ໃນໂອກາດເຂົ້າຮ່ວມກອງປະຊຸມສົນທະນາມິດຕະພາບ ຄັ້ງທີ 2 ແລະ ກອງປະຊຸມເວທີປຶກສາຫາລືເສດຖະກິດນະຄອນໂຮ່ຈີມິນ ຄັ້ງທີ 5 ປີ 2024  ຢູ່ນະຄອນໂຮ່ຈິມິນ ສສ ຫວຽດນາມ, ໃນວັນທີ 26 ກັນຍາ 2024 ຜ່ານມາ ທ່ານ ຄໍາໄຫຼ ສີປະເສີດ ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ ຜູ້ປະຈໍາການ ໄດ້ນໍາພາຄະນະຜູ້ແທນຈາກບັນດາແຂວງຂອງ ສປປ ລາວ 11 ຄະນະ ທີ່ໄປເຂົ້າຮ່ວມກອງປະຊຸມສົນທະນາມິດຕະພາບ ແລະກອງປະຊຸມເວທີປຶກສາຫາລືເສດຖະກິດນະຄອນໂຮ່ຈີມິນ ເຂົ້າພົບປະກັບ ສະຫາຍ ຟານ ວັນໝາຍ ກໍາມະການສູນກາງພັກ, ຮອງເລຂາຄະນະພັກ, ປະທານຄະນະກຳມະການປະຊາຊົນນະຄອນໂຮ່ຈີມິນ, ໃນໂອກາດນີ້ໄດ້ຕີລາຄາສູງ ແລະ ຊົມເຊີຍຕໍ່ຜົນສຳເລັດຂອງການດໍາເນີນສອງກອງປະຊຸມດັ່ງກ່າວ, ພ້ອມນັ້ນ ກໍໄດ້ແລກປ່ຽນບັນຫາຕ່າງໆທີ່ສອງຝ່າຍມີຄວາມສົນໃຈຮ່ວມກັນ ເປັນຕົ້ນ: ການເພີ່ມທະວີການໄປມາຫາສູ່ຢ້ຽມຢາມ ຊຶ່ງກັນ ແລະ ກັນ ຊຸກຍູ້ໃຫ້ນັກທຸລະກິດຫວຽດນາມ ມາລົງທຶນຢູ່ລາວໃຫ້ຫຼາຍຕື່ມ; ການຊ່ວຍເຫຼືອສ້າງຊັບພະຍາກອນມະນຸດ ແລະອື່ນໆ.

ສະຫາຍປະທານຄະນະກຳມະການປະຊາຊົນນະຄອນໂຮ່ຈີມິນ  ໄດ້ສະແດງຄວາມຂອບໃຈຄະນະຜູ້ແທນຝ່າຍລາວ ທີ່ເຂົ້າຮ່ວມກອງປະຊຸມ ພ້ອມທັງຢືນຢັນ ຈະໃຫ້ການຊ່ວຍເຫຼືອ ໂດຍສະເພາະໃນຂົງເຂດການສຶກສາ, ການຝຶກອົບຮົມ ໃຫ້ບັນດາທ້ອງຖິ່ນຂອງລາວ ຕາມຫົວຂໍ້ທີ່ຝ່າຍລາວສົນໃຈ, ຈະຊຸກຍູ້ສົ່ງເສີມການຄ້າ, ການລົງທຶນ ແລະທ່ອງທ່ຽວລະຫວ່າງລາວ-ຫວຽດນາມໃຫ້ຫຼາຍຂຶ້ນກວ່າເກົ່າ.

ໃນວັນທີ 27 ກັນຍາ 2024, ໄດ້ພົບປະກັບ ສະຫາຍ ຫງວຽນ ແທັງຈຸ່ງ ຮອງປະທານຄະນະກໍາມະການແນວໂຮມປະເທດຊາດຫວຽດນາມນະຄອນໂຮ່ຈີມິນ, ໃນໂອກາດນີ້ ສະຫາຍຮອງປະທານ ສນຊ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ໄດ້ແຈ້ງໃຫ້ຊາບກ່ຽວກັບສະພາບການເຄື່ອນໄຫວວຽກງານຂອງແນວລາວສ້າງຊາດ ແລະການຮ່ວມມື ຂອງ ສູນກາງແນວລາວສ້າງຊາດ ກັບ ແນວໂຮມແຫ່ງຊາດ ສສ ຫວຽດນາມ. ພ້ອມນັ້ນ ກໍໄດ້ແລກປ່ຽນຄໍາເຫັນຕໍ່ບັນຫາຕ່າງໆທີ່ສອງຝ່າຍມີຄວາມສົນໃຈຮ່ວມກັນ.

ສະຫາຍຮອງປະທານແນວໂຮມ ນະຄອນໂຮ່ຈີມິນໄດ້ຍົກໃຫ້ເຫັນນໍ້າໃຈມິດຕະພາບອັນເປັນມູນເຊື້ອ ແລະການພົວພັນຮ່ວມມືລະຫວ່າງແນວໂຮມນະຄອນໂຮ່ຈີມິນກັບບັນດາແຂວງຂອງລາວ ໃນໄລຍະຜ່ານມາ, ຊື່ງໄດ້ຄຽງບ່າຄຽງໄຫຼ່ຊ່ວຍເຫຼືອກັນຕະຫຼອດມາ ໂດຍສະເພາະໃນເວລາທີ່ອີກຝ່າຍໜຶ່ງປະສົບໄພທໍາມະຊາດ, ຊ່ວງພະຍາດໂຄວິດ-19 ລະບາດ ກໍໄດ້ຊ່ວຍເຫຼືອ, ແບ່ງປັນນໍ້າໃຈຕໍ່ກັນ. ໄດ້ລາຍງານໃຫ້ຊາບກ່ຽວກັບໂຄງການຮ່ວມມືລະຫວ່າງແນວໂຮມນະຄອນໂຮ່ຈີມິນກັບບັນດາແຂວງຂອງລາວ ໃນການນໍາເອົານັກສຶກສາລາວໄປພັກອາໃສຢູ່ນໍາຄອບຄົວຂອງປະຊາຊົນຫວຽດນາມ ຊື່ງໄດ້ເຮັດໃຫ້ຄົນຮຸ້ນໜຸ່ມ ເຂົ້າໃຈຕື່ມນໍ້າໃຈມິດຕະພາບ ແລະສາຍພົວພັນຂອງສອງປະເທດ; ພ້ອມນັ້ນ ຍັງໄດ້ແຈ້ງໃຫ້ຊາບ ກ່ຽວກັບການກະກຽມກອງປະຊຸມໃຫຍ່ແນວໂຮມນະຄອນໂຮ່ຈີມິນ ແລະ ກອງປະຊຸມໃຫຍ່ຄະນະກໍາມະແນວໂຮມປະເທດຊາດຫວຽດນາມ ໃນເດືອນ ຕຸລາ 2024 ທີ່ຈະມາເຖິງນີ້ອີກດ້ວຍ.

ບກໂດຍ: ສຊ ຈື້ໄຊ