ສູນກາງແນວລາວສ້າງຊາດ

Lao Front For National Development

ທ່ານ ຄຳໃບ ດຳລັດ ເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງໄຊສົມບູນ, ແຂວງບໍລິຄຳໄຊ ແລະ ແຂວງຄຳມ່ວນ

ວັນທີ 10-14 ມີຖຸນາ 2019 ນີ້, ທ່ານ ຄຳໃບ ດຳລັດ ກຳມະການສູນກາງພັກ ຮອງປະທານສູນ ກາງແນວລາວສ້າງຊາດ ພ້ອມດ້ວຍຄະນະໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມຄະນະພັກ, ຄະນະນຳ ແລະ ພະນັກງານຫຼັກແຫຼ່ງຢູ່ເມືອງທ່າໂທມ ແຂວງໄຊສົມບູນ, ເມືອງຄຳເກີດ ແຂວງບໍລິຄຳໄຊ ແລະ ເມືອງນາກາຍ, ເມືອງຍົມມະລາດ ແຂວງຄໍາມ່ວນ.

ສຳລັບການໂອ້ລົມ ຂອງທ່ານ ຮອງປະທານ ສນຊ ຢູ່ເມືອງທ່າໂທມ ແຂວງໄຊສົມບູນ ເປັນກຽດເຂົ້າ ຮ່ວມ ຂອງທ່ານ ເລັ່ງຊົ່ງ ຕົ່ງສີ ກຳມະການພັກແຂວງ ປະທານແນວລາວສ້າງຊາດແຂວງໄຊສົມບູນ, ທ່ານ ພີມພາ ນິລະວົງ ກໍາມະການພັກແຂວງ ເຈົ້າເມືອງໆທ່າໂທມ, ມີບັນດາທ່ານພະນັກງານຫຼັກແຫຼ່ງຈາກບັນດາ ຫ້ອງການອ້ອມຂ້າງເມືອງ ແລະ ຜູ້ຊົງຄຸນວຸດທິບັນດາຊົນເຜົ່າເຂົ້າຮ່ວມ. ໃນນີ້, ທ່ານເລຂາພັກເມືອງ ເຈົ້າເມືອງໆທ່າໂທມໄດ້ລາຍງານສະພາບລວມ ຂອງເມືອງເຊິ່ງທ່ານໄດ້ຍົກໃຫ້ເຫັນວ່າ: ເມືອງທ່າໂທມ ເປັນ 1 ໃນ 5 ເມືອງ ຂອງແຂວງໄຊສົມບູນ, ທ່າແຮງຕົ້ນຕໍຂອງເມືອງແມ່ນ ເຮັດນາ ແລະ ລ້ຽງສັດໃຫຍ່ເປັນອາຊິບຕົ້ນຕໍ. ຜ່ານການຊີ້ນຳໆພາ ຂອງອົງຄະນະພັກແຂວງ, ອົງຄະນະພັກ ເມືອງຕໍ່ກັບປະຊາຊົນບັນດາຊົນເຜົ່າເປັນຕົ້ນແມ່ນ ໄດ້ຖືການສຶກສາອົບຮົມການເມືອງແນວຄິດໃນການປຸກລະດົມປະຊາຊົນລາວບັນດາເຜົ່າເຂົ້າຮ່ວມຂະບວນການທີ່ສຳຄັນ ຂອງຊາດເປັນຕົ້ນແມ່ນການປົກປັກຮັກສາ ແລະ ສ້າງສາພັດທະນາປະເທດຊາດ ມາຮອດປະຈຸບັນນີ້, ເຫັນວ່າໃນການພັດທະນາຊີວິດ ຂອງປະຊາຊົນ ບັນດາເຜົ່ານັບມື້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງເຮັດໃຫ້ຄອບຄົວທຸກຍາກນັບມື້ລຸດນ້ອຍຖອຍລົງເປັນກ້າວໆ.
ສ່ວນການໂອ້ລົມຢູ່ເມືອງຄຳເກີດ ແຂວງບໍລິຄຳໄຊ ເປັນກຽດເຂົ້າຮ່ວມມີທ່ານ ລຳສະໄໝ ວໍລະສານ ຄະນະປະຈຳພັກແຂວງ ປະທານແນວລາວສ້າງຊາດແຂວງບໍລິຄຳໄຊ, ມີທ່ານ ວັນວິໄລ ແດນພູຫຼວງ ກຳມະການພັກແຂວງ ເລຂາພັກເມືອງ ເຈົ້າເມືອງໆ ຄຳເກີດ, ມີພະນັກງານຫຼັກແຫຼ່ງອ້ອມຂ້າງເມືອງ ພ້ອມດ້ວຍຜູ້ ຊົງຄຸນວຸດທິ, ແນວລາວສ້າງຊາດບ້ານເຂົ້າຮ່ວມ. ທ່ານວັນວິໄລ ແດນພູຫຼວງ ເລຂາພັກເມືອງ ເຈົ້າເມືອງໆຄຳເກີດ ໄດ້ລາຍງານສະພາບລວມໂດຍຫຍໍ້ ຂອງເມືອງ ເຊິ່ງທ່ານກ່າວວ່າ: ເມືອງຄຳເກີດປະກອບມີ 8 ກຸ່ມບ້ານພັດທະນາ, ມີ 62 ບ້ານ, ມີ 12.518 ຄອບຄົວ, ມີ 14 ຊົນເຜົ່າ, ອາຊີບຕົ້ນຕໍແມ່ນຖືເອົາການຜະລິດກະສິກຳກວມ 96% , ການຄ້າກວມ 0,7%, ພະນັກງານລັດ1,8% ແລະກຳມະກອນກວມ 0,35% . ມາຮອດປະຈຸບັນຍັງມີຄອບຄົວທຸກຍາກ 429 ຄອບຄົວ. ຫຼັງຈາກນີ້ທ່ານ ຮອງປະທານ ສນຊ ພ້ອມດ້ວຍຄະນະກໍ່ໄດ້ສືບຕໍ່ເຄືອນໄຫວພົບປະພະນັກງານຫຼັກແຫຼ່ງ ຢູ່ເມືອງນາກາຍ ແລະ ເມືອງຍົມມະລາດ ແຂວງຄຳມ່ວນ. ຊິ່ງໄດ້ເປັນກຽດຕ້ອນຮັບຢ່າງອົບອຸ່ນຈາກຄະນະພັກ, ຄະນະນຳ ຂອງສອງເມືອງດັ່ງກ່າວ. ໃນນີ້, ທ່ານ ຮອງປະທານ ສນຊ ກໍ່ເປັນກຽດໂອ້ລົມຕໍ່ຄະນະພັກ, ຄະນະນຳ, ພະນັກງານ, ຜູ້ຊົງຄຸນວຸດທິບັນດາຊົນເຜົ່າ ຂອງເມືອງນາກາຍ ແລະ ເມືອງຍົມມະລາດ ຊຶ່ງສອງເມືອງດັ່ງກ່າວກໍ່ໄດ້ລາຍງານສະພາບ ແລະ ຈຸດພິເສດລວມ ຂອງສອງເມືອງ ດັ່ງກ່າວໄດ້ຮັບຊາບ:
ຜ່ານການເຄື່ອນໄຫວຢ້ຽມຢາມພົບປະພະນັກງານຫຼັກແຫຼ່ງ, ຜູ້ຊົງຄຸນວຸດທິ ສາມແຂວງດັ່ງກ່າວ. ກ່ອນອື່ນທ່ານ ຄຳໃບ ດຳລັດ ກຳມະການສູນກາງພັກ ຮອງປະທານສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຊີ້ນຳນຳໆພາ ຂອງອົງຄະນະພັກ, ຄະນະນຳ ເວົ້າລວມ ເວົ້າສະເພາະ ແມ່ນຜົນງານ ຂອງປະຊາຊົນບັນດາຊົນເຜົ່າທີຍາດມາໄດ້ໃນໄລຍະທີຜ່ານມາ. ພ້ອມກັນນີ້, ທ່ານຮອງປະທານ ສນຊ ກໍ່ໄດ້ຍົກໃຫ້ເຫັນໄດ້ຜົນສໍາເລັດກອງປະຊຸມຜູ້ຊົງຄຸນວຸດທິທົ່ວປະເທດຄັ້ງທີ III , ເຜີຍແຜ່ຊື່ເອີ້ນ ຂອງຊົນເຜົ່າບຣູ ແລະ ຫວນຄືນມູນເຊື້ອອັນສະຫງ່າລາສີ ຂອງອົງການແນວລາວສ້າງຊາດ ໂດຍສະເພາະແມ່ນປຸກລະດົມແນວຄິດ ຂອງປະຊາຊົນບັນດາຊົນເຜົ່າຮັກສາມູນເຊື້ອສາມັກຄີຕິດພັນກັບການ ສ້າງຄອບຄົວ ແລະ ບ້ານສາມັກຄີ ສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດເຮັດໃຫ້ສັງຄົມ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ສືບຕໍ່ປຸກລະດົມ ປະຊາຊົນລາວບັນດາເຜົ່າ ຜະລິດເປັນສິນຄ້າແກ້ໄຂຄວາມທຸກຍາກເພື່ອແນໃສ່ເຮັດໃຫ້ຄອບຄົວ, ບ້ານທີຍັງທຸກຍາກຢູ່ເມືອງທ່າໂທມ ແຂວງໄຊສົມບູນ, ເມືອງຄຳເກີດ ແຂວງບໍລິຄຳໄຊ ແລະ ເມືອງນາກາຍ, ເມືອງຍົມມະລາດ ແຂວງ ຄຳມ່ວນ ນັບມື້ລຸດນ້ອຍຖອຍລົງເປັນກ້າວໆ.

info@lfnd.org.la | 021 213754 | (856-21) 453191