ່າໃນທົ່ວແຂວງ, ປຸກລະດົມຊຸກຍູ້ຂົນຂວາຍປະຊາຊົນລາວບັນດາເຜົ່າເສີມຂະຫຍາຍມູນເຊື້ອຄວາມສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນ ເຮັດໃຫ້ແຂວງບໍ່ແກ້ວມີຄວາມສະຫງົບໂດຍພຶ້ນຖານ.

ບກ: ສຊ ຈຶ້ໄຊ

ຂ່າວ-ພາບ: ສຸວັນລີ