ສູນກາງແນວລາວສ້າງຊາດ

Lao Front For National Development

ທ່ານ ຫົວໜ້າກົມໂຄສະນາ-ອົບຮົມ ສນຊ ເຄື່ອນໄຫວຊຸກຍູ້ວຽກງານການສ້າງບ້ານ ແລະ ຄອບຄົວສາມັກຄີປອງດອງ ຢູ່ 4 ແຂວງພາກເໜືອ

ວັນທີ 25 ກຸມພາ-2 ມີນາ 2018, ທ່ານ ແກ້ວຈະເລີນ ເຊ່ຍຢີ້ງຢ່າງ ຄະນະພັກ, ຄະນະປະຈຳ, ຫົວໜ້າກົມໂຄສະນາ-ອົບຮົມ ສູນກາງແນວລາວສ້າງຊາດ (ສນຊ) ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ 4 ແຂວງພາກເໜືອ, ໂດຍໄດ້ເຂົ້າຮ່ວມກອງປະຊຸມຝຶກອົບຮົມວຽກງານການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກ ໃຫ້ພະນັກງານຫຼັກແຫຼ່ງແນວລາວສ້າງຊາດ ແຂວງຫຼວງນ້ຳທາ ແລະ ບັນດາເມືອງອ້ອມຂ້າງ ພາຍໃນແຂວງຫຼວງນ້ຳທາ;

ທ່ານ ບຸນລີວັນ ຮອງປະທານ ແນວລາວສ້າງຊາດແຂວງ ໄດ້ຍົກໃຫ້ເຫັນວຽກງານການສ້າງຄອບຄົວ ແລະ ບ້ານສາມັກຄີປອງດອງ ແມ່ນການຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ ແລະ ແຜນພັດທະນາເສດຖະກິດ-ສັງຄົມຂອງລັດ; ໃນການປຸກລະດົມກຳລັງແຮງທົ່ວປວງຊົນເຂົ້າຮ່ວມໃນການປະຕິບັດສອງໜ້າທີ່ຍຸດທະສາດ; ຄວາມສາມັກ, ມະຫາສາມັກຄີຍາມໃດກໍເປັນກໍາລັງແຮງອັນໜຶ່ງອັນດຽວຂອງທົ່ວປວງຊົນ, ເປັນກຳລັງແຮງຕັດສິນໄຊຊະນະຂອງການປະຕິວັດ ແລະ ຜົນສຳເລັດຂອງທຸກວຽກງານ. ປະຈຸບັນວຽກງານການສ້າງຄວາມສາມັກຄີປອງດອງ ເປັນວຽກງານໜຶ່ງທີ່ມີຄວາມໝາຍສຳຄັນຂອງວຽກງານແນວລາວສ້າງຊາດ. ຫຼັງຈາກນັ້ນ, ທ່ານ ຫົວໜ້າກົມໂຄສະນາ-ອົບຮົມ ສນຊ ໄດ້ເຜີຍແຜ່ເອກະສານການສ້າງຄອບຄົວ ແລະ ບ້ານສາມັກຄີປອງດອງ ເປັນຕົ້ນແມ່ນ: ຂໍ້ຕົກລົງຂອງຄະນະກຳມະການ ສນຊ ວ່າດ້ວຍມາດຕະຖານຄອບຄົວ ແລະ ບ້ານສາມັກຄີປອງດອງ ສະບັບເລກທີ 127/ສນຊ ລົງວັນທີ 19/04/2017, ຄຳແນະນຳຂອງຄະນະປະຈຳ ສນຊ ວ່າດ້ວຍການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ (2017-2020) ສະບັບເລກທີ 033/ຄປຈ.ສນຊ ລົງວັນທີ 19/04/2017, ຄຸນລັກສະນະສິລະປະໃນການປາກເວົ້າຂອງນັກປາຖະກະຖາ ແລະ ໄດ້ມີການປະກອບຄຳຄິດຄຳເຫັນ ເພື່ອແລກປ່ຽນບົດຮຽນຂອງວຽກງານດັ່ງກ່າວເຮັດໃຫ້ພະນັກງານທີ່ໄດ້ເຂົ້າຮ່ວມໄດ້ຮັບຮູ້-ເຂົ້າໃຈ, ເຊື່ອມຊຶມ, ກຳແໜ້ນເນື້ອໃນຈິດໃຈຂອງກອງປະຊຸມໃນຄັ້ງນີ້ຢ່າງເລິກເຊິ່ງ;

ພ້ອມກັນນີ້, ທ່ານ ແກ້ວຈະເລີນ ເຊ່ຍຢີ້ງຢ່າງ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເກັບກຳສະຖິຕິຈຳນວນຄອບຄົວ ແລະ ບ້ານສາມັກຄີປອງດອງ ນຳແນວລາວລາວສ້າງຊາດ ແຂວງບໍ່ແກ້ວ, ແຂວງອຸດົມໄຊ ແລະ ແນວລາວສ້າງຊາດ ແຂວງຫຼວງພະບາງ ຕື່ມອີກ.

info@lfnd.org.la | 021 213754 | (856-21) 453191