ສູນກາງແນວລາວສ້າງຊາດ

Lao Front For National Development

ທ່ານ ຮອງປະທານຜູ້ປະຈຳການສູນກາງແນວລາວສ້າງຊາດ ເຂົ້າຮ່ວມພິທີເປີດງານວາງສະແດງຮູບພາບການເຄື່ອນໄຫວ ຂອງປະທານ ຄຳໄຕ ສີພັນດອນ

ໃນວັນທີ 7 ກຸມພາ 2024 ນີ້, ທີ່ຫໍພິພິທະພັນ ໄກສອນ ພົມວິຫານ, ນະຄອນຫຼວງວຽງຈັນ, ທ່ານ ຄຳໄຫຼ ສີປະເສີດ ກຳມະການສູນກາງພັກ, ຮອງປະທານຜູ້ປະຈຳການສູນກາງແນວລາວສ້າງຊາດ ໄດ້ເຂົ້າຮ່ວມພິທີເປີດງານວາງສະແດງຮູບພາບ ທີ່ຄະນະຮັບຜິດຊອບລະດັບຊາດໃນການສະເຫຼີມສະຫຼອງວັນເກີດ ປະທານ ຄໍາໄຕ ສີພັນດອນ ຄົບຮອບ 100 ປີ ໄດ້ຈັດຂຶ້ນ ເພື່ອວາງສະແດງຮູບພາບ, ເອກະສານ, ປື້ມ ແລະ ວັດຖຸພັນ ພາຍໃຕ້ຫົວຂໍ້: ຊີວິດ ແລະ ການເຄື່ອນໄຫວປະຕິວັດ ຂອງປະທານ ຄຳໄຕ ສີພັນດອນ ເນື່ອງໃນໂອກາດສະເຫຼີມສະຫຼອງວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ(ວັນທີ 08 ກຸມ 1924-08 ກຸມພາ 2024); ເຊິ່ງພິທີດັ່ງກ່າວເປັນກຽດເຂົ້າຮ່ວມມີທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ; ທ່ານ ຄໍາພັນ ເຜີຍຍະວົງ, ເລຂາທິການສູນກາງພັກ, ຫົວໜ້າຄະນະໂຄສະນາ-ອົບຮົມສູນກາງພັກ; ທ່ານ ນາງ ທອງວັນ ສີພັນດອນ ພັນລະຍາຂອງປະທານ ຄຳໄຕ ສີພັນດອນ ພ້ອມດ້ວຍລູກຫຼານ, ມີການນຳພັກ-ລັດ, ອະດີດການນຳພັກ-ລັດ ແລະ ພະນັກງານລັດຖະກອນ ຈາກກະຊວງ-ອົງການ ແລະ ນະຄອນຫຼວງວຽງຈັນ ເຂົ້າຮ່ວມ.

ທ່ານ ຄໍາພັນ ເຜີຍຍະວົງ ໄດ້ເປັນກຽດກ່າວເປີດພິທີ ເຊິ່ງທ່ານໄດ້ຍົກໃຫ້ເຫັນປະຫວັດການເຄື່ອນໄຫວໂດຍຫຍໍ້ ຂອງປະທານ ຄຳໄຕ ສີພັນດອນ ວ່າ: ປະທານ ຄຳໄຕ ສີພັນດອນ ແມ່ນຫນຶ່ງໃນບັນດາຜູ້ນຳຮຸ່ນທຳອິດຂອງການປະຕິວັດລາວ, ໄດ້ຮ່ວມກັບຜູ້ນຳຄົນອື່ນໆ ນໍາພາພາລະກິດການຕໍ່ສູ້ປົດປ່ອຍປະເທດຊາດອອກຈາກແອກປົກຄອງ ຂອງຈັກກະພັດຕ່າງດ້າວ ກໍ່ຄືພາລະກິດປົກປັກຮັກສາ ແລະ ສ້າງສາປະເທດຊາດ. ເພິ່ນເປັນຜູ້ນຳທີ່ມີນ້ຳໃຈຮັກຊາດອັນສູງສົ່ງ, ເສຍສະຫຼະທຸກສິ່ງທຸກຢ່າງອຸທິດສະຕິປັນຍາ ແລະ ກຳລັງວັງຊາຢ່າງບໍ່ຮູ້ອິດຮູ້ເມື່ອຍ ຄຽງບ່າຄຽງໄຫຼ່ກັບບັນດາທ່ານຜູ້ນຳຄົນອື່ນໆ ຈັດຕັ້ງນຳພາຂະບວນການປະຕິວັດ ເຮັດໃຫ້ສາມາດຍາດໄດ້ໄຊຊະນະຢ່າງຕໍ່ເນື່ອງ, ຍາດໄດ້ຜົນສຳເລັດຢ່າງມີໄຊ ແລະ ພາປະເທດຊາດກ້າວຂຶ້ນສູ່ຈຸດຫມາຍສັງຄົມນິຍົມເທື່ອລະກ້າວ ຢ່າງຫນັກແຫນ້ນ.

ການວາງສະແດງຮູບພາບປະກອບມີ 5 ພາກ ຄື: ພາກທີ 1 ບ້ານເກີດເມືອງນອນ, ໄລຍະເຍົາໄວ ແລະ ໄລຍະໄວໜຸ່ມ ຂອງປະທານ ຄຳໄຕ ສີພັນດອນ; ພາກທີ 2 ເຂົ້າຮ່ວມຂະບວນການຕໍ່ສູ້ ເພື່ອຄວາມເປັນເອກະລາດ ແລະ ອິດສະຫລະພາບ ຕ້ານກັບການຮຸກຮານ ຂອງລ່າເມືອງຂຶ້ນຝະລັ່ງ ແລະ ຂຸນເສີກຍີ່ປຸ່ນ; ພາກທີ 3 ການປະກອບສ່ວນນໍາພາການປະຕິວັດຊາດ ປະຊາທິປະໄຕ ໃນພາລະກິດຕໍ່ສູ້ຕ້ານການຮຸກຮານຂອງຈັກກະພັດອາເມລິກາ ແລະ ລູກມື; ພາກທີ 4 ພ້ອມກັບສູນກາງພັກປະຊາຊົນປະຕິວັດລາວ ນໍາພາ-ຊີ້ນໍາ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ແລະ ພາກທີ 5 ວຽກງານການພົວພັນຕ່າງປະເທດ.

ພິທີວາງສະແດງຮູບພາບຈະໄດ້ດຳເນີນໄປເປັນເວລາ 3 ເດືອນ.

ຂ່າວ+ພາບ: ສຸກ ແລະ ເຢ

ບກ: ພ.ບຸບຜາ

info@lfnd.org.la | 021 213754 | (856-21) 453191