ໂອກາດນີ້, ທ່ານ ຮອງປະທານສູນກາງແນວລາວສ້າງຊາດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ຄະນະທີ່ໄດ້ມາຢ້ຽມຢາມ ສປປ ລາວ ໃນຄັ້ງນີ້ ແລະ ທ່ານຍັງໄດ້ຍົກໃຫ້ເຫັນສະພາບລວມໃນການສ້າງສາພັດທະນາປະເທດຊາດ, ພາລະບົດບາດ, ສິດ ແລະ ໜ້າທີ່ຂອງອົງການແນວລາວສ້າງຊາດ ໂດຍຫຍໍ້. ພ້ອມກັນນັ້ນ, ທ່ານ ຍັງໄດ້ໃຫ້ຮູ້ຕື່ມອີກວ່າພັກ ແລະ ລັດ ຍາມໃດກໍໃຫ້ຄວາມສຳຄັນຕໍ່ພີ່ນ້ອງເຊື້ອຊາດລາວຢູ່ຕ່າງປະເທດ ແລະ ຖືເປັນພາກສ່ວນໜຶ່ງທີ່ບໍ່ສາມາດຕັດແຍກອອກຈາກວົງຄະນະຍາດແຫ່ງຊາດໄດ້, ທັງເປັນກຳລັງແຮງໃນການພັດທະນາປະເທດຊາດ. ສະ ນັ້ນ, ໃນການເຂົ້າທອດກອງມະຫາກະຖິນສາມັກຄີ ແລະ ການເຄື່ອນໄຫວກິດຈະກຳຕ່າງໆ ຢູ່ ສປປ ລາວ ໃນຄັ້ງນີ້ ກໍເປັນການສ້າງຄວາມສາມັກຄີຮັກແພງ ລະຫວ່າງຄົນລາວດ້ວຍກັນໃຫ້ຍືນຍົງຕະຫຼອດໄປ.

     ໂອກາດດັ່ງກ່າວນີ້, ທ່ານ ຄຳອິນ ຄິດຈະເດດ ໄດ້ສະແດງຄວາມຂອບໃຈເປັນຍິ່ງ ຕໍ່ທ່ານຮອງປະທານສູນກາງແນວລາວສ້າງຊາດ ພ້ອມຄະນະທີ່ໄດ້ຕ້ອນຮັບຢ່າງອົບອຸ່ນ. ພ້ອມທັງໄດ້ລາຍງານຈຸດປະສົງ ແລະ ແຜນການເຄື່ອນ ໄຫວການມາຢ້ຽມຢາມ ສປປ ລາວໃນຄັ້ງນີ້ ໃຫ້ທ່ານຮອງປະທານສູນກາງແນວລາວສ້າງຊາດ ໄດ້ຮັບຊາບ.