ສູນກາງແນວລາວສ້າງຊາດ

Lao Front For National Development

ທ່ານ ຮສ ດຣ ສົມອົກ ກິ່ງສະດາ ລົງເຄື່ອນໄຫວວຽກງານ ກ່ຽວກັບການສ້າງຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດ

ວັນທີ 7-8 ເມສາ 2018, ທ່ານ ຮສ ດຣ ສົມອົກ ກິ່ງສະດາ ຄະນະພັກ, ຮອງປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະ ໄດ້ລົງເຄື່ອນໄຫວວຽກງານຢູ່ແຂວງໄຊຍະບຸລີ ໂດຍໄດ້ເຂົ້າຮ່ວມການຕີລາຄາ ແລະ ການປະເມີນເມືອງເງິນ ເປັນເມືອງສາມັກຄີປອງດອງຂອງແນວລາວສ້າງຊາດ ຕິດພັນກັບ 3 ສ້າງ;

ເຊິ່ງໄດ້ຮັບຟັງການລາຍງານຈາກທ່ານ ສົມບັດ ຈະເລີນມີໄຊ ຮອງປະທານແນວລາວສ້າງຊາດແຂວງໄຊຍະບູລີ ກ່ຽວກັບການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຢູ່ແຂວງ ເຊິ່ງແຂວງໄຊຍະບູລີ ໄດ້ຈັດຕັ້ງປະຕິບັດໂຄງການພັດທະນາກ້ອນກຳລັງມະຫາສາມັກຄີມາແຕ່ປີ 2004 ໂດຍແບ່ງອອກເປັນ 3 ໄລຍະ, ແຕ່ສໍາລັບໄລຍະທີ 3 ແມ່ນຈັດຕັ້ງປະຕິບັດນັບແຕ່ມີນິຕິກຳ 2 ສະ ບັບຂອງສູນກາງແນວລາວສ້າງຊາດ ວາງອອກຄື: ຂໍ້ຕົກລົງວ່າດ້ວຍມາດຕະຖານຄອບຄົວ ແລະ ບ້ານສາ ມັກຄີປອງດອງ ເລກທີ 127/ສນຊ ລົງວັນທີ 19 ເມສາ 2017 ແລະ ຄໍາແນະນຳ ວ່າດ້ວຍການຈັດຕັ້ງປະຕິບັດ ສະບັບເລກທີ 033/ຄປຈ.ສນຊ ລົງວັນທີ 19 ເມສາ 2017. ຈາກນັ້ນ, ໄດ້ຮັບຟັງການລາຍງານຈາກທ່ານ ບຸນຕັນ ມາສຸວັນ ກໍາມະການພັກເມືອງ ປະທານແນວລາວສ້າງຊາດ ເມືອງເງິນ.
ເມືອງ ເງິນ ປະກອບມີ 22 ບ້ານ, ມີ 7 ຊົນເຜົ່າອາໄສຢູ່ຮ່ວມກັນຄື: ເຜົ່າລາວກວມ 6,14%, ເຜົ່າລື້ກວມ 34,1%, ເຜົ່າກຶມມຸກວມ 31,9%, ເຜົ່າມົ້ງກວມ 27,15%, ເຜົ່າໄປຼ ແລະ ເຜົ່າໄທດຳ ເຜົ່າລະ 0,05% ສ່ວນເຜົ່າຍວນກວມ 0,01% ເມືອງເງິນ ມີລະບົບພື້ນຖານໂຄງລ່າງຄົບຊຸດ (ໂຮງຮຽນ, ໂຮງໝໍ, ໄຟຟ້າ, ນ້ຳປະປາ, ລະບົບໂທລະຄົມບການສື່ສານ, ມີເສັ້ນທາງຫລວງຈາກແຂວງຫາເມືອງ ແລະ ອອກສູ່ຕ່າງປະເທດ ສາມາດທຽວໄດ້ຕະຫລອດປີ) ມີດ່ານສາກົນໜຶ່ງແຫ່ງ, ລາຍໄດ້ສະເລ່ຍຕໍ່ຫົວຄົນຕໍ່ປີແມ່ນ 14,400,000ກ ເທົ່າກັບ 1,801 ໂດລາສະຫະລັດ. ການຈັດຕັ້ງປະຕິບັດວຽກງານສ້າງຄອບຄົວ ແລະ ບ້ານສາມັກຄີປອງດອງມາຮອດປະຈຸບັນ ເມືອງເງິນ ສາມາດປະເມີນ ຄອບຄົວເປັນຄອບຄົວສາມັກຄີປອງດອງ ຕາມມາດຕະຖານ ແລະ ຄຳແນະນຳສູນກາງແນວລາວສ້າງຊາດ ໄດ້ 3,026 ຄອບຄົວ ເທົ່າກັບ 90:42% ໂດຍໄດ້ມອບໃບຢັ້ງຢືນເຈົ້າເມືອງໃຫ້ແລ້ວ, ຍັງ 118 ຄອບຄົວ; ສ່ວນບ້ານແມ່ນປະເມີນໄດ້ 19 ບ້ານ ເທົ່າກັບ 86,36% ໃນນີ້ 17 ບ້ານແມ່ນໄດ້ມອບໃບຢັ້ງຢືນໃຫ້ແລ້ວ ແລະ ຍັງອີກ 2 ບ້ານກຳລັງສະເໜີຕໍ່ຂັ້ນເທິງ.


ຈາກນັ້ນທ່ານ ຮສ ດຣ ສົມອົກ ກິ່ງສະດາ ພ້ອມດ້ວຍຄະນະ ໂດຍມີທ່ານ ຄຳສຸກ ທໍ ຮອງເລຂາພັກແຂວງ ປະທານແນວລາວສ້າງຊາດແຂວງ ໄຊຍະບູລີ, ຄະນະພັກ-ຄະນະນຳຂອງເມືອງເງິນ ພ້ອມດ້ວຍຄະນະທຸກຂັ້ນທີ່ກ່ຽວຂ້ອງໄດ້ລົງພົບປະ ແລະ ຢ້ຽມຢາມແນວລາວສ້າງຊາດ, ອົງການປົກຄອງບ້ານ ແລະ ພໍ່ແມ່ປະຊາຊົນບ້ານນາງົວ ເຊິ່ງເປັນບ້ານພັດທະນາ ພ້ອມກັນນັ້ນ ຄະນະກໍໄດ້ເຂົ້າລາຍງານຈຸດປະສົງການມາເຮັດວຽກຄັ້ງນີ້ຕໍ່ທ່ານ ບຸນມີ ຈັນທິບ ເລຂາພັກເມືອງ ເຈົ້າເມືອງໆເງິນ ພ້ອມດ້ວຍຄະນະປະຈຳພັກເມືອງຕື່ມອີກ ​ແລະ ​ໄດ້​ໄປ​ຢ້ຽມຢາມ​ບໍລິສັດ ພີ​ພີ​ຈຳກັດ ​ເຊິ່ງ​ເປັນ​ບໍລິສັດ​ທີ່​ສາມາດ​ມີ​ນ້ຳມັນ​ເກັບ​ໄວ້​​ໃນແຕ່​ລະ​ມື້ 10 ລ້ານ​ລິດ ​ໂດຍ​ບໍລິສັດ​ດັ່ງ​ກ່າວ​ໄດ້​ປະກອບສ່ວນ​ເຂົ້າ​ໃນ​ການ​ພັດທະນາ​ເມືອງ​ເງິນ ​ແລະ ວຽກ​ງານ​ສ້າງ​ຄອບຄົວ ​ແລະ ບ້ານ​ສາມັກຄີ​ປອງ​ດອງ​ຂອງ​ແນວ​ລາວ​ສ້າງ​ຊາດ​ ຕື່ມ​ອີກ.

info@lfnd.org.la | 021 213754 | (856-21) 453191