ສູນກາງແນວລາວສ້າງຊາດ

Lao Front For National Development

ບ້ານພູວຽງສະເຫຼີມສະຫຼອງບຸນກິນຈຽງປະຈຳປີ2016

ພິທີສະເຫຼີມສະຫຼອງບຸນກິນຈຽງປະຈຳປີ 2016 ຂອງຊົນເຜົ່າມົ້ງບ້ານພູວຽງ, ເມືອງງອຍ, ແຂວງຫຼວງພະບາງໄດ້ຈັດຂຶ້ນຢ່າງເປັນທາງການໃນວັນທີ 30 ທັນວາ 2016 ທີ່ຜ່ານມາ, ຢູ່ທີ່ເດີ່ນ ໂຮງຮຽນປະຖົມບ້ານພູວຽງ.

ເປັນກຽດເຂົ້າຮ່ວມງານບຸນກິນຈຽງມີທ່ານ ລັດຕະນະໄຊ ຄຳສີດາ, ກຳມະການພັກແຂວງ, ເລຂາພັກເມືອງ, ເຈົ້າເມືອງໆງອຍ, ທ່ານບຸນທັນ ດວງວິໄລແກ້ວ, ຮອງປະທານແນວລາວສ້າງຊາດ ແຂວງ, ມີທ່ານປະທານແນວລາວສ້າງຊາດເມືອງ, ຕາງໜ້າຫ້ອງການທີ່ກ່ຽວຂ້ອງຂອງເມືອງງອຍ, ນາຍບ້ານອ້ອມຂ້າງ ພ້ອມດ້ວຍປະຊາຊົນບັນດາເຜົ່າບ້ານພູວຽງ ແລະ ບ້ານອ້ອມຂ້າງເຂົ້າຮ່ວມຢ່າງ ຫຼວງຫຼາຍ. ໃນພິທີທ່ານນາຍບ້ານພູວຽງໄດ້ຂຶ້ນຜ່ານບົດສະຫຼຸບປະຈຳປີ 2016 ແລະ ທິດທາງແຜນ ການ 1 ປີຕໍ່ໜ້າໃຫ້ຜູ້ເຂົ້າຮ່ວມງານບຸນໄດ້ຮັບຊາບ. ບ້ານພູວຽງເປັນບ້ານຊົນເຜົ່າມົ້ງ, ມີ 59 ຄອບ ຄົວ, ມີພົນລະເມືອງທັງໝົດ 340 ຄົນ, ຍິງ 160 ຄົນ; ອາຊີບຕົ້ນຕໍຂອງປະຊາຊົນແມ່ນເຮັດສວນ ປູກເຂົ້າ, ອາຊີບສຳຮອງແມ່ນລ້ຽງສັດ ແລະປູກພືດເປັນສິນຄ້າ; ໃນໜຶ່ງປີຜ່ານມາສາມາດສະຫຼຸບ ລາຍຮັບຂອງບ້ານໄດ້ທັງໝົດໜຶ່ງຕື້ສອງຮ້ອຍກວ່າລ້ານກີບ, ສະເລ່ຍລາຍໄດ້ຕໍ່ຫົວຄົນໄດ້ 3 ລ້ານ ກີບຕໍ່ຄົນໃນປີ2016 ​ແລະ ໃນພິທີສະເຫຼີມສະຫຼອງບຸນກິນຈຽງປີ​ນີ້ ທາງ​ອົງການ​ປົກຄອງ​ທີ່​ກ່ຽວ​ຂອງ​​ເມືອງ​ງອຍ​ຍັງ​ໄດ້​ຈັດ​ພິທີ​ມອບ​-ຮັບ 3 ນາມມະຍົດ​ໃຫ້​ແກ່​ບ້ານ​ພູ​ວຽງຄື: ນາມມະຍົດບ້ານສາມັກຄີເປັນຕົວແບບທີ່ດີຂອງແນວລາວສ້າງຊາດ, ນາມມະຍົດບ້ານວັດທະນະທຳ ແລະ ນາມມະຍົດເປັນບ້ານປ້ອງກັນຄວາມສະຫງົບດີອີກດ້ວຍ.

ເພື່ອເຮັດໃຫ້ພິທີງານບຸນກິນຈຽງເຕັມໄປດ້ວຍຄວາມເບີດບານມ່ວນຊື່ນ ແລະ ມີເນື້ອໃນໜັກ ແໜ້ນນັ້ນ, ທ່ານ ບຸນທັນ ດວງວິໄລແກ້ວ, ຮອງປະທານແນວລາວສ້າງຊາດແຂວງຫຼວງພະບາງກໍ່ ໄດ້ເປັນກຽດອ່ານສານອວຍພອນຂອງທ່ານປະທານສູນກາງແນວລາວສ້າງຊາດ ຕໍ່ພິທີງານບຸນກິນຈຽງ ແລະພ້ອມນັ້ນ, ຍັງໄດ້ຮັບຟັງການໂອ້ລົມຈາກທ່ານ ລັດຕະນະໄຊ ຄຳສີດາ, ກຳມະການພັກແຂວງ, ເລຂາພັກເມືອງ, ເຈົ້າເມືອງໆງອຍ ເຊິ່ງທ່ານໄດ້ສະແດງຄວາມຊົມເຊີຍຕໍ່ຜົນງານທີ່ທາງ ຄະນະບ້ານ ແລະ ປະຊາຊົນບ້ານພູວຽງຍາດມາໄດ້ໃນໜຶ່ງປີຜ່ານມາ ພ້ອມທັງເນັ້ນໜັກໃຫ້ອົງການ ປົກຄອງບ້ານພູວຽງຈົ່ງເພີ່ມທະວີໃນວຽກງານປ້ອງກັນຊາດ-ປ້ອງກັນຄວາມສະຫງົບ, ເອົາໃຈໃສ່ປຸກ ລະດົມລູກຫຼານໃຫ້ໄດ້ຮັບການສຶກສາ, ໄດ້ຮັບການບໍລິການດ້ານສາທາລະນະສຸກ, ເພີ່ມທະວີ ຄວາມສາມັກຄີປະຊາຊົນບັນດາເຜົ່າໃຫ້ເປັນປຶກແຜ່ນແໜ້ນໜາພ້ອມກັນປົກປັກຮັກສາ ແລະ ສ້າງ ສາບ້ານຊ່ອງຂອງຕົນໃຫ້ຈະເລີນກ້າວໜ້າ; ພ້ອມກັນສະເຫຼີມສະຫຼອງບຸນກິນຈຽງດ້ວຍຄວາມເບີກ ບານມ່ວນຊື່ນ.

info@lfnd.org.la | 021 213754 | (856-21) 453191