ສູນກາງແນວລາວສ້າງຊາດ

Lao Front For National Development

ບ້ານຖໍ້າໂລ້ ແລະ ບ້ານກໍໄຮ ຮັບຮອງເປັນບ້ານສາມັກຄີ ປອງດອງ

ພິທີຮັບຮອງບ້ານຖໍ້າໂລ້ ແລະ ບ້ານກໍໄຮ ເປັນບ້ານສາມັກຄີປອງດອງ ໄດ້ຈັດຂຶ້ນໃນວັນທີ 07 ກໍລະກົດ 2021 ນີ້, ທີ່ບ້ານບ້ານຖໍ້າໂລ້ ເມືອງອະນຸວົງ ແຂວງໄຊສົມບູນ, ໂດຍການເປັນປະທານຂອງ ທ່ານ ຕົວລໍ່ ຊາເຢີ ຄະນະປະຈໍາພັກເມືອງ, ປະທານແນວລາວສ້າງຊາດເມືອງອະນຸວົງ, ໂດຍເປັນກຽດເຂົ້າຮ່ວມຂອງ ທ່ານ ເລັ່ງຊົ່ງ ຕົ່ງສີ ຄະນະປະຈຳພັກແຂວງ, ກໍາມະການສູນກາງແນວລາວສ້າງຊາດ, ປະທານແນວລາວສ້າງຊາດ ແຂວງໄຊສົມບູນ, ມີອົງການປົກຄອງບ້ານ ພ້ອມດ້ວຍປະຊາຊົນຂອງ ສອງບ້ານດັ່ງກ່າວ ເຂົ້າຮ່ວມ.

ໃນພິທີ ທ່ານ ປະທານແນວລາວສ້າງຊາດບ້ານ ບ້ານຖໍ້າໂລ້ ແລະ ບ້ານ ກໍໄຮ ໄດ້ລາຍງານຜົນການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກ ຂອງປະຊາຊົນລາວບັນດາເຜົ່າ ຕະຫຼອດໄລຍະຜ່ານມາ ເຊິ່ງທ່ານໄດ້ໃຫ້ຮູ້ວ່າ ສອງບ້ານດັ່ງໄລຍະຜ່ານມາ ແນວລາວສ້າງຊາດເມືອງ ໄດ້ສົມທົບກັບອົງການປົກຄອງບ້ານ ໄດ້ນໍາເອົາບັນດາມາດຖານຂອງການສ້າງຄອບຄົວ ແລະ ບ້ານສາມັກຄີປອງດອງ ໄປເຜີຍແຜ່ ສຶກສາອົບຮົມ ໃຫ້ປະຊາຊົນແຕ່ລະຄອບຄົວ ໄດ້ຮັບຮູ້, ເຊື່ອມຊຶມ ແລະ ພ້ອມກັນຈັດຕັ້ງປະຕິບັດ, ໄດ້ມີແຜນການເປັນໄລຍະ ແລະ ລົງຕິດຕາມກວດກາ ເພື່ອປະເມີນຜົນໄດ້ຮັບຕົວຈິງ ໃນແຕ່ລະມາດຖານຂອງບ້ານສາມັກຄີປອງດອງ. ໃນໄລຍະຜ່ານມາປະຊາຊົນ ມີຄວາມຕື່ນຕົວທາງດ້ານການເມືອງ, ມີສະຕິຕໍ່ການຈັດຕັ້ງປະຕິບັດ ່ລະບຽບກົດຫມາຍ, ມີຄວາມສາມັກຄີປອງດອງກັນ, ເຄົາລົບນັບຖືໃຫ້ກຽດເຊິ່ງກັນ ແລະ ກັນ, ມີນ້ໍາໃຈເອື້ອເຟື້ອເພື່ອແຜ່ ແລະ ປົກປັກຮັກສາວັດທະນະທໍາ-ຮີດຄອງປະເພນີອັນດີງາມທີ່ເປັນເອກະລັກຂອງແຕ່ລະຊົນເຜົ່າ ເຊິ່ງມາຮອດປະຈຸບັນ ການປະເມີນສອງບ້ານເປັນບ້ານສາມັກຄີ ແມ່ນສໍາເລັດ. ພ້ອມກັນນີ້ ກໍໄດ້ມອບໃບຢັ້ງຢືນບ້ານສາມັກຄີ ປອງດອງໃຫ້ສອງບ້ານດັ່ງກ່າວ

ໂອກາດນີ້, ທ່ານ ປະທານແນວລາວສ້າງຊາດ ແຂວງໄຊສົມບູນໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວ ຂອງແນວລາວສ້າງຊາດ ເມືອງ, ອົງການປົກຄອງບ້ານ ແລະ ພໍ່ແມ່ປະຊາຊົນ ທີ່ສາມາດຍາດໄດ້ຜົນງານທີ່ພົ້ນເດັ່ນ ແລະ ເຮັດໃຫ້ແຕ່ລະບ້ານໄດ້ຮັບນາມມະຍາດເປັນບ້ານສາມັກຄີປອງດອງ ແລະ ທ່ານ ຍັງໄດ້ເນັ້ນຕື່ມວ່າ: ຄວາມສາມັນຄີປອງດອງແມ່ນຜົນສໍາເລັດຂອງວຽກງານທຸກປະການ ສະນັ້ນໃຫ້ແຕ່ລະຄອບຄົວຈົ່ງສືບຕໍ່ຮັກສາຄວາມສາມັກຄີອັນເປັນມູນເຊື້ອ ຂອງປະຊາຊົນລາວບັນດາເຜົ່າໄວ້; ໃຫ້ແນວລາວສ້າງຊາດເມືອງ ແລະ ອົງການປົກຄອງຂອງສອງບ້ານດັ່ງກ່າວສືບຕໍ່ຊີ້ນໍາ-ນໍາພາ ຢ່າງໃກ້ສິດ, ສຶບຕໍ່ ເຜີຍແຜ່ແນວທາງນະໂຍບາຍຂອງພັກ-ລະບຽບກົດຫມາຍຂອງລັດ, ນິຕິກໍາຕ່າງໆຂອງແນວລາວສ້າງຊາດ ໃຫ້ປະຊາຊົນໄດ້ຮັບຮູ້ຢ່າງທົ່ວເຖິງ, ຊຸກຍູ້ໃຫ້ຄອບຄົວ ແລະ ບ້ານທີ່ໄດ້ຮັບໃບຢັ້ງຢືນໃນຄັ້ງນີ້ໃຫ້ຮັກສາມູນເຊື້ອນາມມະຍົດຄອບຄົວ ແລະ ບ້ານ ສາມັກຄີປອງດອງ ດັ່ງກ່າວຕະຫຼອດໄປ.

 

info@lfnd.org.la | 021 213754 | (856-21) 453191