ສູນກາງແນວລາວສ້າງຊາດ

Lao Front For National Development

ທ່ານຮອງປະທານ ສນຊ ເຂົ້າຮ່ວມພິທີເປີດງານບຸນກິນຈຽງ (ນໍເປ່ເຈົາ)

ເນື່ອງໃນໂອກາດບ້ານທ່າດິນແດງ ໃດ້ເປັນເຈົ້າພາບໃນການຈັດງານບຸນກິນຈຽງສົ່ງທ້າຍປີເກົ່າ ຕ້ອນຮັບປີໃໝ່ 2018 ຕາມຮີດຄອງປະເພນີຂອງຊົນເຜົ່າມົ້ງ ໂດຍເປັນກຽດເຂົ້າຮ່ວມຂອງທ່ານ ນ ຍອດແກ້ວມະນີ ສຸພານຸວົງ ຮອງປະທານສູນກາງແນວລາວສ້າງຊາດ, ມີບັນດາທ່ານການນໍາແນວລາວສ້າງຊາດນະຄອນຫຼວງວຽງຈັນ, ບັນດາທ່ານການນໍາເມືອງໄຊທານີ ຕະຫຼອດຮອດອົງການປົກຄອງບ້ານ ແລະ ພໍ່ແມ່ປະຊາຊົນເຂົ້າຮ່ວມ, ໃນວັນທີ 25 ພະຈິກ 2017.

ໃນພິທີຄັ້ງນີ້, ໄດ້ຮັບຟັງການລາຍງານສະພາບລວມຂອງການຈັດງານບຸນກິນຈຽງໂດຍຫຍໍ້: ການຈັດງານບຸນກິນຈຽງ ເຊິ່ງເປັນການປົກປັກຮັກສາ ແລະ ການເສີມຂະຫຍາຍຮີດຄອງປະເພນີອັນດີງາມຂອງຊາດຂອງເຜົ່າ ເຊິ່ງບຸນກິນຈຽງຂອງເຜົ່າມົ້ງແມ່ນປີໜຶ່ງໄດ້ຈັດເທື່ອໜຶ່ງ ຫຼັງຈາກ ການເກັບກ່ຽວຜົນລະປູກສໍາເລັດ ຫຼື ສົ່ງທ້າຍປີເກົ່າຕ້ອນຮັບປີໃໝ່, ໃນສະໄໝບັນພະບູລຸດ ເຂົາເຈົ້າຈະຄິດວ່າໄລຍະ 1 ປີຜ່ານມາ ຄົນເຮົາແຕ່ລະຄົນຄົງອາດຈະມີເຄາະຮ້າຍເວນກໍາ, ພະຍາດໂລຄາຕິດຕົວບໍ່ຫຼາຍກໍ່ໜ້ອຍ ສິ່ງເລົ່ານັ້ນຕ້ອງໄດ້ຜັດແຜ່ວໃຫ້ອອກຈາກຕົວເຮົາໄປນໍາປີເກົ່າ. ບຸນກິນຈຽງຕາມຮີດຄອງປະເພນີແມ່ນຈັດຂຶ້ນໃນມື້ແຮມ 15 ຄໍ່າຂອງເດືອນ 12 ລາວ ເຊິ່ງເປັນມື້ສຸດທ້າຍຂອງປີເກົ່າ, ຕອນເຊົ້າມື້ໃໝ່ຂຶ້ນ 1 ຄໍ່າ ຂອງເດືອນໜຶ່ງ ຖ້າເປັນຮີດຄອງລາວເອີ້ນວ່າເດືອນຈຽງ ມົ້ງຈິ່ງເອິ້ນວ່າ: (ນໍເປ່ເຈົາ) ແປວ່າກິນ 30. ຊົນເຜົ່າມົ້ງແມ່ນຊົນເຜົ່າໜຶ່ງທີ່ມີຄວາມເຊື່ອຖືຮີດຄອງປະເພນີຕາມທີ່ເຄີຍປະຕິບັດມາຄື: ບູຊາ ປູ່ຍາ (ບັນພະບູລຸດ) ທີ່ໄດ້ລວງລັບໄປແລ້ວ, ເຜົ່າມົ້ງແມ່ນເຜົ່າໜຶ່ງທີ່ມີຄວາມກະຕັນຍູ້ຮູ້ບຸນຄຸນປູ່ຍາ ແລະ ສິ່ງສັກສິດ ທີ່ໄດ້ຊ່ວຍໃນການເຄື່ອນໄຫວດໍາລົງຊີດວິດຂອງຕົນ. (ນໍເປ່ເຈົາ) ແມ່ນບຸນໜຶ່ງທີ່ມີຄວາມໝາຍຄວາມສໍາຄັນທີ່ສຸດໃນຊີວິດ, ເປັນງານບຸນທີ່ມີຄວາມເປັນເອກະພາບທາງດ້ານຈິດໃຈຂອງເຜົ່າມົ້ງ.


ພ້ອມກັນນີ້, ທ່ານ ນາງ ຍອດແກ້ວມະນີ ສຸພານຸວົງ ໄດ້ສະແດງຄວາມຍ້ອງຍໍຊົມເຊີຍທີ່ໄດ້ຈັດງານບຸນກິນຈຽງຂຶ້ນ ແລະ ເພື່ອເປັນການອະນຸລັກເສີມຂະຫຍາຍຮີດຄອງປະເພນີອັນດີງາມຂອງເຜົ່າກໍຄືຂອງຊາດຂອງ, ເພື່ອເປັນຂະບວນການຂໍ່ານັບຮັບຕ້ອນ ວັນທີ 2 ທັນວາຄົບຮອບ 42 ປີ ແລະ ຂໍ່ານັບຮັບຕ້ອນປີທ່ອງທ່ຽວລາວ 2018 ແລະ ທ່ານຍັງໄດ້ໃຫ້ຮູ້ຕື່ມວ່າ: ຕະຫຼອດໄລຍະຜ່ານມາປະຊາຊົນລາວບັນດາເຜົ່າໄດ້ຮ່ວມແຮງຮ່ວມໃຈ ມີຄວາມສາມັກຄີເປັນປຶກແຜ່ນແໜ້ນໜາຈົນສາມາດຍາດໄດ້ໄຊຊະນະອັນຍິ່ງໃຫຍ່ໃນປີ 1975 ແລະ ພວກເຮົາຕ້ອງສືບຕໍ່ເອົາໃຈໃສ່ໃນການປົກປັກຮັກສາ ແລະ ສ້າງສາພັດທະນາປະເທດຊາດ, ເອົາໃຈໃສ່ໃນການສ້າງສາພັດທະນາເສດຖະກິດ-ສັງຄົມ ແກ້ໄຂຄວາມທຸກຍາກໃຫ້ຫຼຸດພົ້ນອອກຈາກຄວາມດ້ວຍພັດທະນາ ໃນປີ 2020.

info@lfnd.org.la | 021 213754 | (856-21) 453191