ສູນກາງແນວລາວສ້າງຊາດ

Lao Front For National Development

ປະທານແນວລາວສ້າງຊາດເມືອງຊຽງຮ່ອນ ລົງຊີ້ນຳວຽກງານແນວລາວສ້າງຊາດ ຢູ່ບ້ານລາວສະໂນ ​ແລະ ບ້ານ​ນາ​ອອນ

ວັນທີ 9 ກໍລະກົດ 2021 ນີ້, ທ່ານ ທອງຂາວ ສຸດຈະລິດ ກຳມະການປະຈຳພັກເມືອງ,ປະທານແນວລາວສ້າງຊາດເມືອງຊຽງຮ່ອນ ໄດ້ເຂົ້າຮ່ວມກອງປະຊຸມລາຍງານສ່ອງແສງວຽກງານການນຳພາຮອບດ້ານ ຂອງພະນັກງານຮັບຜິດຊອບຊີ້ນຳບ້ານ ແລະ ອຳນາດການປົກຄອງບ້ານ ຢູ່ທີ່ຫ້ອງການບ້ານນາອອນ ເມືອງຊຽງຮ່ອນ ແຂວງໄຊຍະບູລີ, ໂດຍມີພະນັກງານຮັບຜິດຊອບຊີ້ນຳບ້ານ, ຫົວໜ້າ ປກສ ກຸ່ມບ້ານ,ນາຍບ້ານ ແລະ ປະທານແນວລາວສ້າງຊາດບ້ານເຂົ້າຮ່ວມ.

ກອງປະຊຸມໄດ້ຮັບຟັງການລາຍງານສະພາບລວມ ໃນການຈັດຕັ້ງປະຕິບັດວຽກງານຂອງບ້ານໃນໄລຍະຜ່ານມາ, ຈາກນັ້ນ ກໍ່ໄດ້ປະກອບຄຳເຫັນແລກປ່ຽນກັນຢ່າງກົງໄປກົງມາ.

ທ່ານ ທອງຂາວ ສຸດຈະລິດ ມີຄຳເຫັນໂອ້ລົມ ແລະ ເນັ້ນບາງບັນຫາທີ່ສຳຄັນດັ່ງນີ້: 1 ອຳນາດການປົກບ້ານຕ້ອງສືບຕໍ່ເອົາໃຈໃສ່ໂຄສະນາ, ປຸກລະດົມຂົນຂວາຍ, ສຶກສາອົບຮົມການເມືອງ-ແນວຄິດໃຫ້ບັນດາພໍ່ແມ່ປະຊາຊົນພາຍໃນບ້ານຂອງຕົນ ເພື່ອເຮັດໃຫ້ເຂົາເຈົ້າຮູ້ສິດເປັນເຈົ້າໃນການຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ ໃຫ້ມີປະສິດຕິຜົນສູງຂື້ນເລື່ອຍໆ; 2 ອຳນາດການປົກຄອງບ້ານຕ້ອງເຂົ້າໃຈ ແລະ ກຳແໜ້ນພາລະບົດບາດ, ສິດ ແລະ ໜ້າທີ່ຂອງຕົນ; 3 ເອົາໃຈໃສ່ ສຶກສາອົບຮົມປະຊາຊົນບັນດາເຜົ່າໃຫ້ເຂົ້າໃຈຕໍ່ດຳລັດ 315/ລບ ວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາຢູ່ ສປປ ລາວ; 4 ສືບຕໍ່ຍູ້ແຮງສ້າງຂະບວນການດ້ານຕ່າງໆ ເພື່ອຊຸກຍູ້ຂະບວນການແກ້ໄຂຄວາມທຸກຍາກ, ຂະຫຍາຍກອງທຶນພັດທະນາພາຍໃນບ້ານໃຫ້ຫຼາຍຂື້ນ; 5 ສືບຕໍ່ເອົາໃຈໃສ່ເປັນເຈົ້າການ ຊ່ວຍກັນຕ້ານ ແລະ ແກ້ໄຂບັນຫາປະກົດການຫຍໍ້ທໍ້ຕ່າງໆ ທີ່ເກີດຂຶ້ນພາຍໃນບ້ານ ໃຫ້ຫຼຸດໜ້ອຍຖອຍລົງ.

info@lfnd.org.la | 021 213754 | (856-21) 453191