ສູນກາງແນວລາວສ້າງຊາດ ຮ່ວມກັບອົງການກາແດງແຫ່ງຊາດລາວ ສ້າງຂະບວນການບໍລິຈາກເລືອດ ເພື່ອຂໍ່ານັບຊົມເຊີຍວັນສ້າງຕັ້ງແນວລາວສ້າງຊາດ ຄົບຮອບ 73 ປີ (13 ສິງຫາ 1950 – 13 ສິງຫາ 2023) ໂດຍເປັນກຽດເຂົ້າຮ່ວມ ຂອງທ່ານ ເຍ່ຍເກີຢ່າ ໜໍ່ຈໍຈົງຕົວ ຮອງປະທານສູນກາງແນວລາວສ້າງຊາດ, ທ່ານ ສຈ.ດຣ. ພູທອນ ເມືອງປາກ ປະທານອົງການກາແດງ ແຫ່ງຊາດລາວ, ມີບັນດາທ່ານຮອງປະທານ ສນຊ, ຫົວໜ້າກົມ, ຫົວໜ້າຫ້ອງການ, ສູນຝຶກອົບຮົມ ແລະ ພະນັກງານ-ລັດຖະກອນ ຂອງສູນກາງແນວລາວສ້າງຊາດ ພ້ອມດ້ວຍສະມາຄົມຄຸນຄ່າລາວ ເຂົ້າຮ່ວມ ວັນທີ 18 ສິງຫາ 2023 ທີ່ສູນກາງແນວລາວສ້າງຊາດ.

ທ່ານ ເຍ່ຍເກີຢ່າ ໜໍ່ຈໍຈົງຕົວ ໄດ້ມີຄໍາເຫັນຕໍ່ພິທີການສ້າງຂະບວນການບໍຈາກເລືອດເຊິ່ງກ່ອນອື່ນທ່ານໄດ້ຫວນຄືນປະປະຫວັດການກຳເນີດ, ການເຕີບໃຫຍ່ຂະຫຍາຍຕົວ ແລະມູນເຊື້ອອັນສະຫງ່າລາສີ ຂອງອົງການແນວລາວສ້າງຊາດ ໂດຍຫຍໍ້ ແລະ ໄດ້ຍ້ອງຍໍຊົມເຊີຍ, ຂອບໃຈຢ່າງຍິ່ງຕໍ່ຜູ້ທີສະໝັກບໍລິຈາກເລືອດໃນຄັ້ງນີ້ ເຊິ່ງເປັນການປະກອບສ່ວນຊ່ວຍເຫຼືອສັງຄົມ ແລະ ເປັນການປະກອບສ່ວນເຂົ້າໃນການສ້າງຂະບວນການຂ່ຳນັບຮັບຕ້ອນວັນສຳຄັນຕ່າງໆ ຂອງພັກ-ຂອງລັດ ກໍຄືວັນສ້າງຕັ້ງແນວລາວສ້າງຊາດ ຄົບຮອບ 73 ປີໃຫ້ເປັນຂະບວນການຟົດຟື້ນ.

ພ້ອມກັນນີ້, ທ່ານ ສຈ.ດຣ. ພູທອນ ເມືອງປາກ ປະທານອົງການກາແດງແຫ່ງຊາດລາວ ສະແດງຄວາມຍ້ອງຍໍຊົມເຊີຍຕໍ່ສູນກາງແນວລາວສ້າງຊາດ ທີ່ໄດ້ຈັດກິດຈະກຳດັ່ງກ່າວ ພ້ອມທັງໄດ້ຍົກໃຫ້ເຫັນເຖີງພາລະບົດບາດ, ສິດ ແລະ ໜ້າທີ ຂອງອົງການກາແດງແຫ່ງຊາດລາວ ແລະ ທ່ານໄດ້ກ່າວວ່າເລືອດແມ່ນມີຄວາມຄຳຄັນຫຼາຍຕໍ່ຊີວິດຂອງຄົນເຮົາ ເຊຶ່ງໃນເງື່ອນໄຂສັງຄົມໃນປັດຈຸບັນຍັງມີຄວາມຮຽກຮ້ອງຕ້ອງການເລືອດນັບມື້ນັບເພີ່ມຂຶ້ນ ດັ່ງນັ້ນການບໍລິຈາກເລືອດແມ່ນການຊ່ວຍເຫຼືອຊີວິດຂອງຄົນດ້ວຍກັນ.