ໃນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ປວງຊົນລາວບັນດາເຜົ່າ ພວມສູ້ຊົນຕັ້ງໜ້າບຸກບືນຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ ,ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງແນວລາວສ້າງຊາດ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5ປີ ຄັ້ງທີ 9 ຂອງລັດວາງອອກ ແລະ ສ້າງຂະບວນການໃນດ້ານຕ່າງໆເພື່ອ ຂໍ່ານັບຮັບຕ້ອນກອງປະຊຸມໃຫຍ່ 3ຂັ້ນ ຂອງພັກ ແລະ ຂອງແນວລາວສ້າງຊາດ ທີ່ຕິດພັນກັບວັນສໍາຄັນ ຂອງພັກ, ຂອງຊາດ ພ້ອມກັນນີ້ ເປັນການຊົມເຊີຍ ວັນທີ 22 ມີນາ ແລະ ວັນທີ 21ມີນາ ໃຫ້ເປັນຂະບວນການຟົດຟື້ນໃນຂອບເຂດທົ່ວປະເທດ; ໃນວັນທີ 29 ມີນາ 2024 ນີ້, ທ່ານ ຄຳໄຫຼ ສີປະເສີດ ກຳມະການສູນກາງພັກ, ຮອງປະທານຜູ້ປະຈຳການສູນກາງແນວລາວສ້າງຊາດ ພ້ອມດ້ວຍຄະນະໄດ້ລົງຢ້ຽມຢາມພົບປະໂອ້ລົມພະນັກງານນັກຮົບປະຕິວັດສູນເສຍອົງຄະ 489 ໂດຍໄດ້ຮັບການຕ້ອນຮັບຈາກ ທ່ານ ພັທ. ວຽງສະຫວັນ ບຸນສີເມືອງ ເລຂາຄະນະພັກ, ຫົວໜ້າການເມືອງສູນເສຍອົງຄະ 489, ມີພະນັກງານນັກຮົບປະຕິວັດອາວຸໂສເສຍອົງຄະ-ບຳນານ, ທະຫານປະຈຳຢູ່ສູນເສຍອົງຄະ 489 ເຂົ້າຮ່ວມ ທີ່ສູນເສຍອົງຄະ 489(ຂຸດສາມບາດ).

ທ່ານ ພັທ. ວຽງສະຫວັນ ບຸນສີເມືອງ ໄດ້ລາຍງານປະຫວັດຄວາມເປັນມາ ຂອງສູນເສຍອົງຄະກໍຄືພະນັກງານນັກຮົບປະຕິວັດຂອງສູນເສຍອົງຄະ 489ໃນໄລຍະທີ່ຜ່ານມາ.

ທ່ານ ຮອງປະທານຜູ້ປະຈຳການສູນກາງແນວລາວສ້າງຊາດ ໄດ້ມີຄໍາເຫັນຕໍ່ພະນັກງານນັກຮົບປະຕິວັດເສຍອົງຄະ ເຊິ່ງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ ນາຍແລະພົນທະຫານ, ພະນັກງານນັກຮົບປະຕິວັດ ທີ່ໄດ້ເສຍສະຫຼະຊີວິດ, ເລືອດເນື້ອເພື່ອປະເທດຊາດຕະຫຼອດໄຍລະຕໍ່ສູ້ກູ້ຊາດ ແລະ ສ້າງສາພັດທະນາປະເທດຊາດ ຢ່າງບໍ່ຮູ້ອິດບໍ່ຮູ້ເມື່ອຍ ແລະ ຂໍຈາລຶກບຸນຄຸນ ຄູນງາມຄວາມດີທີ່ບັນດາທ່ານໄດ້ປະກອບສ່ວນອຸທິດຕົນເຂົ້າໃນພາລະກິດປະຕິວັດຕະຫຼອດມາ ແລະ ຕໍ່ໄປໃຫ້ບັນດາທ່ານສືບຕໍ່ເປັນຄັນທຸງເຕົ້າໂຮມຄວາມສາມັກຄີປະຊາຊົນບັນດາເຜົ່າ; ຊຸກຍູ້ລູກຫຼານຈັດຕັ້ງປະຕິບັດ 2 ວາລະແຫ່ງຊາດໃຫ້ໄດ້ຮັບຜົນດີ ເພື່ອພັດທະນາປະເທດຊາດໄປສູ່ຈຸດໝາຍສັງຄົມນິຍົມເທຶ່ອລະກ້າວ ໂອກາດນີ້ ທ່ານ ຮອງປະທານຜູ້ປະຈຳການສູນກາງແນວລາວສ້າງຊາດ ພ້ອມດ້ວຍຄະນະ ຢ້ຽມຢາມສູນເສຍອົງຄະ 489 ກໍໄດ້ນຳເອົາ ເງິນຈຳນວນ 15.000.000ກີບ(ສິບຫ້າລ້ານກີບ)ມອບໃຫ້ແກ່ສູນດັ່ງກ່າວ; ໃນນີ້, ທ່ານ ພູວົງ ພະມີສິດ ກໍາມະການສູນກາງແນວລາວສ້າງຊາດ ຫົວໜ້າຄະນະທີ່ປຶກສາວຽກງານຊົນເຜົ່າ ກໍໄດ້ປະກອບສ່ວນຈໍານວນເງິນ 2.000.000ກີບ(ສອງລ້ານກີບ) ແລະ ເຄື່ອງບໍລິໂພດຈຳນວນໜຶ່ງໃຫ້ສູນເສຍອົງຄະ 489ຕື່ມອິກ.

ບກ: ສຊ ຈື້ໄຊ

ຂ່າວ-ພາບ: ເລົ່າລໍ່