ສູນກາງແນວລາວສ້າງຊາດ

Lao Front For National Development

ປະທານສູນກາງແນວລາວສ້າງຊາດລົງຊຸກຍູ້ວຽກງານແນວລາວສ້າງຊາດຢູ່ແຂວງຫົວພັນ.

ໃນບັນຍາກາດຂໍ່ານັບຊົມເຊີຍວັນຊາດທີ 2 ທັນວາ​ຄົບຮອບ​ 48​ ປີ,​ວັນເກີດປະທານໄກສອນ ພົມວິຫານ ຄົບຮອບ 103 ປີ (13​ທັນວາ​)​ ແລະຂໍ່ານັບຮັບຕ້ອນວັນສ​້າງຕັ້ງ​ກອງທັບປະຊາຊົນລາວ​ ຄົບຮອບ​ 75 ປີ(20​ ມັງກອນ2024), ວັນເກີດປະທານຄໍາໄຕ ສີພັນດອນຄົບຮອບ 100 ປີ(8​ ກຸມພາ​ 2024)​ ທີ່ຈະມາເຖິງ; ສະນັ້ນ,​ໃນລະຫວ່າງວັນທີ 13-15 ທັນວາ​2023 ນີ້​, ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ(ສນຊ)​ ພ້ອມຄະນະ ໄດ້ລົງຊຸກຍູ້ວຽກງານແນວລາວສ້າງຊາດຢູ່ແຂວງຫົວພັນ ໂດຍການຕ້ອນຮັັັັັບຂອງ ທ່ານ ຄໍາແພງ ໄຊສົມແພງ ກຳມະການສູນກາງພັກ ເລຂາພັກແຂວງ ເຈົ້າແຂວງຫົວພັນ ພ້ອມດ້ວຍຄະນະປະຈຳພັກແຂວງ ທີ່ສະໜາມບິນໜອງຄ້າງ ແຂວງ ຫົວພັນ.


ໂອການເຄື່ອນໄຫວເຮັດວຽກຢູ່ແຂວງຫົວພັນເທື່ອນີ້, ທ່ານປະທານສູນກາງແນວລາວສ້າງຊາດໄດ້ພົບປະຢ້ຽມຢາມພະນັກງານແນວລາວສ້າງຊາດແຂວງຫົວພັນ, ແນວລາວສ້າງຊາດເມືອງວຽງໄຊ, ອົງການປົກຄອງເມືອງ ວຽງໄຊ ແລະຜູ້ຊົງຄຸນວຸທິ ຢູ່ ເມືອງ ວຽງໄຊ, ໄດ້ຮັບຟັງການລາຍງານຫຍໍ້ ກ່ຽວກັບສະພາບການເຄື່ອນໄຫວ ແລະ ການພັດທະນາລວມຂອງແຂວງຫົວພັນ, ເຊິ່ງປະກອບມີ 10 ເມືອງ, ມີ 724 ບ້ານ ມີ 9 ຊົນເຜົ່າ ປະຊາຊົນສ່ວນຫຼາຍແມ່ນເຮັດອາຊີບປູກຝັງ-ລ້ຽງສັດ, ແນວລາວສ້າງຊາດແຂວງ ແລະ ເມືອງໄດ້ເອົາໃຈໃສ່ວຽກງານການສ້າງຄອບຄົວ, ບ້ານ ສາມັກຄີປອງດອງ ທີ່ສາມາດບັນລຸໄດ້ 10 ເມືອງໃນທົ່ວແຂວງ, ໄດ້ເອົາໃຈໃສ່ໃນການໂຄສະນາປຸກລະດົມປະຊາຊົນບັນດາເຜົ່າເຂົ້າຮ່ວມຂະບວນການສັກຢາກັນພະຍາດ, ຂະບວນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການຈັດຕັ້ງສອງວາລະແຫ່ງຊາດ ແລະ ຂະບວນການອື່ນໆ. ໄດ້ສົມທົບກັບພາກສ່ວນກ່ຽວຂອງລົງແກ້ໄຂຂໍ້ຂັດແຍ່ງທີ່ດີນທໍາການຜະລິດ ແລະໂຄງການຈໍານວນໜຶ່ງ ທີ່ຕິດພັນກັບເນື້ອທີ່ການຜະລິດຂອງປະຊາຊົນ, ໄດ້ສຶກສາອົບຮົມຜູ້ທີ່ເຊື້ອຖືສາສະໜາ ໃຫ້ເຄື່ອນໄຫວຖືກຕ້ອງຕາມດໍາລັດ 315.


ໃນການພົບປະຄັ້ງນີ້, ທ່ານປະທານສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ການເຄື່ອນໄຫວ ແລະ ການພັດທະນາລວມຂອງແຂວງຫົວພັນ ໃນໄລຍະຜ່ານມາ ແລະ ເຫັນການພັດທະນາທີ່ເປັນໂສມໜ້າໃໝ່ຂອງແຂວງ, ໂດຍສະເພາະປະຈຸບັນໄດ້ມີສະໜານບິນໜອງຄ້າງ, ຊື່ງເປັນໜໍ່ແໜງຂອງຄວາມຮູຸ່ງເຮືອງ ແລະ ໄດ້ຊົມເຊີຍຕໍ່ 5 ວິໄສທັດໃນການພັດທະນາຕົວເມືອງຂອງເມືອງວຽງໄຊ, ພ້ອມດຽວກັນນັ້ນ ທ່ານ ສິນລະວົງ ຄຸດໄພທູນ ຍັງໄດ້ເນັ້ນໜັກວຽກງານແນວລາວສ້າງຊາດ ທີ່ເປັນຫຼັກແຫຼ່ງເຕົ້າໂຮມຄວາມສາມັກຄີປວງຊົນລາວບັນດາເຜົ່າ, ກ່ອນອື່ນໝົດຕ້ອງສ້າງຄວາມຮັບຮູ້ຄວາມເຂົ້າໃຈ ຕໍ່ວຽກງານແນວໂຮມ, ຊື່ງເປັນວຽກງານການເມືອງໃນການປຸກລຸກຂົນຂວາຍສຶກສາອົບຮົມເຕົ້າໂຮມຄວາມສາມັກຄີ ໂດຍປະກອບມີ 4 ເສົາຄໍ້າ: ເຕົ້າໂຮມຄວາມສາມັກຄີບັນດາເຜົ່າ, ສາມັກຄີສາສະໜາ, ຊັ້ນຄົນໃນສັງຄົມ, ເຕົ້າໂຮມຄວາມສາມັກຄີເປັນປຶກແຜ່ນພີ່ນ້ອງຄົນລາວທີ່ຢູ່ຕ່າງປະເທດ. ພ້ອມກັນນີ້, ກໍໄດ້ແນະນໍາຄຸນລັກສະນະຂອງກໍາມະການແນວລາວສ້າງຊາດ ຄວນປະກອບດ້ວຍ 4 ຄຸນລັກສະນະ ຫຼື 4 ເສີມສ້າງ: ເສີມສ້າງຄຸນງາມຄວາມດີ; ເສີມສ້າງຄວາມສາມັກຄີ; ເສີມສ້າງຄຸນວຸດທິ; ເສີມສ້າງຄຸນນະທໍາ.


ວຽກງານແນວລາວສ້າງຊາດໃນສະໄໝທີ XI ໄດ້ສຸມໃສ່ສ້າງ 4 ການຫັນປ່ຽນ: ຍົກສູງຄຸນນະພາບການເຄື່ອນໄຫວຂອງແນວລາວສ້າງຊາດແຕ່ລະຂັ້ນ, ໂດຍເລັ່ງໃສ່ສ້າງການຫັນປ່ຽນ ແລະ ແກ້ໄຂຂອດທີ່ຍັງຫຍຸ້ງຍາກ, ຂໍ້ຄົງຄ້າງຕົ້ນຕໍໃນການປະຕິບັດມະຕິຂອງແນວລາວສ້າງຊາດຂັ້ນຂອງຕົນ ເປັນຕົ້ນ ຄວາມຫຍຸ້ງຍາກດ້ານລາຍຮັບ ທີ່ອາໄສຈາກງົບປະມານຂອງລັດພຽງແຫຼ່ງດຽວ ມາສູ່ການສ້າງລາຍຮັບເພີ່ມເຕີມ ທີ່ບໍ່ຜິດກົດໝາຍໃຫ້ຫຼາຍຂຶ້້ນ; ສ້າງການຫັນປ່ຽນດ້ານຮູບການ ແລະ ວິທີການປຸກລະດົມຂົນຂວາຍຊວນເຊື່ອປະຊາຊົນຊັ້ນຄົນຕ່າງໆ ເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາ, ໂດຍສຸມໃສ່ຈັດຕັ້ງປະຕິບັດຄໍາຮຽກຮ້ອງຂອງສູນກາງພັກ-ລັດຖະບານ ກໍຄືຄະນະພັກ-ອົງການປົກຄອງທ້ອງຖິ່ນ ແລະ ຂະແໜງການຂອງຕົນ ໃຫ້ແທດກັບຕົວຈິງ ແລະ ນໍາເອົາໝາກຜົນຂອງການແຂ່ງຂັນເຫຼົ່ານັ້ນ ມາໃຫ້ປະຊາຊົນບັນດາເຜົ່າ; ສ້າງການຫັນປ່ຽນດ້ານຮູບແບບການຮ່ວມສໍາພັນ ລະຫວ່າງອົງການພາຄີດ້ວຍກັນ ໃນການເຄື່ອນໄຫວວຽກງານມະຫາຊົນໃຫ້ໄປຕາມທິດລວງດຽວກັນ, ຮ່ວມມືຊ່ວຍໜູນ ແລະ ສ້າງຄວາມເຂັ້ມແຂງໃຫ້ແກ່ກັນ ແລະ ກັນ ເປັນຕົ້ນຢູ່ຂັ້ນຮາກຖານ.


ເພື່ອເປັນການສ້າງຂະບວນການຮັກບ້ານເກີດ, ທ່ານ ສິນລະວົງ ຄຸດໄພທູນ ອາດິດນັກສຶກສາ ໂຮງຣຽນ ສ້າງຄູ ນາຄາວ ໄດ້ສະແດງຄວາມຮູ້ບຸນຄຸນ ຄິດຮອດຄິດເຖິງ ໂຮງຮຽນເກົ່າທີ່ຕົນເຄີຍສຶກສາຮໍ່າຮຽນ ເຖິງຈະຈາກໄປເປັນເວລາ 50 ປີຜ່ານແລ້ວແຕ່ຍັງບໍ່ລືມບຸນຄຸນ, ທ່ານມາຄັ້ງນີ້, ຍັງໄດ້ນໍາເອົາເງິນສົດຈໍານວນ 356 ລ້ານ ມອບໃຫ້ໂຮງຮຽນມັດທະຍົມນາຄາວ ເພື່ອນໍາໃຊ້ເຂົ້າໃນການກໍ່ສ້າງຫໍສະໝຸດ ໃຫ້ນັກຮຽນ, ຊາວໜຸ່ມ ໄດ້ອ່ານ ຫຼື ສຶກສາຮໍ່າຮຽນຕື່ມອີກ; ຈາກນັ້ນ, ຄະນະຍັງໄດ້ໄປຢ້ຽມຊົມຖໍ້າທ່ານຜູ້ນໍາຄື: ຖໍ້າປະທານໄກສອນ ພົມວິຫານ, ຖໍ້າທ່ານໜູຮັກ ພູມສະຫວັນ, ຖໍ້າທ່ານ​ ສຸພານຸວົງ, ຖໍ້າທ່ານ​ ຄໍາໄຕ ສີພັນດອນ, ຖໍ້າທ່ານ​ ພູມີ ວົງວິຈິດ, ຖໍ້າແນວລາວຮັກຊາດ, ຫໍມູນເຊື້ອແນວລາວສ້າງຊາດເມືອງວຽງໄຊ ແລະ ຍັງໄດ້ໄປຢ້ຽມຊົມຖໍ້າຄວາຍ, ຊື່ງອາດິດເຄີຍໃຊ້ເປັນບ່ອນສຶກສາຮໍ່າຮຽນ ເອີ້ນວ່າ“ໂຮງຮຽນຖໍ້າຄວາຍ”, ນອກຈາກນັ້ນ, ຍັງໄດ້ທ່ຽວຊົມສະຖານທີ່ທ່ອງທ່ຽວທາງປະຫວັດສາດ ແລະ ທໍາມະຊາດຂອງເມືອງວຽງໄຊອີກດ້ວຍ.

info@lfnd.org.la | 021 213754 | (856-21) 453191