ສູນກາງແນວລາວສ້າງຊາດ

Lao Front For National Development

ທ່ານຮອງປະທານ ສນຊ ບໍ່ປະຈຳການ ຕ້ອນຮັບຄະນະຜູ້ບໍລິຫານ ໂຮງໜໍ ແພດລັງສິດ ປະເທດໄທ

     ທ່ານ ສຈ.ປອ ອ໋ອດ ພົງສະຫວັນ ຮອງປະທານ ສູນກາງແນວລາວສ້າງຊາດ (ສນຊ) ບໍ່ປະຈຳການ ຫົວໜ້າຄະນະທີ່ປຶກສາວຽກງານເສດຖະກິດ ໄດ້ຕ້ອນຮັບການເຂົ້າພົບປະຢ້ຽມຢາມ ຂອງທ່ານ ລົນນະຊິດ ແຢ້ມສະອາດ, ຜູ້ອໍານວຍການໃຫຍ່ ໂຮງໜໍແພດລັງສິດ ປະເທດໄທ ພ້ອມດ້ວຍຄະນະ, ໂດຍມີ ທ່ານ ນາງ ແສງດາວ ບຸພະກອນຄໍາ ຮອງປະທານ, ຜູ້ອໍານວຍການໃຫຍ່ ກຸ່ມບໍລິສັດພົງສະຫັວນ ຈໍາກັດ, ມີທ່ານຮອງຫົວໜ້າຫ້ອງການ ແລະ ຮອງຫົວໜ້າກົມ ສູນກາງແນວລາວສ້າງຊາດ ເຂົ້າຮ່ວມ ຢູ່ທີ່ຫ້ອງຮັບແຂກສູນກາງແນວລາວສ້າງຊາດ ໃນວັນທີ 24 ມັງກອນ 2024.
     ການພົບປະຢ້ຽມຢາມໃນຄັ້ງນີ້, ສອງຝ່າຍ ໄດ້ປຶກສາຫາລືກ່ຽວກັບວຽກງານໂຄງການສ້າງໂຮງໜໍ ຢູ່ ສປປ ລາວ, ໃນນີ້, ທ່ານ ລົນນະຊິດ ແຢ້ມສະອາດ ໄດ້ລາຍງານໂດຍຫຍໍ້ກ່ຽວກັບ ການບໍລິຫານ ແລະ ການໃຫ້ບໍລິການ ຂອງໂຮງໜໍ ແພດລັງສິດ ເຊິ່ງໃນໄລຍະຜ່ານມາໄດ້ມີການຂະຫຍາຍການພົວພັນຊ່ວຍເຫຼືອປະຊາຊົນທີ່ຢູ່ຫ່າງໄກຊອກຫຼີກຢູ່ປະເທດອອ້ມຂ້າງເປັນຕົ້ນປະເທດກໍາປູເຈຍ, ມຽນມາ ເຂົ້າເຖິງດ້ານສາທາລະນະສຸກ ແລະ ຍັງມີການພົວພັນຮ່ວມມືສຶກສາຄວາມເປັນໄປໄດ້ໃນການສ້າງໂຮງໜໍ ຢູ່ ສປປ ລາວ. ໃນໂອກາດນີ້, ຮອງປະທານ ສູນກາງແນວລາວສ້າງຊາດ ບໍ່ປະຈໍາການ ໄດ້ສະແດງຄວາມຂອບໃຈເປັນຢ່າງສູງມາຍັງ ທ່ານ ລົນນະຊິດ ແຢ້ມສະອາດ, ຜູ້ອໍານວຍການໃຫຍ່ ໂຮງໜໍແພດລັງສິດ ປະເທດໄທ ພ້ອມດ້ວຍຄະນະ ທີ່ເຂົ້າພົບປະຢ້ຽມຢາມ ແລະ ປຶກສາຫາລືວຽກງານ, ພ້ອມທັງໄດ້ລາຍງານຫຍໍ້ກ່ຽວກັບພາລະບົດບາດ, ສິດ ແລະ ໜ້າທີຂອງ ສູນກາງແນວລາວສ້າງຊາດ, ລາຍງານໂຮງໜໍຢູ່ ສປປລາວ ແລະ ວຽກງານກອງທຶນສາມັກຄີພັດທະນາ ສູນກາງແນວລາວສ້າງຊາດ ໃຫ້ທ່ານຮັບຊາບຕື່ມອີກ.
ບ.ກ: ກົງແກ້ວ
ພາບ+ຂ່າວ:ແສງຫລ້າ
info@lfnd.org.la | 021 213754 | (856-21) 453191