ສູນກາງແນວລາວສ້າງຊາດ

Lao Front For National Development

ປະທານສູນກາງແນວລາວສ້າງຊາດເຂົ້າຮ່ວມພິທີເປີດງານວາງສະແດງບັນດາຊົນເຜົ່າ ແລະ ເປີດປີທ່ອງທ່ຽວທີ່ສວນພຶກສາ

ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີບັນດາທ່ານລັດຖະມົນຕີ, ຮອງປະທານສູນກາງແນວລາວສ້າງຊາດ ແລະ ແຂກຖືກເຊີນ ເຂົ້າຮ່ວມພິທີເປີດງານວາງສະແດງບັນດາຊົນເຜົ່າ ແລະ ເປີດປີທ່ອງທ່ຽວເມືອງນາຊາຍທອງ ທີ່ສວນພຶກສາ ເມືອງນາຊາຍທອງ ນະຄອນຫຼວງວຽງຈັນ ໃນວັນທີ 22 ມີນາ 2025.
ໃນພິທີເປີດງານດັ່ງກ່າວ ທ່ານ ພູວົງ ພະມີສິດ ກຳມະການສູນກາງແນວລາວສ້າງຊາດ, ປະທານສວນພຶກສາ ໄດ້ລາຍງານສະພາບລວມ ແລະ ຈຸດພິເສດ ຂອງສວນພຶກສາ. ພ້ອມກັນນີ້, ທ່ານ ສຸລິວັນ ພົມມະຫາໄຊ ເຈົ້າເມືອງນາຊາຍທອງ ໄດ້ສະແດງຄວາມຍິນດີຕ້ອນຮັັບ ນັກທ່ອງທ່ຽວທັງພາຍໃນ ແລະ ຕ່າງປະເທດທ່ຽວຊົມແຫ່ຼງທ່ອງທ່ຽວຕ່າງໆ ຂອງເມືອງນາຊາຍທອງ.
ໂອກາດນີ້, ທ່ານ ປະທານສູນກາງແນວລາວສ້າງຊາດ ໄດ້ມີຄຳເຫັນຕໍ່ພິທີດັ່ງກ່າວເຊິ່ງກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ທ່ານ ພູວົງ ພະມີສິດ ທີ່ໄດ້ສ້າງແຫຼ່ງທ່ອງທ່ຽວສວນພຶກສາ ເຊິ່ງມີກິດຈະກຳຫຼາຍຢ່າງເປັນຕົ້ນແມ່ນບັນດາເຮືອນຊົນເຜົ່າ, ວັດຖຸພັນຕ່າງໆ ທີ່ສະແດງເຖີງເອກະລັກຂອງບັນດາຊົນເຜົ່າ, ທັງເປັນບ່ອນສະໜອງຂໍ້ມູນ, ເປັນທ່າແຮງໃຫ້ແກ່ການສ້າງເສດຖະກິດ ຂອງເມືອງນາຊາຍທອງ, ນີ້ກໍ່ແມ່ນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ. ຈາກນັ້ນ, ທ່ານ ປະທານສູນກາງແນວລາວສ້າງຊາດ ພ້ອມດ້ວຍແຂກ, ມວນຊົນບັນດາເຜົ່າ ກໍໄດ້ທ່ຽວຊົມຫ້ອງວາງສະແດງຂອງບັນດາຊົນເຜົ່າ, ທ່ຽວຊົມເຮືອນທີ່ເປັນເອກະລັກຂອງບັນດາເຜົ່າ ແລະ ທ່ຽວຊົມສິນຄ້າຈຳນວນໜຶ່ງຕື່ມອີກ.
ຂ່າວ+ພາບ: ເລົ່າລໍ່
ບກ: ພ.ບຸບຜາ
info@lfnd.org.la | 021 213754 | (856-21) 453191