ໃນໂອກາດທີ່ທ່ານຮອງປະທານ ສນຊ ເຄື່ອນໄຫວເຮັດວຽກສອງແຂວງດັ່ງກ່າວໄດ້ພົບປະແນວລາວສ້າງ ເມືອງ ກະລຶມ ແຂວງເຊກອງ ແລະ ພົບປະ ແນວລາວສ້າງຊາດ ເມືອງ ຊານໄຊ ແຂວງອັດຕະປື ຫຼັງຈາກນັ້ນ, ທ່ານຮອງປະທານ ສນຊ ໄດ້ໄປຢ້ຽມຢາມພົບປະໂອ້ລົມ ປະຊາຊົນ ບ້ານ ດາກກະນາດ ແລະ ບ້ານ ຈະເລີນໄຊ ເມືອງ ຊານໄຊ ແຂວງ ອັດຕະປື, ເຊິ່ງຢູ່ໃນແຕ່ລະຈຸດກໍ່ໄດ້ຮັບຟັງການລາຍງານກ່ຽວກັບຜົນງານການເຄື່ອນໄຫວວຽກງານແນວລາວສ້າງຊາດໃນໄລຍະຜ່ານມາ ແລະ ທິດທາງແຜນການວຽກງານຈຸດສຸມໃນປີຕໍ່ໜ້າ. ກ່ອນອື່ນທ່ານ ຮອງປະທານ ສນຊ ໄດ້ສະແດງຄວາມຍ້ອງຍໍຊົມເຊີຍບັນດາຜົນງານຂອງແນວລາວສ້າງຊາດແຕ່ລະຂັ້ນທີ່ຍາດມາໄດ້. ພ້ອມກັນນີ້, ທ່ານຮອງປະທານ ສນຊ ໄດ້ຊຸກຍູ້ໃຫ້ແນວລາວສ້າງຊາດແຕ່ລະຂັ້ນຂອງສອງແຂວງດັ່ງກ່າວ ຈົ່ງພ້ອມກັນສືບຕໍ່ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນເປັນຕົ້ນແມ່ນ ພ້ອມກັນເສີມຂະຫຍາຍຄວາມສາມັກຄີປອງດອງປະຊາຊົນບັນດາເຜົ່າ ເພື່ອເຂົ້າຮ່ວມທຸກຂະບວນການຂອງຊາດເປັນຕົ້ນເຂົ້າຮ່ວມຂະບວນການສ້າງຄອບຄົວ ແລະ ບ້ານສາມັກຄີປອງດອງຕິດພັນກັບການແກ້ໄຂຄວາມທຸກຍາກຂອງປະຊາຊົນ. ພ້ອມກັນສືບຕໍ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິ XI ຂອງແນວລາວສ້າງຊາດ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດໃຫ້ປະກົດຜົນເປັນຈິງ.

ບກ: ສື່ເຊັ້ງ

ຂ່າວ+ຮູບພາບ: ຈັນສອນ