ສູນກາງແນວລາວສ້າງຊາດ

Lao Front For National Development

ປະທານແນວລາວສ້າງຊາດແຂວງ ສະຫວັນນະເຂດລົງເຄື່ອນໄຫວຊຸກຍູ້, ຕິດຕາມ, ກວດກາ ການຈັດຕັ້ງປະຕິບັດວຽກງານປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງເຊື້ອພະຍາດໂຄວິດ – 19

ໃນຕອນເຊົ້າຂອງວັນທີ 29 ເມສາ 2021 ນີ້ ທ່ານ ຄຳແພງ ເພັດທຸມພອນ ຄະນະປະຈຳພັກແຂວງ ປະທານແນວລາວສ້າງຊາດແຂວງ ສະຫວັນນະເຂດ ໄດ້ລົງເຄື່ອນໄຫວຕິດຕາມ, ກວດກາ ແລະ ຊຸກຍູ້ ການຈັດຕັ້ງປະຕິບັດວຽກງານປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຂອງຄະນະສະເພາະກິດຂັ້ນເມືອງ ແລະ ຂັ້ນບ້ານຢູ່ແຕ່ລະຈຸດກວດກາ ເຊິ່ງປະກອບມີ 4 ຈຸດຄື : ຈຸດກວດກາດ່ານພະນົມພອນ, ຈຸດກວດກາ ບ້ານທາດດອກແກ້ວ ເມືອງອາດສະພອນ,ຈຸດກວດກາບ້ານຫລຽນໄຊ,ຈຸດກວດບ້ານ ດອນປ່າໄລ່ເມືອງ ອາດສະພັງທອງ.

ໃນການລົງເຄື່ອນໄຫວໃນຄັ້ງນີ້ ໄດ້ຮັບຟັງການລາຍງານຈາກຄະນະສະເພາະກິດທັງ 4 ຈຸດ ວ່າໄດ້ເອົາໃຈໃສ່ໃນການເວນຍາມ, ຕິດຕາມກວດກາຢ່າງເຂັ້ມງວດ ໂດຍສະເພາະແມ່ນ ການບັນທຶກຄົນເຂົ້າ – ອອກ, ກວດກາເອກະສານການອະນຸຍາດເດີນທາງຂອງບຸກຄົນທີ່ມີຄວາມຈໍາເປັນ, ການວັດແທກອຸຫະພູມ, ພ້ອມທັງໄດ້ຊີ້ແຈງແນະນໍາລາຍລະອຽດຕ່າງໆ ກ່ຽວກັບບັນດາມາດຕະການໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ -19 ໃຫ້ພໍ່ແມ່ປະຊາຊົນໄດ້ເຂົາໃຈ.

ໃນໂອກາດນີ້, ທ່ານ ປະທານແນວລາວສ້າງຊາດແຂວງ ໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະສະເພາະກິດຂັ້ນເມືອງ ແລະ ຂັ້ນບ້ານ ທີ່ໄດ້ພ້ອມກັນເອົາໃຈໃສ່ໃນການຈັດຕັ້ງປະຕິບັດຜັນຂະຫຍາຍບັນດາ ຄໍາສັ່ງ, ແຈ້ງການຕ່າງໆຂອງຂັ້ນເທິງ ຢ່າງເຂັ້ມງວດ ແລະ ທ່ານ ໄດ້ເນັ້ນຕື່ມວ່າ: ໃຫ້ມີການຈົດບັນທຶກປະຫວັດຜູ້ເດີນທາງໃຫ້ລະອຽດໃນແຕ່ລະວັນ ເພື່ອບໍ່ໃຫ້ສັບສົນ, ເອົາໃຈໃສ່ໂຄສະນາເຜີຍແຜ່ ບັນດາຂໍ້ມູນຂ່າວສານທີ່ຖືກຕ້ອງ ໃຫ້ອໍານາດການປົກບ້ານ ແລະ ພໍ່ແມ່ປະຊາຊົນໄດ້ເຂົ້າໃຈຢ່າງທົ່ວເຖິງ ໂດຍສະເພາະກໍ່ແມ່ນການກັກໂຕຢູ່ເຮືອນຂອງໃຜລາວ, ການຮັກສາໄລຍະຫ່າງ, ໝັ່ນລ້າງມືໃສ່ສະບູ ຫຼື ເຈວລ້າງມື  ແລະ ໃຊ້ຜ້າປິດປາກ-ດັງ ເປັນຕົ້ນ.

info@lfnd.org.la | 021 213754 | (856-21) 453191