ທີ່ສູນກາງແນວລາວສ້າງຊາດ(ສນຊ) ໃນວັນທີ 17 ພະຈິກ 2022 ນີ້, ທ່ານ ດຣ ຈັນເພັງ ສຸດທິວົງ ຮອງປະທານສູນກາງແນວລາວສ້າງຊາດ ພ້ອນດ້ວຍຄະນະ ໄດ້ຕ້ອນຮັບການເຂົ້າຢ້ຽມພົບປະ ຂອງທ່ານ ເຟນານໂດ ກອງຊາເລສ ໂຢ, ວິລະບູລຸດ, ປະທານສະຖາບັນກູບາ ເພື່ອສັນຕິພາບກັບນາໆຊາດ ພ້ອມຄະນະ.

ທ່ານ ຮອງປະທານ ສນຊ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ການມາຢ້ຽມຢາມ ແລະ ເຮັດວຽກຂອງທ່ານ ປະທານສະຖາບັນກູບາ ເພື່ອສັນຕິພາບກັບນາໆຊາດ ຊຶ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ລະຫວ່າງ ສອງປະເທດ ແລະ ປະຊາຊົນສອງຊາດລາວ-ກູບາ ອັນເປັນມູນເຊື້ອທີ່ມີມາແຕ່ດົນນານ ແລະ ສະແດງຄວາມຂອບໃຈຕໍ່ກູບາ ທີ່ໄດ້ໃຫ້ການຊ່ວຍເຫຼືອສະໜັບສະໜູນວຽກງານດ້ານການສຶກສາ ໃຫ້ ສປປ ລາວ ໃນໄລຍະຜ່ານມາ ເປັນຕົ້ນແມ່ນໄດ້ໃຫ້ທຶນໃຫ້ນັກສຶກສາຂອງລາວ ໄປຮຽນໃນສາຂາຕ່າງໆ ຢູ່ກູບາ. ພ້ອມທັງໄດ້ຍົກໃຫ້ເຫັນສະພາບລວມໃນການພັດທະນາເສດຖະກິດ-ສັງຄົມ ຂອງ ສປປ ລາວ ແລະ ພາລະບົດບາດ, ສິດ ແລະ ໜ້າທີ່ຂອງອົງການແນວລາວສ້າງຊາດ ໂດຍຫຍໍ້ໃຫ້ທ່ານຮັບຊາບ ຕື່ມອີກ.

ທ່ານ ເຟນານໂດ ກອງຊາເລສ ໂຢ ໄດ້ສະແດງຄວາມຂອບໃຈຕໍ່ທ່ານ ດຣ ຈັນເພັງ ສຸດທິວົງ ທີ່ໄດ້ໃຫ້ການຕ້ອນຮັບຄະນະໃນຄັ້ງນີ້ ແລະ ລາຍງານສະພາບລວມຂອງປະເທດກູບາ ໂດຍຫຍໍ້ໃຫ້ ທ່ານຮອງປະທານສູນກາງແນວລາວສ້າງຊາດ ໄດ້ຮັບຊາບ ເປັນຕົ້ນແມ່ນວຽກງານການພັດທະນາເສດຖະກິດ-ສັງຄົມ, ວຽກງານການທ່ອງທ່ຽວ ແລະ ວຽກງານອື່ນໆ.