ສູນກາງແນວລາວສ້າງຊາດ

Lao Front For National Development

ທ່ານຮອງປະທານ ສນຊ ໄປຢ້ຽມຢາມ ແລະ ພົບປະໂອ້ລົມປະຊາຊົນ ຢູ່ຕາມເຂດຊາຍແດນ

ທ່ານ ເຍ່ຍເກີຢ່າ ໜໍ່ຈໍຈົງຕົວ ຄະນະປະຈໍາ, ຮອງປະທານ ສູນກາງແນວລາວສ້າງຊາດ (ສນຊ) ພ້ອມດ້ວຍຄະນະ ໄດ້ລົງຢ້ຽມຢາມ ແລະ ພົບປະໂອ້ລົມປະຊາຊົນ 4 ບ້ານຄື: ບ້ານ ນໍ້າຢ້າງ, ນາຍາງ, ວັງພຽງ, ນາຕັນ ເມືອງ ວຽງທອງ, ແຂວງ ບໍລິຄໍາໄຊ ໂດຍມີທ່ານ ລໍາສະໄໝ ວໍລະສານ ຄະນະປະຈໍາພັກແຂວງບໍລິຄໍາໄຊ, ປະທານແນວລາວສ້າງຊາດແຂວງ, ມີບັນດາທ່ານການນໍາເມືອງ, ບັນດາທ່ານອໍານາດການປົກຄອງບ້ານ ແລະພໍ່ແມ່ປະຊາຊົນໃຫ້ການຕ້ອນຮັບຢ່າງອົບອຸ່ນ; ໃນລະຫວ່າງວັນທີ 12-16 ກຸມພາ 2018;

ທ່ານ ສົນໃຈ ຊົງລ່າຫວ່າງ ຮອງເລຂາພັກເມືອງ ວຽງທອງ, ປະທານແນວລາວສ້າງຊາດເມືອງ ໄດ້ລາຍງານໂດຍຫຍໍ້ກ່ຽວກັບການເຄື່ອນໄຫວໃນໄລຍະຜ່ານມາໃຫ້ທ່ານຮອງປະທານ ສນຊ ໄດ້ຮັບຊາບວ່າ: ເຊິ່ງຕະຫຼອດໄລຍະຜ່ານມາແນວລາວສ້າງຊາດເມືອງພວກເຮົາ ໄດ້ເອົາໃຈໃສ່ສຶກສາອົບຮົມ ການເມືອງ-ແນວຄິດ ໃຫ້ພະນັກງານສະມາຊິກພັກ, ປະຊາຊົນລາວບັນດາເຜົ່າ, ຊັ້ນຄົນ, ສາສະໜາ ແລະ ເພດ-ໄວ, ໃຫ້ມີຄວາມເຂົ້າໃນຕໍ່ແນວທາງນະໂຍບາຍຂອງພັກ, ກົດໝາຍຂອງລັດຢ່າງເລິກເຊິ່ງ ເຮັດໃຫ້ປະຊາຊົນບັນດາເຜົ່າມີຄວາມສາມັກຄີເປັນປຶກແຜ່ນແໜ້ນໜາ, ເຮັດໃຫ້ສັງຄົມມີຄວາມສະຫງົບໂດຍພື້ນຖານ. ໄດ້ປຸກລະດົມ ຂົນຂວາຍປະຊາຊົນບັນດາເຜົ່າເຂົ້າຮ່ວມ ຂະບວນການຕ່າງໆຂອງຊາດ ໂດຍສະເພາະແມ່ນ ໄດ້ເອົາໃຈໃສ່ສຶກສາອົບຮົມໃຫ້ປະຊາຊົນ ປຸກຝັງ-ລ້ຽງສັດເປັນສິນຄ້າໃຫ້ມີລາຍໄດ້ແກ່ຄອບຄົວ, ເຮັດໃຫ້ຊີວິດການຢູ່ຂອງປະຊາຊົນນັບມື້ນັບດີຂຶ້ນ;

ພ້ອມກັນນີ້, ທ່ານ ລໍາສະໄໝ ວໍລະສານ ໄດ້ເນັ້ນບາງເນື້ອໃນຕື່ມວ່າ: ໃຫ້ແນວລາວສ້າງເມືອງ ແລະ ອງົການປົກຄອງບ້ານເອົາໃຈໃສ່ສຶກສາອົບຮົມປະຊາຊົນທີ່ຢູ່ຕາມຊາຍແດນ ລາວ-ຫວຽດນາມ ໃຫ້ສືບຕໍ່ພົວພັນຮ່ວມມືແບບພິ ເສດ ແລະ ໃຫ້ເອົາໃຈໃສ່ຕໍ່ບັນຫາການຍົກຍ້າຍໄປມາຫາສູ່ກັນຂອງປະຊາຊົນຢູ່ໃນເຂດດັ່ງກ່າວ ໂດຍສະເພາະບັນຫາການແຕ່ງດອງ, ການຍົກຍ້າຍ ລະຫວ່າງ ປະຊາຊົນ ລາວ-ຫວຽດນາມ ໃຫ້ປະຕິບັດຕາມລະບຽບກົດໝາຍຂອງບ້ານເມືອງຢ່າງເຂັ້ມງວດ;

ໃນໂອກາດນີ້, ທ່ານ ຮອງປະທານ ສນຊ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ພ້ອມກັນນີ້, ທ່ານຍັງໄດ້ເນັ້ນໜັກໃຫ້ປະຊາຊົນລາວບັນດາເຜົ່າ, ທຸກສາສະໜາ ໂດຍສະເພາະແມ່ນແນວລາວສ້າງຊາດຢູ່ຂັ້ນເມືອງ ແລະ ບ້ານ ຈົ່ງພ້ອມກັນເປັນເຈົ້າການໃນການສຶກສາອົບຮົມການເມືອງແນວຄິດ, ປຸກລະດົມຂົນຂວາຍໃຫ້ບັນດາ ເຜົ່າ, ທຸກສາສະໜາ ແລະ ເພດ-ໄວ ເຂົ້າຮ່ວມຂະບວນການຕ່າງໆຂອງຊາດ ເພື່ອເຮັດໃຫ້ສັງຄົມມີຄວາມສາມັກຄີປອງດອງກັນ ແລະ ຍັງໄດ້ຮຽກຮ້ອງໃຫ້ບັນດາເຜົ່າ, ສາສະໜາ ພ້ອມກັນເຄື່ອນໄຫວໃຫ້ຖືກຕ້ອງສອດຄ່ອງຕາມແນວທາງນະໂຍ ບາຍຂອງພັກ, ລະບຽບກົດໝາຍຂອງລັດ ຈົ່ງພ້ອມກັນເອົາໃຈໃສ່ມີສະຕິລະວັງຕົວຕໍ່ການເຄື່ອນໄຫວຂອງກຸ່ມຄົນບໍ່ຫວັງດີສວຍໃຊ້ ເຜົ່າ-ສາສະໜາ ເພື່ອແບ່ງແຍກຄວາມສາມັກຄີພາຍໃນ, ໃຫ້ເອົາໃຈໃສ່ຕໍ່ຄວາມ​ສະ​ເໝີ​ພາບ​ລະຫວ່າງ ​ຍິງ-​ຊາຍ ໂດຍສະເພາະແມ່ນແມ່ຍິງຊົນເຜົ່າທີ່ຢູ່ໃນເຂດຊົນນະບົດ ແລະ ສືບຕໍ່ຊຸກຍູ້ດ້ານເສດຖະກິດການປູກຝັງ, ການລ້ຽງສັດ, ການອະນຸລັກວັດທະນະທໍາ, ຮີດຄອງປະເພນີອັນດີງາມຂອງເຜົ່າ, ເອົາໃຈໃສ່ຕໍ່ວຽກງານສາທາລະນະສຸກ ແລະ ການສຶກສາ ເພື່ອເຮັດໃຫ້ຊີວິດການເປັນຢູ່ຂອງປະຊາຊົົນດີຂື້ນເທື່ອລະກ້າວ. ພ້ອມກັນນີ້, ທ່ານ ຍັງໄດ້ນໍາຜ້າຫົ່ມ, ວາລະສານ, ໜັງສືພິມ (ສາມັກຄີພັດທະນາ) ຈໍານວນໜຶ່ງ ມາມອບໃຫ້ແກ່ປະຊາຊົນຜູ້ທີ່ທຸກຍາກຂາດເຂີນໄດ້ນໍາໄປໃຊ້ໃນຄອບຄົວ ຕື່ມອີກ.

info@lfnd.org.la | 021 213754 | (856-21) 453191