ສູນກາງແນວລາວສ້າງຊາດ

Lao Front For National Development

ທ່ານຮອງປະທານສູນກາງແນວລາວສ້າງຊາດ ໂອ້ລົມພະນັກງານຫຼັກແຫຼ່ງຢູ່ແຂວງວຽງຈັນ

ວັນ​ທີ 21 ກຸມພາ 2017 ນີ້, ທ່ານ ຄໍາ​ໃບ ດໍາລັດ ກໍາມະການ​ສູນ​ກາງ​ພັກ, ຮອງ​ປະທານ​ສູນ​ກາງ​ແນວ​ລາວ​ສ້າງ​ຊາດ ​ເປັນ​ກຽດ​ໂອ້​ລົມພະນັກງານ​ຫຼັກ​ແຫຼ່​ງຢູ່​ເມືອງ​ເຟືອງ ​ແຂວງ​ວຽງ​ຈັນ ເປັນ​ກຽດ​ເຂົ້າ​ຮ່ວມມີທ່ານ ​ແກ້ວ​ໃຈ ພົມມາ ຮອງ​ເລຂາ​ພັກ​ເມືອງ, ຮອງ​ເຈົ້າ​ເມືອງໆ​ເຟືອງ, ມີ​ທ່ານປະທານ​ແນວ​ລາວ​ສ້າງ​ຊາດ​ເມືອງ ຕະຫຼອດ​ຮອດ​ພະນັກງານ-ລັດຖະກອນ​ ແລະ ພະນັກງານ​ອາວຸ​ໂສ​ບໍານານ​ເຂົ້າ​ຮ່ວມ ທີ່​ສະ​ໂມ​ສອນ​ເມືອງ​ເຟືອງ

ທ່ານຮອງ​ເລຂາ​ພັກ​ເມືອງ​ໄດ້​ລາຍ​ງານ​ສະພາບ​ລວມ ​ແລະ ຈຸດ​ພິ​ເສດ​ຂອງ​ເມືອງ​ໂດຍ​ສັງ​ເຂ​ບ ​ເຊີ່ງ​ທ່ານຍົກ​ໃຫ້​ເຫັນ​ວ່າ: ​ເມືອງ​ເຟືອງ​ເປັນ​ໜຶ່ງ​ໃນ 11​ ເມືອງ​ຂອງ​ແຂວງ​ວຽງ​ຈັນ,​ ໃນ​ທົ່ວ​ເມືອງ​ມີ 43ບ້ານ, ປະກອບ​ມີ 4 ກຸ່ມ​ບ້ານ, ມີ 7.909 ຄົວ​ເຮືອນ, ມີ​ພົນລະ​ເມືອງ​ທັງ​ໝົດ 45.896 ຄົນ, ປະ​ກອບ​ມີ 3 ຊົນ​ເຜົ່າ​ຄື: ຊົນ​ເຜົ່າ​ລາວ, ຊົນ​ເຜົ່າ​ມົ້ງ ​ແລະ ຊົນ​ເຜົ່າ​ກຶມຸ, ທ່າ​ແຮງ​ຕົ້ນຕໍ​ຂອງ​ເມືອງ​ແມ່ນ​​ເຮັດ​ນາ​ປູກ​ເຂົ້າ ​ແລະ ລ້ຽງສັດ​ໃຫຍ່. ການ​ພັດທະນາ​ເສດຖະກິດ-ສັງຄົມ​ ເຫັນ​ວ່າ​ມາ​ເຖິງ​ໃນ​ປະຈຸ​ບັນ​ໃນ​ທົ່ວ​ເມືອງ​ຈາກ 7.909 ຄົວ​ເຮືອນ​ ຍັງ​ເຫຼືອ​ຄອບຄົວ​ທີ່ທຸກ​ຍາກ​ພຽງ​ແຕ່ 57 ຄອບຄົວ, ປະຊາຊົນ​ລາວ​ບັນດາ​ເຜົ່າ​ໃນ​ທົ່ວ​ເມືອງ​ເຫັນ​ວ່າ​ມີ​ຄວາມ​ສາມັກຄີ​ເປັນ​ປຶກ​ແຜ່ນ ​ເຂົ້າ​ຮ່ວມ​ທຸກຂະ​ບວນການ​ທີ່​ສໍາຄັນ​ຂອງ​ຊາດ ​ເປັນ​ຕົ້ນ​ແມ່ນ​ຂະ​ບວນການ 3 ສ້າງ ​ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ປະຊາຊົນ​ນັບ​ມື້​ດີ​ຂື້ນ​ເປັນ​ກ້າວໆ. ກ່ອນ​ອື່ນ​ທ່ານຮອງ​ປະທານ​ສູນ​ກາງ​ແນວ​ລາວ​ສ້າງ​ຊາດ ​ໄດ້​ສະ​ແດງຄວາມ​ຍ້ອງຍໍຕໍ່​ບັນດາ​ຜົນງານ​ຂອງ​ອົງຄະ​ນະ​ພັກ​ເມືອງ​ກໍ່​ຄື​ແນວ​ລາວ​ສ້າງ​ຊາດ ​ແລະ ອົງການ​ຈັດ​ຕັ້ງ​ມະຫາຊົນ​ຍາດ​ມາ​ໄດ້​ໃນ​ໄລຍະ​ທີ່​ຜ່ານ​ມາ; ແຕ່​ຄຽງ​ຄູ່​ກັບ​ຜົນງານ​ທີ່​ພົ້ນ​ເດັ່ນ​ນັ້ນ ຄະນະ​ພັກ, ຄະນະ​ກໍາມະການ​ແນວ​ລາວ​ສ້າງ​ຊາດ ຕ້ອງ​ສືບ​ຕໍ່​ເພີ່ມທະວີຍົກ​ສູງ​ບົດບາດ​ເປັນ​ຄັນ​ທຸງ​ໃນ​ການ​ເຕົ້າ​ໂຮມ​ຄວາມ​ສາມັກຄີປະຊາຊົນ​ລາວ​ບັນດາ​ຊົນ​ເຜົ່າ, ບັນດາ​ສາສະໜາ ​ແລະ ຊັ້ນ​ຄົນ ​ໃຫ້​ໜັກ​ແໜ້ນ, ປຸກລະດົມ​ປະຊາຊົນ​ໃຫ້​ມີ​ນໍ້າ​ໃຈ​ຮັກ​ຊາດຮັກ​ລະບອບ​ໃໝ່ ພ້ອມ​ກັນ​ປົກ​ປັກ​ຮັກສາ ​ແລະ ສ້າງສາ​ພັດທະນາ​​ ເຮັດ​ໃຫ້​ໃນ​ທົ່ວ​ເມືອງ​ເຟືອງ​ມີ​ຄວາມ​ສະຫງົບ​ເປັນ​ຢ່າງ​ດີ.​ ໃນ​ໂອກາດ​ລົງ​ມາພົບ​ປະ​ໂອ້​ລົມ​ຄັ້ງ​ນີ້, ທ່ານຮອງ​ປະທານ​ສູນ​ກາງ​ແນວ​ລາວ​ສ້າງ​ຊາດ​ ຍັງ​ໄດ້​ຫວນ​ຄືນ​ມູນ​ເຊື້ອ​ອັນ​ສະຫງ່າ​ລາສີ​ຂອງ​ອົງການ​ແນວ​ລາວ​ສ້າງ​ຊາດ ​ໃນ​ແຕ່ລະ​ໄລຍະ​ຄື: ​ໄລຍະ​​ແນວ​ລາວ​ອິດສະຫຼະ, ​ແນວ​ລາວ​ສ້າງ​ຊາດ ​ໃນ​ເມືອ​ກ່ອນ ​ແລະ ​ແນວ​ລາວ​ສ້າງ​ຊາດ​ ໃນ​ປະຈຸ​ບັນ. ພ້ອມ​ກັນນີ້, ຍັງ​ໄດ້​ເນັ້ນ​ຕື່ມ​ວ່າ: ຄະນະ​ພັກ, ຄະນະ​ກໍາມະການ​ແນວ​ລາວ​ສ້າງ​ຊາດ​ແຕ່ລະ​ຂັ້ນ​ໃນ​ທົ່ວ​ເມືອງ​ຕ້ອງ​ສຸມ​ໃສ່​ສືບ​ຕໍ່​ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່​ ຄັ້ງ​ທີ X ຂອງພັກ ​ແລະ ມະຕິ​ກອງ​ປະຊຸມ​ໃຫຍ່ ​ຜູ້​ແທນ​ທົ່ວ​ປະ​ເທດ ​ຄັ້ງ​ທີ X ຂອງ​ແນວ​ລາວ​ສ້າງ​ຊາດ ​ເຂົ້າ​ສູ່​ລວງ​ເລິກຕື່ມ​ອີກ.

info@lfnd.org.la | 021 213754 | (856-21) 453191