ງານມະຫະກຳກິລາ ແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ໄດ້ປິດລົງຢ່າງເປັນທາງການດ້ວຍຜົນສຳເລັດອັນຈົບງາມ ໃນຕອນແລງວັນທີ 22 ທັນວາ 2022 ນີ້ ທີ່ສະໜາມກິລາໄຫຫີນ ບ້ານຄັງໜອງຫຼວງ ເມືອງແປກ ແຂວງຊຽງຂວາງ, ເປັນກຽດກ່າວປິດງານໂດຍ ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ; ເປັນກຽດເຂົ້າຮ່ວມມີ ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ທ່ານ ບຸນຈັນ ສີວົງພັນ ກຳມະການສູນກາງພັກ, ເຈົ້າແຂວງ ແຂວງຊຽງຂວາງ ປະທານຈັດງານມະຫະກໍາກິລາແຫ່ງຊາດ ຄັ້ງທີ XI, ມີບັນດາທ່ານການນໍາຈາກກະຊວງ-ອົງການ ແລະ ທ້ອງຖິ່ນ, ມີຄະນະນັກກິລາ ພ້ອມດ້ວຍປະຊົນລາວບັນດາເຜົ່າ ແລະ ສື່ມວນຊົນ ເຂົ້າຮ່ວມ.
ໃນພິທີດັ່ງກ່າວ, ໄດ້ຮັບຊົມການສະແດງສິລະປະ, ການເດີນຂະບວນສວນສະໜາມໂດຍມີ 31 ກ້ອນກຳລັງ. ພ້ອມກັນນັ້ນໄດ້ຮັບຟັງການກ່າວລາຍງານຜົນສໍາເລັດຂອງການແຂ່ງຂັນກິລາປະເພດຕ່າງໆ ທີ່ຈັດຂຶ້ນໃນຊຽງຂວາງເກມ ເຊິ່ງໄດ້ໃຫ້ຮູ້ວ່າ ໄດ້ຈັດພິທີເປີດງານຢ່າງເປັນທາງການ ໃນວັນທີ 13/12/2022 ແລະ ໄດ້ເລີ່ມແຂ່ງຂັນມາແຕ່ວັນທີ 14/11/2022; ມີ 22 ພາກສ່ວນເຂົ້າຮ່ວມ, ມີທີມນັກກິລາຈາກ 17 ແຂວງ, 1 ນະຄອນຫຼວງວຽງຈັນ ແລະ 4 ກະຊວງ, ມີນັກກິລາເຂົ້າຮ່ວມທັງໝົດ 3.093 ຄົນ ເພື່ອຊິງໄຊໃນ 25 ປະເພດກີລາ. ຜ່ານການແຂ່ງຂັນຕົວຈິງຂອງແຕ່ລະປະເພດກິລາ ນັກກິລາຂອງແຂວງຊຽງຂວາງ ສາມາດສ້າງຜົນງານໄດ້ຢ່າງໂດດເດັ່ນ ແລະ ໄດ້ເປັນເຈົ້າຫຼຽນຄໍາ ໂດຍຍາດມາໄດ້ເຖິງ 62 ຫຼຽນຄຳ, 60 ຫຼຽນເງິນ ແລະ 95 ຫຼຽນທອງ ເປັນອັນດັບທີ 1. ສ່ວນອັນດັບທີ 2 ນະຄອນຫຼວງວຽງຈັນ ໂດຍຍາດໄດ້ 58 ຫຼຽນຄຳ, 51 ຫຼຽນເງິນ ແລະ 97 ຫຼຽນທອງ ແລະ ອັນດັບທີ 3 ກະຊວງປ້ອງກັນປະເທດ ຍາດໄດ້ 51 ຫຼຽນຄໍາ, 49 ຫຼຽນເງິນ ແລະ 36 ຫຼຽນທອງ.
ໂອກາດນີ້, ນາຍົກລັດຖະມົນຕີ ແຫ່ງ ສປປ ລາວ ໄດ້ກ່າວຍ້ອງຍໍຊົມເຊີຍຕໍ່ຄະນະຮັບຜິດຊອບຈັດງານດັ່ງກ່າວ ແລະ ຮຽກຮ້ອງບັນດາຜູ້ເຂົ້າຮ່ວມພິທີ ພ້ອມກັນຊົມເຊີຍ ຕໍ່ຜົນສໍາເລັດຂອງງານມະຫາກຳກິລາແຫ່ງຊາດ ໃນຄັ້ງນີ້ ແລະ ໄດ້ກ່າວປິດພິທີຢ່າງເປັນທາງການ. ພ້ອມດຽວກັນນີ້ ໄດ້ມີການມອບ-ຮັບທຸງກິລາແຫ່ງຊາດ ໃຫ້ນະຄອນຫຼວງວຽງຈັນ ເຊິ່ງຈະເປັນເຈົ້າພາບຈັດງານມະຫາກຳກິລາແຫ່ງຊາດ ຄັ້ງທີ XII ໃນປີ 2025.
ເນື່ອງໃນໂອກາດທີ່ ທ່ານ ປະທານສູນກາງແນວລາວສ້າງຊາດ ເຂົ້າຮ່ວມງານດັ່ງກ່າວ ທ່ານໄດ້ພົບປະໂອ້ລົມກັບຄະນະກຳມະການແນວລາວສ້າງຊາດ ແຂວງຊຽງຂວາງ ໂດຍການຕ້ອນຮັບຈາກ ທ່ານ ນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດແຂວງຊຽງຂວາງພ້ອມດ້ວຍຄະນະ. ພ້ອມກັນນັ້ນ, ກໍໄດ້ມອບເຄື່ອງຊ່ວຍເຫຼືອຈຳນວນໜຶ່ງໃຫ້ແນວລາວສ້າງຊາດແຂວງ ເພື່ອນຳໄປມອບຕໍ່ໃຫ້ປະຊາຊົນ ທີ່ປະສົບກັບໄພໜາວໃນລະດູໜາວນີ້.
