ສູນກາງແນວລາວສ້າງຊາດ

Lao Front For National Development

ທ່ານຮອງປະທານ ສນຊ ຕ້ອນຮັບຄະນະປະສານງານຕ່າງປະເທດ ບໍລິສັດ VNV

ທ່ານ ຄໍາໄຫຼ ສີປະເສີດ ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະ ໄດ້ຕ້ອນຮັບທ່ານ ນາງ ກາຊິຕູລີ ລາພໍນາວາກ້າ ຫົວໜ້າຝ່າຍປະສານງານຕ່າງປະເທດ ບໍລິສັດ VNV ພ້ອມດ້ວຍຄະນະ ໂດຍມີທ່ານ ສະເໜີ ຈູນລະມະນີ ກໍາມະການສູນກາງແນວລາວສ້າງຊາດ ທີ່ປຶກສາໂຄງການ, ມີທ່ານ ປອ. ດາວຽງສັກ ຫວ່າງວິຈິດ ຫົວໜ້າຫ້ອງການ ສນຊ ໃນນາມຫົວໜ້າໂຄງການ ເຂົ້າຮ່ວມທີ່ສູນກາງແນວລາວສ້າງຊາດ, ໃນວັນທີ 16 ຕຸລາ 2023;

ການເຄື່ອນໄຫວຢ້ຽມຢາມຄັ້ງນີ້, ໂດຍປະຕິບັດຕາມບົດບັນທຶກຄວາມເຂົ້າໃຈ ການຮ່ວມມື ພັດທະນາໂຄງການສິນເຊື່ອກາກບອນ ສໍາລັບພາກປະຊາຊົນຂອງແນວລາວສ້າງຊາດ ທີ່ໄດ້ລົງນາມ ຄັ້ງວັນທີ 04 ພະຈິກ 2022 ແລະ ຂໍ້ຕົກລົງຂອງຄະນະປະຈໍາ ສູນກາງແນວລາວສ້າງຊາດ ສະບັບເລກທີ 175/ຄປຈ, ລົງວັນທີ 30 ມິຖຸນາ 2023 ວ່າດ້ວຍການແຕ່ງຕັ້ງຄະນະຊີ້ນໍາ ແລະ ຄະນະຮັບຜິດຊອບໂຄງການຮ່ວມມື ລະຫວ່າງ ສູນກາງແນວລາວສ້າງຊາດ ແລະ ບໍລິສັດ VNV; ໃນນີ້, ສອງຝ່າຍໄດ້ປຶກສາຫາລື ແລະ ຊຸກຍູ້ ການແຕ່ງຕັ້ງທີມງານໂຄງການຂັ້ນທ້ອງຖິ່ນ ແລະ ຈະໄປຢ້ຽມຊົມພື້ນທີ່ນາ ແຊງເປົ້າຫມາຍໂຄງການທົດລອງສິນເຊື່ອກາກບອນ, ໂຄງການເຮັດນາແຊງແບບປຽກສະຫຼັບແຫ້ງ ທີ່ຈະທົດລອງເຮັດຢູ່ເມືອງໜອງບົກ ແຂວງ ຄໍາມ່ວນ ແລະ ເມືອງໄຊບູລີ ແຂວງສະຫວັນນະເຂດ;

ພ້ອມດຽວກັນນັ້ນ, ໄດ້ແລກປ່ຽນບົດຮຽນ ແລະ ປະກອບຄໍາເຫັນຕ່າງໆຮ່ວມກັນ ເປັນຕົ້ນການແຕ່ງຕັ້ງຄະນະຮັບຜິດຊອບໂຄງການ ເຊິ່ງປະກອບດ້ວຍຂັ້ນເມືອງ, ຫ້ອງການກະສິກໍາ ແລະ ປ່າໄມ້ເມືອງ, ນາຍບ້ານ ແລະ ປະທານແນວລາວສ້າງຊາດບ້ານ ເປົ້າໝາຍໂຄງການ; ສ້າງແຜນ ແລະ ຝຶກອົບຮົມວຽກງານໂຄງການ ໃຫ້ແກ່ຄະນະຮັບຜິດຊອບດັ່ງກ່າວ ແລະ ສົມທົບກັບຄະນະຮັບຜິດຊອບຂັ້ນທ້ອງຖິ່ນ ເພື່ອຈັດຕັ້ງປະຕິບັດໂຄງການສິນເຊື່ອກາກບອນ ກໍຄື “ໂຄງການເຮັດນາແຊງ ແບບປຽກສະຫຼັບແຫ້ງ” ໃຫ້ໄດ້ຮັບຜົນສໍາເລັດຕາມເປົ້າໝາຍທີ່ວາງໄວ້.

 

ບກ: ຈິດຕະພົງ

ຂ່າວ+ພາບ: ສຸວັນລີ

info@lfnd.org.la | 021 213754 | (856-21) 453191