ສູນກາງແນວລາວສ້າງຊາດ

Lao Front For National Development

ທ່ານຮອງປະທານ ສນຊ ປະກອບຄໍາເຫັນຕໍ່ກອງປະຊຸມສາມັນຄົບຄະນະບໍລິຫານງານສູນກາງກໍາມະບານລາວເທື່ອທີ 3 ສະໄໝທີ VII

ໃນວາລະດໍາເນີນກອງປະຊຸມສາມັນຄົບຄະນະບໍລິຫານງານສູນກາງກໍາມະບານລາວ ເທື່ອທີ່ 3 ສະໄໝທີ VII ພາຍໃຕ້ການເປັນປະທານຂອງທ່ານ ປ້ານ ນ້ອຍມະນີ ກໍາມະການສູນກາງພັກ, ປະທານສະຫະພັນກໍາມະບານລາວ. ທ່ານ ຄໍາຫຼ້າ ລິ້ງນະສອນ ຮອງປະທານສູນກາງແນວລາວສ້າງຊາດ (ສນຊ) ໄດ້ປະກອບຄໍາເຫັນຕໍ່ກອງປະຊຸມ. ໃນວັນທີ 22 ພະຈິກ 2017 ນີ້, ທີ່ສູນກາງສະຫະພັນກໍາມະບານລາວ.

ທ່ານຮອງປະທານສູນກາງແນວລາວສ້າງຊາດ ໄດ້ໃຫ້ຮູ້ວ່າ: ສະຫະພັນກໍາມະບານລາວໃນຖານະເປັນອົງການພາຄີຂອງແນວລາວສ້າງຊາດ ກໍໄດ້ຕິດຕາມການເຄື່ອນໄຫວຂອງສະຫະພັນກໍາມະບານລາວ ແລະ ກໍໄດ້ມີແຜນການເຄື່ອນໄຫວຮ່ວມກັນກັບສູນກາງແນວລາວສ້າງຊາດ ເຫັນວ່າສະຫະພັນກໍາມະບານລາວ ໄດ້ມີຜົນງານທີ່ຜົນເດັ່ນຫຼາຍດ້ານ ເຄື່ອນໄຫວພາລະບົດບາດ ແລະ ໜ້າທີ່ການເມືອງຂອງຕົນສໍາເລັດຜົນຢ່າງໃຫຍ່ຫຼວງເປັນຕົ້ນແມ່ນການສຶກສາອົບຮົມຊົນຊັ້ນກໍາມະກອນລາວ ໃຫ້ເປັນເຈົ້າຂອງປະເທດຊາດ ບົນພື້ນຖານການສ້າງພັນທະພາບກໍາມະກອນ-ຊາວກະສິກອນ-ນັກຮຽນຮູ້ປັນຍາຊົນປະຕິວັດທີ່ໜັກແໜ້ນ, ປົກປ້ອງສິດ ແລະ ຜົນປະໂຫຍດອັນຊອບທໍາຂອງຜູ້ຊາວອອກແຮງງານລາວ, ພັດທະນາອົງການຂອງຕົນໃຫ້ມີບາດກ້າວຂະຫຍາຍຕົວໃໝ່ ເປັນຕົ້ນໄດ້ຈັດຕັ້ງເຜີຍແຜ່ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VII ກົດລະບຽບ, ຂໍ້ແຂ່ງຂັນ 5 ເປັນເຈົ້າ, ວິໄສທັດ ແລະ ແຜນຍຸດທະສາດພັດທະນາກໍາມະບານເຂົ້າສູ່ຂົງເຂດວຽກງານຂອງພັກ ແລະ ລັດ, ປັບປຸງການຈັດຕັ້ງຂອງກໍາມະບານໃນແຕ່ລະຂັ້ນ ແຕ່ລະຂົງເຂດ, ຂະຫຍາຍການຈັດຕັ້ງກໍາມະບານເຂົ້າສູ່ຂົງເຂດໂຮງຈັກ, ໂຮງງານທັງພາກລັດ, ເອກະຊົນ ແລະ ໄດ້ອອກແຮງງານໂຄສະນາປຸກລະດົມດ້ວຍຫຼາຍຮູບການຜ່ານສື່ຕ່າງໆ ປະກອບສ່ວນເຂົ້າໃນການແກ້ໄຂຄວາມທຸກຍາກຂອງຄອບຄົວ ແລະ ບ້ານກໍຄືປະຊາຊົນຊາວຜູ້ອອກແຮງງານມີຄວາມສາມັກຄີປອງດອງທີ່ກວ້າງຂວາງ. ພ້ອມກັນເຂົ້າຮ່ວມວຽກງານ 3 ສ້າງ, ເຂົ້າຮ່ວມຂະບວນການປະຕິບັດນະໂຍບາຍແຂ່ງຂັນຮັກຊາດ ແລະ ພັດທະນາ, ກໍ່ສ້າງຮາກຖານຕາມ 4 ເນື້ອໃນ 4 ຄາດໝາຍ ໂດຍສະເພາະແມ່ນຜັນຂະຫຍາຍເນື້ອໃນຈິດໃຈກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກປະຊາຊົນປະຕິວັດລາວເຂົ້າສູ່ຊີວິດຕົວຈິງ, ໃນໄລຍະຜ່ານມາໄດ້ເຕົ້າໂຮມບ້ານນ້ອຍເປັນບ້ານໃຫຍ່, ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ.

ໃນໂອກາດນີ້, ທ່ານໄດ້ອວຍພອນໃຫ້ກອງປະຊຸມຄົບຄະນະບໍລິຫານງານສູນກາງສະຫະພັນກໍາມະບານລາວ ຄັ້ງນີ້ ຈົ່ງດໍາເນີນໄປດ້ວຍຜົນສໍາເລັດຢ່າງສະຫງ່າງາມ.

info@lfnd.org.la | 021 213754 | (856-21) 453191