ໃນວັນທີ 11 ກັນຍາ 2024 ນີ້ທີ່ສູນກາງແນວລາວສ້າງຊາດ;  ທ່ານ ດຣ. ນາງ ອິນລາວັນ ແກ້ວບຸນພັນ ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານນາງ ກຣາຕາ ເອັນດາ ແວດານິງຕຣຽດ, ເອກອັກຄະລັດຖະທູດ ສາທາລະນະລັດ ອິນໂດເນເຊຍ ປະຈໍາ ສປປ ລາວ ພ້ອມດ້ວຍຄະນະ.

ການເຂົ້າຢ້ຽມຂ່ຳນັບຄັ້ງນີ້, ກໍ່ເພື່ອປືກສາຫາລືກ່ຽວກັບການສະເຫນີຈັດກອງປະຊຸມວັດທະນາທຳ ແລະ ສາສະຫນາອາຊຽນ “ASEAN Intetcultural and Interreligious Dialogue Conference ” (IIDC) ຢູ່ ສປປ ລາວ.

ໃນໂອກາດນີ້ ທ່ານ ຮອງປະທານ ສູນກາງແນວລາວສ້າງຊາດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ທ່ານເອກອັກຄະລັດຖະທູດ ສາທາລະນະລັດ ອິນໂດເນເຊຍ ປະຈໍາ ສປປ ລາວ ພ້ອມຄະນະ ແລະ  ໄດ້ລາຍງານສະພາບໂດຍຫຍໍ້ກ່ຽວກັບເສດຖະກິດ, ວຽກງານການເຄື່ອນໄຫວຂອງຕົນ ແລະ ສະພາບອາກາດ ຢູ່ສປປ ລາວ ໃຫ້ທ່ານຮັບຊາບ.

ທ່ານນາງ ກຣາຕາ ເອັນດາ ແວດານິງຕຣຽດ, ເອກອັກຄະລັດຖະທູດ ສາທາລະນະລັດອິນໂດເນເຊຍ ປະຈໍາ ສປປ ລາວ) ໄດ້ສະແດງຄວາມຂອບໃຈຕໍ່ ທ່ານ ຮອງປະທານ ສູນກາງແນວລາວສ້າງຊາດ  ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງໃຫ້ຄໍາປືກສາ ແນະນໍາກ່ຽວກັບການກະກຽມຈັດກອງປະຊຸມວັດທະນາທຳ ແລະ ສາສະຫນາອາຊຽນ ໃນຄັ້ງນີ້.

ພາບ-ຂ່າວ: ນ.ແສງຫຼ້າ

ບກ. ກົງແກ້ວ