ສູນກາງແນວລາວສ້າງຊາດ

Lao Front For National Development

ທ່ານ ປະທານສູນກາງແນວລາວສ້າງຊາດ ພົບປະຢ້ຽມຢາມກຸ່ມບ້ານຈຽງຕູບ ເມືອງເຊໂປນ, ແຂວງສະຫວັນນະເຂດ

     ໃນລະຫວ່າງວັນທີ 15-16 ກຸມພາ 2024 ຜ່ານມານີ້, ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະຈາກສູນກາງແນວລາວສ້າງຊາດ ແລະ ຈາກກະຊວງປ້ອງກັນປະເທດ ໄດ້ລົງພົບປະຢ້ຽມຢາມກຸ່ມບ້ານຈຽງຕູບ ເມືອງເຊໂປນ ແຂວງສະຫວັນນະເຂດ ໂດຍການຕ້ອນຮັບຂອງ ທ່ານ ບຸນໂຈມ ອຸບົນປະເສີດ ເຈົ້້າແຂວງສະຫວັນນະເຂດ ພ້ອມດ້ວຍການນໍາຂອງແຂວງ ແລະ ເມືອງ.
     ກຸ່ມບ້ານຈຽງຕູບຕັ້ງຢູ່ທິດຕາເວັນອອກສຽງເໜືອຂອງເມືອງເຊໂປນ ມີເນື້ອທີ່ປະມານ 21,000 ເຮັກຕາ, ຕິດກັບແຂວງກວາງບິງ ແລະ ແຂວງກວາງຈິງ ສສ ຫວຽດນາມ, ແຂວງຄໍາມ່ວນ, ຈຸດສຸມລະໂກ, ຈຸດສຸມຜາບັງ ແລະ ເມືອງວິລະບູລີ. ຜ່ານການລາຍງານຂອງແຂວງ, ເມືອງ ແລະ ກຸ່ມບ້ານ ເຫັນວ່າປະຊາຊົນທີ່ອາໄສຢູ່ເຂດດັ່ງກ່າວ ແມ່ນຊົນເຜົ່າຕຣີ 100%, ເຊື່ອຖືຜີ, ເຄີຍມີມູນເຊື້ອດຸໝັ່ນມາແຕ່ດຶກດໍາບັນ, ອາຊີບສ່ວນໃຫຍ່ແມ່ນຖ່າງປ່າເຮັດໄຮ່, ປູກຝັງ-ລ້ຽງສັດ ຕາມລະດູການ. ສໍາລັບໂຄງການລົງທຶນທີ່ສຸ່ມໃສ່ ແລະ ຈະຈັດຕັ້ງປະຕິບັດໃນປີ 2024 ມີທັງໝົດ 11 ໂຄງການ, ມູນຄ່າ 50,580 ຕື້ກວ່າກີບ ໂດຍ ນໍາໃຊ້ 5 ບ້ວງທຶນເຂົ້າໃນການພັດທະນາໂຄງການ.
     ໂອກາດດັ່ງກ່າວ ທ່ານປະທານສູນກາງແນວລາວສ້າງຊາດ ໄດ້ສະແດງຄວາມຊົມເຊີຍຕໍ່ການນໍາທຸກຂັ້ນທີ່ໄດ້ນໍາພາ-ຊີ້ນໍາ ພັດທະນາຈຸດສຸມຈຽງຕູບ ທີ່ພວມມີໃບໜ້າໃໝ່, ພ້ອມກັບຄວາມເຫັນຊຸກຍູ້ບາງດ້ານຄື: + ການພັດທະນາແມ່ນໃຫ້ຍັບເຂົ້້າຫາກັນ, ໃກ້ໆກັນ, ບໍ່ຄວນກວ້າງ ແລະ ຫາງກັນຫຼາຍ (ໂຮງໝໍ, ໂຮງຮຽນ, ຕະຫຼາດ, ສໍານັກງານ ອື່ນໆ…); + ສ້າງໂອກາດ, ເງື່ອນໄຂ ແລະ ອໍານວຍຄວາມສະດວກໃຫ້ຜູ້ລົງທຶນເຂົ້າມາລົງທຶນ ເພື່ອຍູ້ແຮງການພັດທະນາພື້ນຖານໂຄງລ່າງໂດຍໄວ ແລະ ໃຫ້ເອົາໃຈໃສ່ດ້ານການທ່ອງທ່ຽວ; + ເຫັນດີທີ່ສຸດໃນການຖືສໍາຄັນດ້ານການສຶກສາ ເພື່ອໃຫ້ລູກຫຼານຂອງພວກເຮົາ ແລະ ຜູ້ປົກຄອງທີ່ບໍ່ຮູ້ໜັງສືໄດ້ຮັບໂອກາດຮໍ່າຮຽນ… ນອກຈາກນັ້ນ, ທ່ານປະທານສູນກາງແນວລາວສ້າງຊາດພ້ອມດ້ວຍຄະນະຍັງໄດ້ພົບປະຢ້ຽມຢາມ ແລະ ຊຸກຍູ້ວຽກງານແນວລາວສ້າງຊາດເມືອງວິລະບູລີ ແຂວງສະ ຫວັນນະເຂດ ແລະ ເມືອງບົວລະພາ ແຂວງຄໍາມ່ວນ ອີກດ້ວຍ.
 
info@lfnd.org.la | 021 213754 | (856-21) 453191