ສູນກາງແນວລາວສ້າງຊາດ

Lao Front For National Development

ທ່ານຮອງປະທານ ຜູ້ປະຈຳການ ສນຊ ເຄື່ອນໄຫວ ຊຸກຍູ້ວຽກງານແນວລາວສ້າງຊາດ ແຂວງຜົ້ງສາລີ

     ໃນວັນທີ 14 ມີນາ 2024 ນີ້, ທ່ານ ຄໍາໄຫຼ ສີປະເສີດ ກໍາມະການສູນກາງພັກ, ຮອງປະທານຜູ້ປະຈໍາການສູນກາງແນວລາວສ້າງຊາດ (ສນຊ) ພ້ອມດ້ວຍຄະນະໄດ້ເຂົ້າພົບປະຊຸກຍູ້ວຽກງານແນວໂຮມ ທີ່ແຂວງຜົ້ງສາລີ ໂດຍມີທ່ານ ບົວທອງ ອຸແສງຄຳ ຮອງເລຂາພັກແຂວງ, ຜູ້ຊີ້ນຳວຽກງານພັກ-ພະນັກງານຂັ້ນແຂວງ, ທ່ານ ທອງສະຫວັນ ທຳມະວົງ ກຳມະການປະຈຳພັກແຂວງ, ປະທານແນວລາວສ້າງຊາດແຂວງ, ຫົວໜ້າພະແນກພາຍໃນ, ຫົວໜ້າຄະນະຈັດຕັ້ງແຂວງບັນດາທ່ານກຳມະການສູນແນວລາວສ້າງຊາດ ປະຈຳຢູ່ແຂວງ ຕະຫຼອດຮອດພະນັກງານແນວລາວສ້າງຊາດແຂວງເຂົ້າຮ່ວມທີ່ສຳນັກງານປົກຄອງແຂວງຜົ້ງສາລີ.
     ໄດ້ຮັບຟັງການເຜີຍແຜ່ ແຈ້ງການເລກທີ 17/ຄປຈ, ກ່ຽວກັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງແນວລາວສ້າງຊາດ ເພື່ອຮັບປະກັນໃນການດຳເນີນກອງປະຊຸມໃຫຍ່ ຂອງແນວລາວສ້າງຊາດ ແຕ່ລະຂັ້ນ ດຳເນີນຖືກຕ້ອງຕາມກົດໝາຍ ແລະ ກົດລະບຽບແນວລາວສ້າງຊາດ, ສືບຕໍ່ຍູ້ແຮງພາລະກິດປ່ຽນແປງໃໝ່ຂອງພັກເຂົ້າສູ່ລວງເລິກ, ສ້າງການຫັນປ່ຽນຢ່າງແຂງແຮງ, ເພື່ອບູລະນະປັບປຸງກົງຈັກການຈັດຕັ້ງ ແລະ ບຸກຄະລາກອນຂອງແນວລາວສ້າງຊາດໃຫ້ມີຄວາມໜັກແໜ້ນເຂັ້ມແຂງ ສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງຂອງແນວລາວສ້າງຊາດແຕ່ລະຂັ້ນ.
     ທ່ານຮອງປະທານ ສນຊ ໄດ້ເນັ້ນຕື່ມວ່າ: ແນວລາວສ້າງຊາດແຕ່ລະຂັ້ນສືບຕໍ່ຮ່ວມມືກັບອົງການພາຄີ ຊາວໜຸ່ມ, ແມ່ຍິງ, ກຳມະບານ ແລະ ນັກຮົບເກົ່າ ສືບຕໍ່ລົງໄປຢ້ຽມຢາມພົບປະປະຊາຊົນ ຊຸກຍູ້ໃຫ້ມີຄວາມສະຫງົບ, ສືບຕໍ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ XI ຂອງແນວລາວສ້າງຊາດ ເປັນຕົ້ນແມ່ນມະຕິກອງປະຊຸມສາມັນຄົບຄະນະກໍາມະການສູນກາງແນວລາວສ້າງຊາດ ຄັ້ງທີ 3 ສະໄໝ ທີ່ XI, ແຈ້ງການ ເລກທີ 17/ຄປຈ, ລົງວັນທີ 14 ກຸມພາ 2024 ກ່ຽວກັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງແນວລາວສ້າງຊາດ ລົງສູ່ຮາກຖານໃຫ້ກວ້າງຂວາງ ແລະ ເລິກເຊິ່ງ. ສືບຕໍ່ເຕົ້າໂຮມຄວາມສາມັກຄີປະຊາຊົນບັນດາເຜົ່າ, ບັນດາຊັ້ນຄົນ ແລະ ບັນດາສາສະໜາຕ່າງໆ ເປັນເຈົ້າການໃນວຽກງານປ້ອງກັນຊາດ-ປ້ອງກັນຄວາມສະຫງົບ, ເສີມຂະຫຍາຍມູນເຊື້ອຮິດຄອງປະເພນີອັນດິງາມ ຂອງບັນດາເຜົ່າ ແລະ ໂຄສະນາປຸກລະດົມຂົນຂວາຍທຸກພາກສ່ວນບັນດາອົງຈັດຕັ້ງ, ບຸກຄົນ,ນິຕິບຸກຄົນ, ປະຊາຊົນລາວບັນດາເຜົ່າ ສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນຂອງພັກ, ຂອງແນວລາວສ້າງຊາດ ຕິດພັນກັບການສະເຫຼີມສະຫຼອງ ວັນສ້າງຕັ້ງແນວລາວສ້າງຊາດ ຄົບຮອບ 75 ປີ ແລະ ວັນສໍາຄັນຕ່າງໆຂອງພັກ ຂອງຊາດ ໃຫ້ເປັນຂະບວນການຟົດຟື້ນ.
ບກ: ສຊ ຈຶ້ໄຊ
ຂ່າວ-ພາບ: ສຸວັນລີ
 
info@lfnd.org.la | 021 213754 | (856-21) 453191