ສູນກາງແນວລາວສ້າງຊາດ

Lao Front For National Development

ທ່ານຮອງປະທານ ສນຊ ຕ້ອນຮັບການເຂົ້າພົບປະຢ້ຽມຢາມຂອງພີ່ນ້ອງເຊື້ອຊາດລາວ.

ວັນທີ 27 ທັນວາ 2023 ນີ້, ທ່ານ ດຣ ນາງ ອິນລາວັນ ແກ້ວບຸນພັນ ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະໄດ້ຕ້ອນຮັບການເຂົ້າພົບປະຢ້ຽມຢາມຂອງພີ່ນ້ອງຄະນະນັກກິລາເຊື້ອຊາດລາວ ຈາກ ປະເທດການາດາ ນໍາໂດຍ ທ່ານ ພູເງິນ ສິອະໂນໄທ, ກຳມະການ ສນຊ ຢູ່ ປະເທດການາດາ ພ້ອມດ້ວຍຄະນະ ທີ່ສູນຄົ້ນຄວ້າ ແລະ ຝຶກອົບຮົມ ສນຊ.
ທ່ານຮອງປະທານ ສນຊ ໄດ້ສະແດງຄວາມຍ້ອງຍໍຊົມເຊີຍ ແລະ ຍິນດີຕ້ອນຮັບ ຄະນະທີ່ມາຢາມບ້ານເກີດເພື່ອເປັນການສັນລະເສີນຈິດໃຈ ຮັກເຊື້ອແພງຊາດ ຂອງພີ່ນ້ອງເຊື້ອຊາດລາວຢູ່ຕ່າງປະເທດ. ພ້ອມກັນນີ້, ທ່ານຍັງໄດ້ໃຫ້ຮູ້ວ່າ: ແນວລາວສ້າງຊາດ ແມ່ນອົງການຈັດຕັ້ງສຳພັນທາງການເມືອງ ຂອງທົ່ວສັງຄົມ, ເປັນສະຫະພັນ ຂອງອົງການຈັດຕັ້ງການເມືອງ, ອົງການຈັດຕັ້ງສັງຄົມ, ບຸກຄົນທີ່ເປັນຕົວແທນໃຫ້ແກ່ຊັ້ນຄົນ, ຊົນເຜົ່າ, ສາສະໜາ, ເພດ, ໄວ ລວມທັງຕົວແທນຄົນເຊື້ອຊາດລາວ ທີ່ດຳລົງຊີວິດຢູ່ຕ່າງປະເທດ ບົນພື້ນຖານຄວາມຕື່ນຕົວ ແລະ ສະໝັກໃຈ ມີພາລະບົດບາດ ຕົ້ນຕໍໃນການເປັນຫຼັກແຫຼ່ງ ເຕົ້າໂຮມຄວາມສາມັກຄີປອງດອງ ຄວາມເປັນປຶກແຜ່ນ ຂອງປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດ, ໄວ ລວມທັງຄົນເຊື້ອຊາດລາວ ທີ່ດຳລົງຊີວິດຢູ່ຕ່າງປະເທດ; ສຶກສາອົບຮົມ, ປຸກລະດົມ, ຂົນຂວາຍ ແລະ ເສີມຂະຫຍາຍ ສິດເປັນເຈົ້າ ຂອງປະຊາຊົນ ແລະ ປົກປ້ອງສິດ, ຜົນປະໂຫຍດອັນຊອບທຳຂອງປະຊາຊົນ, ຕິດຕາມ ແລະ ໃຫ້ຄຳປຶກສາ ໃນການປະຕິບັດ ສິດ, ໜ້າທີ່, ການປະຕິບັດກົດໝາຍ ແລະ ລະບຽບການ ຂອງອົງການພາຄີ; ຕິດຕາມ ແລະ ໃຫ້ຄຳປຶກສາ, ສະເໜີແນະຕໍ່ການຈັດຕັ້ງການເມືອງ-ສັງຄົມ, ບຸກຄົນ ແລະ ນິຕິບຸກຄົນ ໃນການເຄື່ອນໄຫວ ຂອງອົງການອຳນາດລັດ.
ສໍາລັບພີ່ນ້ອງເຊື້ອຊາດລາວຢູ່ຕ່າງປະເທດ, ແນວລາວສ້າງຊາດ ພວມສຸມໃສ່: ໃຫ້ການຮ່ວມມື ແລະ ເສີມຂະຫຍາຍບົດບາດຂອງທີ່ປຶກສາ, ຜູ້ຮ່ວມງານຢູ່ຕ່າງປະເທດ ເປັນຜູ້ເຕົ້າໂຮມຄວາມສາມັກຄີພີ່ນ້ອງຄົນເຊື້ອຊາດລາວຜູ້ຢູ່ອ້ອມຂ້າງຂອງຕົນ; ສ້າງເງື່ອນໄຂສະດວກໃຫ້ພີ່ນ້ອງເຊື້ອຊາດລາວທີ່ດໍາລົງຊີວິດຢູ່ຕ່າງປະເທດໃນການໄປມາຫາສູ່, ການດໍາເນີນກິດຈະກໍາທາງດ້ານສາສະໜາ, ວັດທະນະທໍາ, ກິລາ, ທ່ອງທ່ຽວ, ການລົງທຶນ, ກໍຄືນໍາໃຊ້ຄວາມຮູ້ຄວາມສາມາດທາງດ້ານເຕັກນິກວິຊາການຕ່າງໆເພື່ອປະກອບສ່ວນສ້າງສາພັດທະນາປະເທດຊາດ; ສົ່ງເສີມໃຫ້ລູກຫລານເຊື້ອຊາດລາວຮູ້ຮັກສາຄຸນຄ່າວັດທະນະທຳ, ພາສາຂອງຊາດ, ສ້າງມິດຕະພາບ ແລະ ຍາດແຍ່ງເອົາບົດຮຽນປະສົບການ, ວິທະຍາສາດເຕັກໂນໂລຊີໃໝ່ຂອງປະເທດທີ່ຕົນຢູ່ ແລະ ຫັນໜ້າມາປະກອບສ່ວນເຂົ້າໃນການພັດທະນາປະເທດຊາດ ໃຫ້ຫຼາຍກວ່າເກົ່າ; ພ້ອມກັນນັ້ນ, ແນວລາວສ້າງຊາດ ພ້ອມທີ່ຈະສະໜອງຂໍ້ມູນຂ່າວສານທີ່ຈໍາເປັນກ່ຽວກັບການໄປ-ມາຫາສູ່, ຕັ້ງໜ້າຮັບຟັງ ແລະ ພິຈາລະນາຂໍ້ຄິດເຫັນຂອງພີ່ນ້ອງເຊື້ອຊາດລາວຢ່າງສ້າງສັນ ແລະ ກວ້າງຂວາງກວ່າເກົ່າ, ເອົາໃຈໃສ່ອໍານວຍຄວາມສະດວກ ໃນການເຂົ້າມາ ສປປ ລາວ. ພິເສດ ແມ່ນແນວລາວສ້າງຊາດ ກຳລັງລະດົມຂະບວນການ “ຮັກບ້ານເກີດ” ຊຶ່ງເປັນຂະບວນການທີ່ລະດົມໃຫ້ພີ່ນ້ອງເຊື້ອຊາດລາວຢູ່ຕ່າງປະເທດ ມາຮ່ວມກັນຕອບບຸນແທນຄຸນ ບ່ອນຝັງສາຍແຮ່ ບ່ອນແຜ່ສາຍບື ຂອງຕົນ ດ້ວຍວິທີການຕ່າງໆ ຕາມເງື່ອນໄຂ ແລະ ຄວາມສາມາດຂອງແຕ່ລະທ່ານ ນອກຈາກນັ້ນ, ຄະນະໄດ້ເຂົ້າຢ້ຽມຊົມທັດສະນະສຶກສາຫໍມູນເຊື້ອແນວລາວສ້າງຊາດຕື່ມອິກ.
ບກ: ພ.ບຸບຜາ
ຂ່າວ+ພາບ: ສຸວັນລີ
info@lfnd.org.la | 021 213754 | (856-21) 453191