ທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະ ໂດຍມີທ່ານ ນາງ ແສງດາວ ບຸພະກອນຄໍາ ຮອງປະທານກຸ່ມບໍລິສັດພົງສະຫວັນ ໄດ້ລົງເຄື່ອນໄຫວຢ້ຽມຢາມ, ຊຸກຍູ້ວຽກງານໂຄສະນາ ແລະ ວຽກງານການສ້າງກອງທຶນສາມັກຄີ ຂອງແນວລາວສ້າງຊາດ ຢູ່ເມືອງ ໄຊພູທອງ ແລະ ເມືອງ ຈໍາພອນ ແຂວງສະຫວັນນະເຂດ. ຢູ່ເມືອງ ຈໍາພອນ ໄດ້ພົບປະກັບທ່ານຮອງເຈົ້າເມືອງ ພ້ອມດ້ວຍແນວລາວສ້າງຊາດ ແລະ ພະນັກງານຫ້ອງການຕ່າງໆຂອງເມືອງ ໃນວັນທີ 25 ສິງຫາ 2020 ທີ່ຫ້ອງການປົກຄອງເມືອງໄຊພູທອງໂດຍໄດ້ຮັບຟັງການລາຍງານສະພາບລວມໂດຍຫຍໍ້ຈາກທ່ານຮອງເລຂາພັກເມືອງ ເຊິ່ງເມືອງໄຊພູທອງມີ 40 ບ້ານ, ໃນນັ້ນມີ 5 ບ້ານໄດ້ສ້າງຕັ້ງກອງທຶນສາມັກຄີແລ້ວ ໂດຍໄດ້ເລີ່ມເຄື່ອນໄຫວມາແຕ່ທ້າຍປີ 2019, ອາຊີບຕົ້ນຕໍຂອງປະຊາຊົນແມ່ນເຮັດນາ.
ວັນທີ 26 ສິງຫາ 2020 ທ່ານຮອງປະທານ ສນຊ ພ້ອມດ້ວຍຄະນະ ໄດ້ສືບຕໍ່ຢ້ຽມຢາມສູນກະສິກໍາກອງທຶນສາມັກຄີແນວລາວສ້າງຊາດ ບ້ານດົງຄໍາໝື່ນ ເມືອງ ຈໍາພອນ ແຂວງ ສະຫວັນນະເຂດ ໂດຍໄດ້ຮັບການຕ້ອນຮັບຈາກ ທ່ານ ຄໍາລຸຍ ຍາດຕິວົງ ກໍໍາມະການພັກແຂວງ ເລຂາພັກເມືອງ ເຈົ້າເມືອງໆຈໍາພອນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ ໂດຍມີທ່ານ ສິນໄຊ ວົງລະຄອນ ຮອງປະທານແນວລາວສາ້ງຊາດແຂວງ ຕິດຕາມຄະນະ. ໃນໂອກາດລົງຢ້ຽມຢາມຄັ້ງນີ້ ໄດ້ຮັບຟັງການລາຍງານສະພາບເສດຖະກິດ-ສັງຄົມ ຂອງເມືອງຈໍາພອນ ແລະ ການເຄື່ອນໄຫວຂອງຄະນະກອງທຶນ ບ້ານ ດົງຄໍາໝື່ນ ເຊິ່ງຄະນະຮັບຜິດຊອບລາຍງານວ່າ: ບ້ານດົງຄໍາໜື່ນ ມີ 241 ຫລັງຄາເຮືອນ, ອາຊີບປະຊາຊົນສ່ວນຫຼາຍແມ່ນເຮັດນາ ແລະ ຄ້າຂາຍເປັນສໍາຮອງ, ກອງທຶນດັ່ງກ່າວໄດ້ສ້າງຕັ້ງຂຶ້ນ ໃນປີ 2019 ເຊິ່ງໄດ້ຮັບການຊຸກຍູ້ສົ່ງເສີມຈາກແນວລາວສ້າງຊາດຂັ້ນສູນກາງ, ແຂວງ ແລະ ກຸ່ມບໍລິສັດ ພົງສະຫວັນ ໄດ້ຮັບອະນຸມັດວົງເງິນທັງໝົດຈໍານວນ ໜຶ່ງຕື້ກີບໃນເບື້ອງຕົ້ນໃຫ້ກອງທຶນນໍາໄປພັດທະນາການຜະລິດເປັນສິນຄ້າ ເຊິ່ງມີດອກເບ້ຍ 0,88% ຕໍ່ເດືອນ ໄລຍະເວລາກູ້ຍືມແມ່ນອີງໃສ່ສະພາບຕົວຈິງ ມີໄລຍະສັ້ນ, ກາງ ແລະ ໄລຍະຍາວຕາມຄວາມສາມາດທີ່ເໝາະສົມ. ພາຍຫຼັງທີ່ໄດ້ຈັດຕັ້ງກອງທຶນຂຶ້ນກໍ່ໄດ້ປະຕິບັດຕາມເນື້ອໃນຂອງໂຄງການສ້າງຄອບຄົວ ແລະ ບ້ານສາມັກຄີປອງດອງຕິດພັນກັບການແກ້ໄຂຄວາມທຸກຍາກ, ຊຸກຍູ້ໃຫ້ປະຊາຊົນຜະລິດເປັນສິນ ຄ້າຕິດພັນກັບການທ່ອງທ່ຽວໃຫ້ນັບມື້ນັບຫຼາຍຂຶ້ນ ໂດຍສະເພາະແມ່ນ ສຸມໃສ່ການຜະລິດກະສິກໍາ, ການປູກເຂົ້າ, ປູກໝາກໄມ້ກິນໝາກ. ພ້ອມດຽວກັນນັ້ນ, ໃນສູນກະສິກໍາກອງທຶນສາມັກຄີແນວລາວສ້າງຊາດນີ້ໄດ້ສ້າງສິ່ງອໍານວຍຄວາມສະດວກຈໍານວນໜຶ່ງໃຫ້ແກ່ການຜະລິດ.
ທ່ານ ຈັນທະວົງ ແສນອາມາດມົນຕີ ໄດ້ສະແດງຄວາມຍ້ອງຍໍຊົມເຊີຍມາຍັງຄະນະນໍາເມືອງ, ຄະນະກອງທຶນ, ປະຊາຊົນພາຍໃນບ້ານ ທີ່ໄດ້ປະກອບສ່ວນອັນສຳຄັນເຂົ້າໃນການພັດທະນາ ເວົ້າລວມ, ເວົ້າສະເພາະ ກໍຄືການຊຸກຍູ້, ສົ່ງເສີມໃນສ້າງລາຍຮັບໃຫ້ປະຊາຊົນ ໂດຍການປູກ, ການລ້ຽງສັດ, ການຜະລິດກະສິກໍາເປັນສິນຄ້າ ເພື່ອແກ້ໄຂຊິວິດການເປັນຢູ່ໃຫ້ນັບມື້ນັບດີຂຶ້ນ; ພ້ອມນັ້ນ, ທ່ານຮອງປະທານ ໄດ້ເນັັ້ນໜັກໃຫ້ຄະນໍາເມືອງ-ບ້ານ ເອົາໃຈໃສ່ໃນການສຶກສາອົບຮົມເຕົ້າໂຮມຄວາມສາມັກຄີພາຍໃນຄະນະກອງທຶນ ຕະຫຼອດເຖິງປະຊາຊົນບັນດາເຜົ່າພາຍໃນບ້ານໃຫ້ມີຄວາມສາມັກຄີເປັນປຶກແຜນປະກອບສ່ວນເຂົ້າໃນການຈັດຕັ້ງປະຕິບັດໂຄງການໃຫ້ດີທີ່ສຸດ; ພ້ອມດຽວກັນນັ້ນ, ໃຫ້ຈັດມີການຝຶກອົບຮົມໃຫ້ປະຊາຊົນທາງດ້ານຄວາມຮູ້, ດ້ານເຕັກນິກການປູກ-ການລ້ຽງ, ການສ້າງອາຊີບທີໜັ້ນຄົງ ແລະ ການສ້າງລາຍຮັບໃຫ້ແກ່ຄອບຄົວ; ເພື່ອພ້ອມກັນຫຼຸດພົ້ນອອກຈາກຄວາມທຸກຍາກເທື່ອລະກ້າວ. ຫລັງຈາກນັ້ນ, ທ່ານຮອງປະທານ ສນຊ ພ້ອມຄະນະ ກໍ່ໄດ້ຢ້ຽມຢາມກິດຈະກໍາຕ່າງໆໃນໂຄງການຕື່ມອີກ.
