ສູນກາງແນວລາວສ້າງຊາດ

Lao Front For National Development

ທ່ານ ຮອງປະທານສູນກາງແນວລາວສ້າງຊາດ ເຂົ້າພົບປະການນໍາແຂວງເຊກອງ

ທ່ານ ດຣ ນາງ ອິນລາວັນ ແກ້ວບຸນພັນ ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຂົ້າພົບປະ ທ່ານ ບຸນຫຼາຍ ບຸດທິ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງ, ມີທ່ານ ນາງ ບຸນຮຽງ ບຸນຈິດ ກຳມະການປະຈຳພັກແຂວງ, ປະທານແນວລາວສ້າງຊາດແຂວງ, ສະພາປະຊາຊົນແຂວງ, ທ່ານຫົວໜ້າພະແນກພາຍໃນແຂວງ, ຕາງໜ້າຄະນະກວດກາພັກ-ລັດແຂວງ ແລະ ຮອງປະທານແນວລາວສ້າງຊາດແຂວງ ໃນວັນທີ 13 ມີນາ 2024 ນີ້ ທີ່ຫ້ອງຮັບແຂກຫ້ອງວ່າການປົກຄອງແຂວງເຊກອງ.

ທ່ານ ປະທານແນວລາວສ້າງຊາດແຂວງເຊກອງ ໄດ້ລາຍງານໂດຍຫຍໍ້ກ່ຽວກັບສະພາບລວມຂອງແນວລາວສ້າງຊາດແຂວງເຊກອງ. ຈາກນັ້ນ, ທ່ານຮອງປະທານສູນກາງແນວລາວສ້າງຊາດໄດ້ລາຍງານຈຸດປະສົງໃນການພົບປະ ແລະ ເຄື່ອນໄຫວເຮັດວຽກໃນຄັ້ງນີ້ ເພື່ອແນໃສ່ຈັດຕັ້ງຜັນຂະຫຍາຍຄໍາສັ່ງ ເລກທີ 411/ຄລສພ, ລົງວັນທີ 8 ສິງຫາ 2023 ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ແລະ ແຈ້ງການ ຂອງຄະນະປະຈໍາສູນກາງແນວລາວສ້າງຊາດ ເລກທີ 17/ຄປຈ, ລົງວັນທີ 14 ກຸມພາ 2024 ກ່ຽວກັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງແນວລາວສ້າງຊາດ ຕິດພັນກັບການສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ ແລະ ວັນສໍາຄັນຂອງພັກ, ຂອງຊາດ.

ໂອກາດນີ້, ທ່ານ ບຸນຫຼາຍ ບຸດທິ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາເຄື່ອນໄຫວ ແລະ ເຮັດວຽກຂອງທ່ານຮອງປະທານສູນກາງແນວລາວສ້າງຊາດ ພ້ອມດ້ວຍຄະນະ ໃນຄັ້ງນີ້. ທັງລາຍງານສະພາບທີ່ພົ້ນເດັ່ນຂອງແຂວງເຊກອງ ແລະ ຜົນສຳເລັດໃນການຈັດຕັ້ງປະຕິບັດວຽກງານຂອງແຂວງ ໄລຍະຜ່ານມາ. ເພື່ອເຫັນໄດ້ດ້ານດີ ແລະ ຂໍ້ຄົງຄ້າງຕ່າງໆ ທີ່ຕິດພັນກັບວຽກງານແນວລາວສ້າງຊາດ ເພື່ອພ້ອມກັນແກ້ໄຂໃນຕໍ່ໜ້າ ໃຫ້ໄດ້ຮັບຜົນດີ.

ຂ່າວ+ພາບ: ຄຳຜາຍ

ບກ: ກົງແກ້ວ

info@lfnd.org.la | 021 213754 | (856-21) 453191