ເນື່ອງໃນໂອກາດທີ່ ທ່ານ ຄໍາໄຫຼ ສີປະເສີດ ກໍາມະການສູນກາງພັກ, ຮອງປະທານຜູ້ປະຈໍາການສູນກາງແນວລາວສ້າງຊາດ (ສນຊ) ພ້ອມດ້ວຍຄະນະ ລົງເຄື່ອນໄຫວຊຸກຍູ້ວຽກງານແນວໂຮມຢູ່ແຂວງຫຼວງນໍ້າທາ ທ່ານໄດ້ເຂົ້າພົບປະຢ້ຽມຢາມ ທ່ານ ວຽງສະຫວັດ ສີພັນດອນ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆຫຼວງນໍ້າທາ, ໃນວັນທີ 12 ມີນາ 2024 ທີ່ຫ້ອງວ່າການປົກຄອງແຂວງຫຼວງນໍ້າທາ.
ທ່ານຮອງປະທານ ສນຊ ໄດ້ສະແດງຄວາມຂອບໃຈຢ່າງສູງຕໍ່ທ່ານເຈົ້າແຂວງທີ່ໄດ້ເສຍສະຫຼະເວລາອັນມີຄ່າໃນການຕ້ອນຮັບຄັ້ງນີ້, ພ້ອມທັງແຈ້ງຈຸດປະສົງໃນການມາເຄື່ອນໄຫວເຮັດວຽກ ເພື່ອຊຸກຍູ້ວຽກງານແນວໂຮມ ຢູ່ແຂວງຫຼວງນໍ້າທາ ເປັນຕົ້ນແມ່ນການຍູ້ແຮງວຽກງານຮອບດ້ານເພື່ອກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ, ກອງປະຊຸມ 3 ຂັ້ນຂອງອົງການແນວລາວສ້າງຊາດ ໃຫ້ບັນລຸຕາມຈຸດປະສົງຄາດໝາຍທີ່ວາງໄວ້.
ທ່ານເຈົ້າແຂວງໄດ້ສະແດງຄວາມຂອບໃຈ ແລະ ຕີລາຄາສູງຕໍ່ກັບການມາຢ້ຽມຢາມ ແລະ ເຮັດວຽກຢູ່ແຂວງຫຼວງນໍ້າທາ ຂອງທ່ານຮອງປະທານຜູ້ປະຈໍາການ ສູນກາງແນວລາວສ້າງຊາດ ໃນຄັ້ງນີ້, ເຊິ່ງທ່ານເຈົ້າແຂວງໄດ້ລາຍງານສະພາບລວມ ແລະ ຈຸດພິເສດການພັດທະນາຂອງແຂວງໂດຍຫຍໍ້ ຊິ່ງແຂວງຫຼວງນໍ້າທາ ພວກເຮົາ ໄດ້ຖືສໍາຄັນວຽກງານແນວໂຮມ ເພື່ອສຶກສາອົບຮົມການເມືອງ-ແນວຄິດ, ໃຫ້ແກ່ປະຊາຊົນລາວບັນດາເຜົ່າໃນທົ່ວແຂວງ, ປຸກລະດົມຊຸກຍູ້ຂົນຂວາຍປະຊາຊົນລາວບັນດາເຜົ່າເສີມຂະຫຍາຍມູນເຊື້ອຄວາມສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນ ເຮັດໃຫ້ແຂວງຫຼວງນໍ້າທານັບມື້ມີບາດກ້າວໃໝ່ເລື້ອຍໆ.
ບກ: ສຊ ຈຶ້ໄຊ
ຂ່າວ-ພາບ: ສຸວັນລີ
