ສູນກາງແນວລາວສ້າງຊາດ

Lao Front For National Development

ທ່ານ ຮອງປະທານ ສນຊ ເຂົ້າຮ່ວມພິທີວາງສີລາເລີກ ອາຄານສໍານັກງານ ສູນກາງ ອພສ

ໃນຫວ່າງບໍດົນຜ່ານມານີ້, ທ່ານ ຈັນທະວົງ ແສນອາມາດມົນຕີ ຮອງປະທານ ສູນກາງແນວລາວສ້າງຊາດ (ສນຊ) ຜູ້ຊີ້ນໍາວຽກ ງານສາສະໜາ ໄດ້ເຂົ້າຮ່ວມພິທີວາງສີລາເລີກ ອາຄານສໍານັກງານ ອພສ ທີ່ວັດທາດຫຼວງເໜືອ ເມືອງໄຊເສດຖາ ນະຄອນຫຼວງວຽງຈັນ, ໂດຍເປັນກຽດເຂົ້າຮ່ວມ ແລະ ເປັນປະທານຂອງທ່ານ ປອ ພັນຄໍາ ວິພາວັນ ກໍາມະການກົມການເມືອງສູນກາງພັກ, ຮອງປະທານປະເທດແຫ່ງ ສປປ ລາວ, ມີບັນດາທ່ານການນໍາມາຈາກບັນດາກະຊວງ, ອົງການຕ່າງໆ, ມີພະສົງ ສາມະເນນ, ມີບັນ ດານັກທຸລະກິດຕ່າງໆ ຕະຫຼອດຮອດພໍ່ແມ່ປະຊາຊົນລາວເຂົ້າຮ່ວມ.

ໃນພິທີໄດ້ກ່າວຈຸດປະສົງໃນການວາງສີລາເລີກການກໍ່ສ້າງຄັ້ງນີ້: ເພື່ອເປັນການນ້ອມບູຊາພຣະສີຣະຕະນະໄຕຣແກ້ວອັນປະເສີດທັງ 3 ແລະ ເພື່ອໄວ້ເປັນທີ່ລະນຶກ ອະນຸສອນ ຂອງອົງການພຸດທະສາສະໜາສໍາພັນ ແຫ່ງ ສປປ ລາວ; ເພື່ອໄວ້ເປັນທີ່ພັກອາໄສຢູ່ ຂອງພຣະມາຫາເຖຣະ ຄະນະກໍາມະການສູນກາງ ອພສ ທີ່ມາຈາກແຂວງຕ່າງໆ ທີ່ເດີນທາງມາປະຊຸມ; ເພື່ອໄວ້ເປັນທີ່ຈັດກອງປະ ຊຸມໃຫຍ່ ຂອງຄະນະກໍາມະການສູນກາງ ອພສ; ໃນການເຄື່ອນໄຫວວຽກງານ ລະບົບການຈັດຕັ້ງ ຂອງຫ້ອງການສູນກາງ ອພສ ແລະ ກໍາມະທິການທັງ 5 ໃຫ້ສອດຄ່ອງກັບພາລະບົດບາດ ໜ້າທີ່ຂອງຕົນ. ການກໍ່ສ້າງອາຄານຄັ້ງນີ້ລວມມີ 3 ຫຼັງຄື: ອາຄານສໍານັກງານ ສູນກາງ ອພສ; ອາຄານສໍານັກງານ ປະທານສົງ ແລະ ອາຄານອາຄັນຕຸກະອະນຸສອນສູນກາງ ອພສ ໄລຍະການກໍ່ສ້າງອາຄານທັງ 3 ຫຼັງນີ້ ມີກໍານົດຄາດຄະເນໄວ້ວ່າ ຈະໃຫ້ສໍາເລັດພາຍໃນປີ 2020-2021.

ໃນພິທີຄັ້ງນີ້, ທ່ານ ປອ ພັນຄໍາ ວິພາວັນ ປະທານຝ່າຍຄະຣາວາດ ໄດ້ໄຕ້ທູບທຽນບູຊາຄຸນ ພຣະສີຣັດຕະນະໄຕ ແລະ ລັ່ນຄ້ອງ 7 ບາດ ເພື່ອເປັນການເປີດພິທີການກໍ່ສ້າງອາຄານສໍານັກງານຂອງສູນກາງ ອພສ ພ້ອມກັນນັ້ນ, ໄດ້ວາງສີລະເລີກ ການກໍ່ສ້າງອາຄານສໍານັກງານສູນກາງ ອພສ ແລະ ໄດ້ຮ່ວມໂມທະນາທານ ບໍລິຈາກສົມທົບທຶນເຂົ້າໃນການສ້າງອາຄານສູນກາງ ອພສ ທັງ 3 ຫຼັງດັ່ງກ່າວ ໂດຍມີບັນດາຄອບຄົວການນໍາພັກ-ລັດ, ນັກທຸລະກິດສັດທາອອກຕົນຍາດໂຍມເປັນຈໍານວນຫຼວງຫຼາຍ.

info@lfnd.org.la | 021 213754 | (856-21) 453191