ສູນກາງແນວລາວສ້າງຊາດ

Lao Front For National Development

ທ່ານ ຮອງປະທານ ສນຊ ເຄື່ອນໄຫວໂອ້ລົມປະຊາຊົນ ຢູ່ແຂວງບໍລິຄຳໄຊ

ໃນລະຫວ່າງວັນທີ 21-23 ພຶດສະພາ 2018 ນີ້, ທ່ານ ເຍ່ຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຄື່ອນໄຫວພົບປະໂອ້ລົມ ປະຊາຊົນຢູ່ບ້ານ ສີສະຫວາດ, ບ້ານບໍ່ ແລະ ບ້ານຊຽງລື ເມືອງບໍລິຄັນ ແຂວງບໍລິຄຳໄຊ, ມີບັນດາທ່ານຮອງປະທານແນວລາວສ້າງຊາດແຂວງ, ປະທານແນວລາວສ້າງຊາດເມືອງ, ພະນັກງານທີ່ກ່ຽວຂ້ອງຂອງເມືອງ ແລະ ແຂວງເຂົ້າຮ່ວມ.

ໂອກາດນີ້, ກໍໄດ້ຮັບຟັງການລາຍງານສະພາບການເຄື່ອນໄຫວໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າຂອງບັນດາບ້ານດັ່ງກ່າວໂດຍຫຍໍ້ ແລະ ໄດ້ຮັບຟັງລາຍງານວ່າ: ບ້ານສີສະຫວາດ ມີ 413 ຫຼັງຄາເຮືອນ, ມີ 460 ຄອບຄົວ, ມີປະຊາຊົນ 2334 ຄົນ, ສອງຊົນເຜົ່າຄື ເຜົ່າລາວ ແລະ ເຜົ່າມົ້ງ; ບ້ານບໍ່ ມີປະຊາກອນທັງໝົດ 3,445 ຄົນ, ມີ 499 ຫຼັງຄາເຮືອນ ແລະ ມີ 3 ຊົນເຜົ່າຄື ເຜົ່າລາວ, ເຜົ່າມົ້ງ ແລະ ເຜົ່າກຶມມຸ; ບ້ານຊຽງລື ມີຈຳນວນປະຊາກອນ 828 ຄົນ, ມີ 150 ຫຼັງຄາເຮືອນ 174 ຄອບຄົວ, ມີ 3 ຊົນເຜົ່າຄື ເຜົ່າລາວ, ເຜົ່າກຶມມຸ ແລະເຜົ່າຜ້ອງ. ອາຊີບຫຼັກຂອງປະຊາຊົນແມ່ນຄ້າຂາຍ, ເຮັດນາ-ໄຮ່, ປູກຜືດ ແລະ ລ້ຽງສັດເປັນສິນຄ້າ.

ພ້ອມກັນນີ້, ກໍໄດ້ຮັບຟັງການເຜີຍແຜ່ຂໍ້ຕົກລົງ ລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດ ນາມ ວ່າດ້ວຍການແກ້ໄຂບັນຫາຜູ້ຍົກຍ້າຍຕັ້ງພູມລຳເນົາ ຕາມລຳພັງໃຈ ແລະ ສ້າງຄອບຄົວບໍ່ຖືກລະບຽບຢູ່ຕາມບໍລິເວັນຊາຍແດນ ຂອງສອງປະເທດ, ໄດ້ຮັບການຫວນຄືນມູນເຊື້ອການເຕີບໃຫຍ່ຂະຫຍາຍຕົວ ຂອງອົງການແນວລາວສ້າງຊາດ ຜ່ານສາມໄລຍະປະຫວັດສາດ ແລະ ໄດ້ເຜີຍແຜ່ ທີ່ຕັ້ງ, ພາລະບົດບາດ, ສິດ, ໜ້າທີ່ຂອງອົງການແນວລາວສ້າງຊາດ ໂດຍຫຍໍ້ ໃຫ້ປະຊາຊົນ ໄດ້ຮັບຮູ້ ແລະ ເຂົ້າໃຈຢ່າງເລີກເຊິ່ງຕື່ມອີກ.

ໂອກາດນີ້, ທ່ານ ຮອງປະທານສູນກາງແນວລາວສ້າງຊາດ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໃນໄລຍະຜ່ານມາຂອງອົງການຈັດຕັ້ງຂັ້ນເມືອງ, ຂັ້ນບ້ານ ແລະ ປະຊາຊົນພາຍໃນ 3 ບ້ານດັ່ງກ່າວ. ພ້ອມກັນນັ້ນ ທ່ານກໍໄດ້ເນັ້ນບາງບັນຫາຕື່ມອີກວ່າ: ໃຫ້ແຕ່ລະພາກສ່ວນເອົາໃຈໃສ່ຕິດຕາມກວດກາ ການເຄື່ອນຍ້າຍຂອງປະຊາຊົນຕາມລຳພັງໃຈຢູ່ເຂດຊາຍແດນ ລາວ-ຫວຽດ ນາມ, ໃຫ້ເຊື່ອມຊຶມແນວທາງນະໂຍບາຍຂອງພັກ-ລັດ ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ສຶກສາອົບຮົມ ແລະ ປຸກລະດົມໃຫ້ປະຊາຊົນໃຫ້ມີຄວາມສາມັກຄີເປັນປຶກແຜ່ນແໜ້ນໜາ ແລະ ເປັນອັນໜຶ່ງອັນດຽວ; ສົ່ງເສີມການສ້າງຄອບ ຄົວ ແລະ ບ້ານສາມັກຄີຕິດພັນກັບການແກ້ໄຂຄວາມທຸກຍາກຂອງປະຊາຊົນ, ໃຫ້ມີສະຕິລະວັງຕົວຕໍ່ກຸ່ມຄົນທີ່ບໍ່ຫວັງດີສວຍໃຊ້ຊົນເຜົ່າ, ສາສະໜາ ເພື່ອແບ່ງແຍກຄວາມສາມັກຄີພາຍໃນ; ໃຫ້ອົງການຈັດຕັ້ງຂອງບ້ານ ແລະ ປະຊາຊົນຈົ່ງຍົກສູງສະ ຕິ, ຄວາມຮັບຜິດຊອບ ແລະ ເປັນເຈົ້າການຕໍ່ວຽກງານປ້ອງກັນຄວາມສະຫງົບພາຍໃນບ້ານ, ເສີມຂະຫຍາຍສິດເປັນເຈົ້າ ແລະ ໃຫ້ເຂົາເຈົ້າຈົ່ງຮັກສາຮີດຄອງປະເພນີອັນງາມຂອງບັນດາເຜົ່າ, ສົ່ງເສີມໃຫ້ລູກຫຼານຮອດເກນອາ ຍຸໄດ້ເຂົ້າໂຮງຮຽນ, ສ້າງການຜະລິດກະສິກຳ, ປູກຝັງ ແລະ ລ້ຽງສັດເປັນສິນຄ້າ ເພື່ອເຮັດໃຫ້ຄອບຄົວ ແລະ ບ້ານໄດ້ຮັບການພັດທະນາດີຂຶ້ນເປັນກ້າວໆ.

info@lfnd.org.la | 021 213754 | (856-21) 453191