ສູນກາງແນວລາວສ້າງຊາດ

Lao Front For National Development

ທ່ານ ຮອງປະທານ ສນຊ ມອບເຄື່ອງຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບນ້ຳຖ້ວມ ຢູ່ນະຄອນຫຼວງວຽງຈັນ

ໃນວັນທີ 5-6 ກັນຍາ 2018 ນີ້, ທ່ານ ຮສ.ດຣ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ມອບເຄື່ອງຊ່ວຍເຫຼືອໃຫ້ປະຊາຊົນ ທີ່ໄດ້ຮັບຜົນກະທົບນ້ຳຖ້ວມ ຢູ່ນະຄອນຫຼວງວຽງຈັນ.

ເນື່ອງຈາກຝົນຕົກໜັກມາເປັນເວລາຫຼາຍວັນຕິດຕໍ່ກັນ ເຮັດໃຫ້ລະດັບນ້ຳງື່ມເພີ່ມຂຶ້ນຢ່າງຕໍ່ເນື່ອງ ແລະ ໄດ້ໄຫຼເຂົ້າຖ້ວມເຮືອນຊານ ແລະ ເຂດທຳການຜະລິດຂອງປະຊາຊົນ ເມືອງນາຊາຍທອງ ເຊິ່ງມີ 7 ບ້ານທີ່ໄດ້ຮັບຜົນກະທົບຈາກໄພນໍ້າຖ້ວມຄື: ບ້ານນາດີ, ບ້ານໜອງສະ, ບ້ານພັດທະນາ, ບ້ານດົງບອງ, ບ້ານຊຽງດີ, ບ້ານນາຄູນ ແລະ ບ້ານແສນດິນ ເຊິ່ງເປັນບ້ານໜຶ່ງທີ່ໄດ້ຮັບຜົນກະທົບໜັກກວ່າໝູ່; ລວມທັງໝົດມີ 478 ຄອບຄົວ , ມີຜົນລະເມືອງທັງໝົດ 2,049 ຄົນ ແລະ ກຸ່ມບ້ານທ່າງ່ອນ ເມືອງໄຊທານີ ມີ 102 ຄອບຄົວ, ມີຜົນລະເມືອງ 556 ຄົນ. ສ່ວນບ້ານໜອງດາ ເມືອງສີໂຄດຕະບອງ ມີ 232 ຄອບ ຄົວ ແລະ ເຂດກຸ່ມບ້ານບໍ່ໂອ ເມືອງຫາດຊາຍຟອງ ໄດ້ຮັບຜົນກະທົບ 2 ບ້ານ ມີ 124 ຄອບຄົວ. ປະຊາຊົນຈໍານວນໜຶ່ງຂາດທີ່ ຢູ່ອາໄສ ຕໍ່ກັບເຫດການທີ່ເກີດຂຶ້ນ ໃນເບື້ອງຕົ້ນອຳນາດການປົກຄອງເມືອງ ແລະ ບ້ານ ໄດ້ສຸມທຸກກຳລັງເຂົ້າໄປຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບ ໂດຍໄດ້ມີການຍົກຍ້າຍປະຊາຊົນອອກຈາກພື້ນທີ່ທີ່ຖືກນ້ຳຖ້ວມ ໄປພັກຢູ່ທີ່ໂຮງຮຽນ ແລະ ບ່ອນພັກທີ່ປອດໄພ, ມີບາງໂຮງຮຽນແມ່ນໄດ້ປິດຮຽນເປັນຊົ່ວຄາວ, ໄດ້ເຮັດໃຫ້ເນື້ອທີ່ການຜະລິດກະສິກຳເສຍຫາຍເປັນຈຳ ນວນຫຼາຍເຮັກຕາ, ໜອງປາຈຳນວນໜຶ່ງໄດ້ຖືກນ້ຳຖ້ວມເສຍເຫຍ, ໄດ້ເຄື່ອນຍ້າຍສັດລ້ຽງໄປຢູ່ທີ່ສູງ, ລະບົບພື້ນຖານໂຄ່ງລ່າງໄດ້ຮັບຜົນກະທົບ ໂດຍສະເພາະແມ່ນຊົນລະປະທານ ແລະ ເສັ້ນທາງ.

ພ້ອມກັນນີ້, ທ່ານ ຮສ.ດຣ ສົມອົກ ກິ່ງສະດາ ກໍໄດ້ມອບວັດຖຸປັດໃຈຈຳນວນໜຶ່ງໃຫ້ບັນດາບ້ານ ທີ່ໄດ້ຮັບຜົນກະທົບດັ່ງກ່າວນີ້ໂດຍສະເພາະແມ່ນເຂົ້າສານ, ນ້ຳດື່ມ, ເຄື່ອງນຸ່ງ ລວມມູນຄ່າທັງໝົດ 20 ລ້ານກວ່າກີບ.

info@lfnd.org.la | 021 213754 | (856-21) 453191