ຂ້າພະເຈົ້າ ຮູ້ສຶກເປັນກຽດ ແລະ ມີຄວາມພາກພູມໃຈເປັນຢ່າງຍິ່ງ ທີ່ໄດ້ຕາງໜ້າຄະນະກຳມະການສູນກາງແນວລາວສ້າງຊາດ, ສະຫະພັນນັກຮົບເກົ່າລາວ ແລະ ອົງການຈັດຕັ້ງມະຫາຊົນ ປະກອບຄຳເຫັນ ໃນຫົວຂໍ້ “ຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ ໃນໄລຍະໃໝ່”.
ໃນໂອກາດອັນມີຄວາມໝາຍສຳຄັນນີ້, ຂ້າພະເຈົ້າ ຂໍນຳເອົາຄວາມຊົມເຊີຍ ແລະ ພອນໄຊອັນປະເສີດຈາກຄະນະກໍາມະການສູນກາງແນວລາວສ້າງຊາດ, ສະຫະພັນນັກຮົບເກົ່າລາວ, ບັນດາອົງການຈັດຕັ້ງມະຫາຊົນຂອງພັກ ແລະ ປະຊາຊົນລາວບັນດາເຜົ່າໃນທົ່ວປະເທດ ມາຍັງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ຢ່າງສຸດອົກສຸດໃຈ (ຂໍຊົມເຊີຍ)!
ຄະນະປະທານ, ແຂກທີ່ມີກຽດ, ຜູ້ແທນກອງປະຊຸມໃຫຍ່ ທີ່ນັບຖື ແລະຮັກແພງ!
ຄືບັນດາສະຫາຍຮັບຮູ້ແລ້ວວ່າ, ແນວລາວສ້າງຊາດ, ສະຫະພັນນັກຮົບເກົ່າລາວ ແລະ ບັນດາອົງການຈັດຕັ້ງມະຫາຊົນຂອງພັກ ເປັນອົງປະກອບສໍາຄັນທີ່ຕັດແຍກບໍ່ໄດ້ ໃນລະບົບການເມືອງ ຂອງລະບອບປະຊາທິປະໄຕປະຊາຊົນ ທີ່ມີພັກປະຊາຊົນປະຕິວັດລາວ ເປັນແກນນໍາ; ແນວລາວສ້າງຊາດ ແມ່ນອົງການສໍາພັນທາງການເມືອງຂອງທົ່ວສັງຄົມ, ເປັນສະຫະພັນຂອງອົງການຈັດຕັ້ງການເມືອງ, ອົງການຈັດຕັ້ງສັງຄົມ ແລະ ບຸກຄົນທີ່ເປັນຕົວແທນໃຫ້ແກ່ຊັ້ນຄົນ, ຊົນເຜົ່າ, ສາສະໜາ, ເພດ–ໄວ ລວມທັງຕົວແທນຄົນເຊື້ອຊາດລາວ ທີ່ດໍາລົງຊີວິດຢູ່ຕ່າງປະເທດ; ສະຫະພັນນັກຮົບເກົ່າລາວ ແລະ ບັນດາອົງການຈັດຕັ້ງມະຫາຊົນຂອງພັກ ແມ່ນອົງການຈັດຕັ້ງການເມືອງ-ສັງຄົມ, ເປັນຕົວແທນແຫ່ງສິດ ແລະ ຜົນປະໂຫຍດອັນຊອບທໍາຂອງສະມາຊິກ ແລະ ພົນລະເມືອງທີ່ຢູ່ໃນຄວາມຮັບຜິດຊອບຂອງອົງການຕົນ. ແນວລາວສ້າງຊາດ, ສະຫະພັນນັກຮົບເກົ່າລາວ ແລະ ອົງການຈັດຕັ້ງມະຫາຊົນ ແຕ່ລະຂັ້ນ ໄດ້ເປັນເຈົ້າການສຶກສາອົບຮົມ, ເຕົ້າໂຮມຄວາມສາມັກຄີປວງຊົນລາວບັນດາເຜົ່າ ເສີມຂະຫຍາຍສິດເປັນເຈົ້າຂອງປະຊາຊົນລາວບັນດາເຜົ່າ ໃນການປະຕິບັດແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ.
ໃນນັ້ນ, ວຽກງານຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາ ແມ່ນໜຶ່ງໃນມາດຕະຖານການພັດທະນາຂອງລັດຖະບານ ຕາມທິດສາມສ້າງ ຕິດພັນກັບຂະບວນການການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ, ຂໍ້ແຂ່ງຂັນ 3 ດີ 6 ຮັກສາ ຂອງສະຫະພັນຮົບເກົ່າລາວ, ຂໍ້ແຂ່ງຂັນ 3 ດີຂອງສະຫະພັນແມ່ຍິງລາວ, ຂໍ້ແຂ່ງຂັນ 5 ເປັນເຈົ້າຂອງສະຫະພັນກໍາມະບານລາວ ແລະ ຂໍ້ແຂ່ງຂັນ 4 ບຸກ ຂອງຄະນະຊາວໜຸ່ມປະຊາຊົນປະຕິວັດລາວ. ແນວລາວສ້າງຊາດ ໄດ້ປະສານສົມທົບກັບບັນດາອົງການພາຄີ ແລະ ພາກສ່ວນຕ່າງໆ ໂດຍສະເພາະແມ່ນບັນດາອົງການຈັດຕັ້ງມະຫາຊົນ ໃນການປະກອບສ່ວນຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາ, ຊຶ່ງໄລຍະຜ່ານມາ ໄດ້ຈັດຕັ້ງປະຕິບັດບາງວຽກງານອັນພົ້ນເດັ່ນ ດັ່ງນີ້:
- ແນວລາວສ້າງຊາດ, ສະຫະພັນນັກຮົບເກົ່າລາວ ແລະ ບັນດາອົງການຈັດຕັ້ງມະຫາຊົນຂອງພັກ ແຕ່ລະຂັ້ນ ໄດ້ເປັນເຈົ້າການລົງພົບປະໂອ້ລົມ, ໂຄສະນາ, ສຶກສາອົບຮົມ, ປຸກລະດົມຂົນຂວາຍ ປະຊາຊົນບັນດາເຜົ່າ ຢູ່ທ້ອງຖິ່ນຮາກຖານ ໃຫ້ມີຄວາມສາມັກຄີປອງດອງ, ມີຄວາມສະເໝີພາບຍິງ-ຊາຍ, ມີນໍ້າໃຈຊ່ວຍເຫຼືອເຊິ່ງກັນແລະກັນ, ມີຄວາມຕື່ນຕົວເປັນເຈົ້າການສ້າງບ້ານທີ່ມີຄວາມສາມັກຄີ ແລະ ບ້ານພັດທະນາ ໂດຍບໍ່ຈໍາແນກຊົນເຜົ່າ ແລະ ສາສະໜາ, ປະຕິບັດແນວທາງນະໂຍບາຍຂອງພັກ ແລະ ລະບຽບ-ກົດໝາຍຂອງລັດ;
- ເຮັດໃຫ້ຂະແໜງການ ກໍຄືປະຊາຊົນບັນດາເຜົ່າ ຢູ່ທ້ອງຖິ່ນ-ຮາກຖານ ມີຄວາມຕື່ນຕົວທາງດ້ານການເມືອງ, ມີສະຕິຕໍ່ການຈັດຕັ້ງ, ປະຕິບັດກົດລະບຽບຂອງບ້ານເມືອງ ແລະ ເຂົ້າຮ່ວມຂະບວນການຕ່າງໆຂອງຄະນະພັກ ແລະ ອົງການປົກຄອງທ້ອງຖິ່ນ ເປັນປົກກະຕິ; ຕື່ນຕົວເປັນເຈົ້າການເຂົ້າຮ່ວມໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ຕັ້ງໜ້າປະກອບສ່ວນວຽກງານປ້ອງກັນຊາດ-ປ້ອງກັນຄວາມສະຫງົບ;
- ເຮັດໃຫ້ທຸກຄອບຄົວພາຍໃນບ້ານ ສາມາດປົກປັກຮັກສາ ແລະ ເສີມຂະຫຍາຍມູນເຊື້ອວັດທະນະທໍາ-ຮີດຄອງປະເພນີອັນດີງາມຂອງຊາດ, ຂອງເຜົ່າ; ເດັກນ້ອຍໃນເກນອາຍຸ ໄດ້ເຂົ້າໂຮງຮຽນ ແລະ ປະຊາຊົນໄດ້ຮັບການບໍລິການດ້ານສາທາລະນະສຸກຢ່າງກວ້າງຂວາງ ແລະ ທົ່ວເຖິງ;
- ຊຸກຍູ້ໃຫ້ປະຊາຊົນບັນດາເຜົ່າ ສ້າງບ້ານໃຫ້ເປັນບ້ານພົ້ນທຸກ, ມີກອງທຶນພັດທະນາບ້ານ ຫຼື ມີຄັງສະສົມຂອງບ້ານ ແລະ ພື້ນຖານເສດຖະກິດຂອງບ້ານ ມີການຂະຫຍາຍຕົວຕໍ່ເນື່ອງ; ເອົາໃຈໃສ່ປົກປັກຮັກສາສິ່ງແວດລ້ອມຕາມທິດຍືນຍົງເທື່ອລະກ້າວ;
- ເຮັດໃຫ້ລະບົບການເມືອງ-ການປົກຄອງທ້ອງຖິ່ນ ມີຄວາມໜັກແໜ້ນ-ເຂັ້ມແຂງ, ອົງການແນວລາວສ້າງຊາດ, ສະຫະພັນນັກຮົບເກົ່າລາວ ແລະ ອົງການຈັດຕັ້ງມະຫາຊົນຂອງພັກ ແຕ່ລະຂັ້ນ ໄດ້ຮັບການປັບປຸງໃຫ້ມີຄວາມເຂັ້ມແຂງ ສາມາດເປັນໃຈກາງສຶກສາອົບຮົມ, ເຕົ້າໂຮມຄວາມສາມັກຄີບັນດາເຜົ່າ, ຊັ້ນຄົນ, ສາສະໜາ, ເພດ-ໄວ; ແກ້ໄຂຂໍ້ຂັດແຍ່ງ, ປະກົດການຫຍໍ້ທໍ້ຕ່າງໆພາຍໃນບ້ານ ເຮັດໃຫ້ບ້ານມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ເປັນພື້ນຖານອັນໜັກແໜ້ນ ຂອງລະບອບປະຊາທິປະໄຕປະຊາຊົນ;
- ໄດ້ເອົາໃຈໃສ່ຊຸກຍູ້ການສ້າງ ແລະ ສົ່ງເສີມຕົວແບບໃນການພັດທະນາແກ້ໄຂຄວາມທຸກຍາກ ແລະ ຫຼາຍໆກິດຈະກໍາຢ່າງເປັນຂະບວນຟົດຟື້ນ ເຂົ້າຮ່ວມວັນສໍາຄັນຕ່າງໆຂອງພັກ, ຂອງຊາດ ແລະ ວັນສໍາຄັນອື່ນໆ ຕິດພັນກັບຂະບວນການຈັດຕັ້ງປະຕິບັດບັນດາຂໍ້ແຂ່ງຂັນ ມີຜົນສຳເລັດອັນພົ້ນເດັ່ນ ເປັນຕົ້ນ: ຂະບວນການສ້າງຄອບຄົວສາມັກຄີປອງດອງ ໄດ້ 876,875 ຄອບຄົວ, ບ້ານສາມັກຄີປອງດອງໄດ້ 5,561 ບ້ານ ແລະ ເມືອງສາມັກຄີປອງດອງ 9 ເມືອງ; ຂະບວນການປະຕິບັດຂໍ້ແຂ່ງຂັນ 3 ດີ 6 ຮັກສາ ຂອງສະຫະພັນຮົບເກົ່າລາວ ໄດ້ 393 ບ້ານ; ຂະບວນການປະຕິບັດຂໍ້ແຂ່ງຂັນ 3 ດີຂອງສະຫະພັນແມ່ຍິງລາວ ໄດ້ 17 ແຂວງ ແລະ ນະຄອນຫຼວງ, ໄດ້ 145 ເມືອງ, ໄດ້ 7,987 ບ້ານ, ໄດ້ 1,072,266 ຄອບຄົວ, ພົນລະເມືອງດີ ໄດ້ 1,168,813 ຄົນ ແລະ ພັດທະນາດີ ໄດ້ 1,096,891 ຄົນ; ຂະບວນການປະຕິບັດຂໍ້ແຂ່ງຂັນ 5 ເປັນເຈົ້າ ຂອງສະຫະພັນກໍາມະບານລາວ ໄດ້ 17 ແຂວງ ແລະ 10 ກະຊວງ-ອົງການ; ຂະບວນການປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມປະຊາຊົນປະຕິວັດລາວ ໄດ້ 12 ແຂວງ-ນະຄອນຫຼວງ, 16 ກະຊວງ, 15 ອົງການ, 141 ເມືອງ ແລະ ຈັດຕັ້ງປະຕິບັດຂໍ້ແຂ່ງຂັນ 3 ດີ 4 ຮູ້ ຂອງກອງເຍົາວະຊົນທັນວາ ໃນທົ່ວປະເທດ ໄດ້ 78%.
ຄະນະປະທານ, ແຂກທີ່ມີກຽດ, ຜູ້ແທນກອງປະຊຸມໃຫຍ່ ທີ່ນັບຖື ແລະ ຮັກແພງ!
ຜ່ານການເຄື່ອນໄຫວວຽກງານຕົວຈິງ ໃນໄລຍະຜ່ານມາ ຍັງມີຈຸດຄົງຄ້າງ ຈຳນວນໜຶ່ງ ຄື:
- ການປະສານສົມທົບໃນການເຄື່ອນໄຫວວຽກງານ ລະຫວ່າງ ແນວລາວສ້າງຊາດ, ສະຫະພັນນັກຮົບເກົ່າລາວ ແລະ ບັນດາອົງການຈັດຕັ້ງມະຫາຊົນຂອງພັກ ໂດຍສະເພາະຂັ້ນທ້ອງຖິ່ນຮາກຖານ ຍັງມີລັກສະນະຈຳກັດ ບໍ່ກວ້າງຂວາງຕໍ່ເນື່ອງ.
- ຂະບວນການແຂ່ງຂັນຮັກຊາດ ແລະ ພັດທະນາ ຕິດພັນກັບຂະບວນການຂອງແຕ່ລະອົງການ ຍັງບໍ່ທັນແຂງແຮງ, ບໍ່ທັນມີຫຼາຍຮູບຫຼາຍສີ-ຫຼາຍລະດັບເທົ່າທີ່ຄວນ.
- ວຽກງານແນວໂຮມ ແລະ ວຽກງານມະຫາຊົນຂອງພັກ ແມ່ນວຽກງານທີ່ສໍາຄັນ ແຕ່ພະນັກງານທີ່ຮັບຜິດຊອບວຽກງານດັ່ງກ່າວ ຍັງມີບົດຮຽນ, ປະສົບການຈໍາກັດ.
ເພື່ອເຮັດໃຫ້ການຈັດຕັ້ງປະຕິບັດວຽກງານຂະບວນການແຂ່ງຂັນຮັກຊາດ ແລະ ພັດທະນາ ໃນຕໍ່ໜ້າ ຂອງອົງການແນວລາວສ້າງຊາດ, ສະຫະພັນນັກຮົບເກົ່າລາວ ແລະ ບັນດາອົງການຈັດຕັ້ງມະຫາຊົນຂອງພັກ ໃຫ້ມີປະສິດທິຜົນສູງກວ່າເກົ່າ ແລະ ສອດຄ່ອງກັບມະຕິກົມການເມືອງສູນກາງພັກ ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່ ກໍຄືມະຕິກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ C ໄດ້ກໍານົດແຈ້ງໃນແຜນງານທີ 2 ກ່ຽວກັບວຽກງານປະສານງານກັບອົງການພາຄີ ແລະ ພາກສ່ວນຕ່າງໆ ຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາ ຈະຕ້ອງໄດ້ສືບຕໍ່ເອົາໃສ່ ຄື:
- ແນວລາວສ້າງຊາດ ຮ່ວມກັບສະຫະພັນນັກຮົບເກົ່າລາວ ແລະ ບັນດາອົງການຈັດຕັ້ງມະຫາຊົນຂອງພັກ ຕ້ອງສືບຕໍ່ເອົາໃຈໃສ່ເຕົ້າໂຮມຄວາມສາມັກຄີເປັນປືກແຜ່ນ ແລະ ເສີມຂະຫຍາຍກຳລັງແຮງຂອງທົ່ວປວງຊົນ, ປຸກລະດົມມະຫາຊົນ ເຂົ້າຮ່ວມການຈັດຕັ້ງປະຕິບັດແນວທາງຂອງພັກ-ລັດ, ປະກອບຄໍາຄິດຄໍາເຫັນໃນການກໍານົດແນວທາງນະໂຍບາຍຂອງພັກ ໃນຖານະເປັນອົງການພື້ນຖານການເມືອງ ແລະ ຕົວແທນສິດຜົນປະໂຫຍດຂອງປະຊາຊົນລາວບັນດາເຜົ່າ;
- ສືບຕໍ່ຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາ ຕິດພັນກັບຂະບວນການຂໍ້ແຂ່ງຂັນຂອງແຕ່ລະອົງການ ຢ່າງແຂງແຮງ, ປັບປຸງການເຄື່ອນໄຫວສ້າງຂະບວນການມະຫາຊົນ ດ້ວຍຫຼາຍຮູບຫຼາຍສີ, ຫຼາຍລະດັບ, ຫຼາຍຂະໜາດແຕກຕ່າງກັນ ແລະ ແທດເໝາະກັບແຕ່ລະເປົ້າໝາຍ, ແຕ່ລະຊັ້ນຄົນໃນສັງຄົມ ແນໃສ່ສ້າງໃຫ້ມີບັນດາຕົວແບບດີເດັ່ນ ໃນການປະຕິບັດຂໍ້ແຂ່ງຂັນ ແລະ ສ້າງພະນັກງານສືບທອດຈາກຂະບວນການວຽກງານຕົວຈິງຂອງມະຫາຊົນ, ເປັນເຈົ້າການເຂົ້າຮ່ວມ ແລະ ປະກອບສ່ວນສໍາຄັນ ໃນການປະຕິບັດສອງໜ້າທີ່ຍຸດທະສາດ ໃນເງື່ອນໄຂໃໝ່ ໃຫ້ມີຜົນສໍາເລັດສູງກວ່າເກົ່າ;
- ແນວລາວສ້າງຊາດ ໃນຖານະເປັນໃຈກາງແຫ່ງພາຄີບັນດາອົງການຈັດຕັ້ງການເມືອງ-ສັງຄົມ ສືບຕໍ່ຕັ້ງໜ້າ, ເປັນເຈົ້າການໃນການປືກສາຫາລື ແລະ ປະສານສົມທົບໃນການເຄື່ອນໄຫວກັບບັນດາອົງການຈັດຕັ້ງການເມືອງ-ສັງຄົມຕ່າງໆ ໂດຍສະເພາະ ແມ່ນສະຫະພັນນັກຮົບເກົ່າລາວ ແລະ ບັນດາອົງການຈັດຕັ້ງມະຫາຊົນຂອງພັກ ເພື່ອເສີມຂະຫຍາຍບົດບາດຂອງຕົນ ໃນການປົກປ້ອງສິດຜົນປະໂຫຍດ ຂອງສະມາຊິກໃນການພັດທະນາຕົນເອງ, ຮ່ວມກັນຮັບຜິດຊອບແກ້ໄຂບັນຫາຕ່າງໆ ໃນສັງຄົມ ທີ່ນອນຢູ່ໃນພາລະບົດບາດຂອງຕົນ;
- ສືບຕໍ່ປັບປຸງກົນໄກປະສານງານ ກັບສະຫະພັນນັກຮົບເກົ່າລາວ ແລະ ບັນດາອົງການຈັດຕັ້ງມະຫາຊົນຂອງພັກ ເຄື່ອນໄຫວ ແລະ ປະຕິບັດລະບອບສ່ອງແສງເປັນປົກກະຕິ, ເຮັດບົດບາດຕິດຕາມກວດກາຂອງແຕ່ລະອົງການໃນແຕ່ລະໄລຍະ ໂດຍຜ່ານການເກັບກໍາຫາງສຽງຂອງສັງຄົມ ເພື່ອສະເໜີຕໍ່ພາກສ່ວນທີ່ກ່ຽວຂ້ອງຄົ້ນຄວ້າແກ້ໄຂ; ສືບຕໍ່ຜັນຂະຫຍາຍມະຕິ ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່ ໃຫ້ກວ້າງຂວາງ, ທົ່ວເຖິງທຸກຮາກຖານ ແລະ ເປັນຮູບປະທໍາ.
