ສູນກາງແນວລາວສ້າງຊາດ

Lao Front For National Development

ປະທານແນວລາວສ້າງຊາດແຂວງໄຊຍະບູລີ ເຄື່ອນ​ໄຫຼວ​ວຽກ​ງານ​ຢູ່ເມືອງຄອບ

ວັນທີ 22 ມີຖຸນາ 2021 ທ່ານ ຄໍາສີ ແພງສະຫວັນ ​ກຳ​ມະ​ການປະ​ຈຳພັກແຂວງ ປະທານແນວລາວສ້າງຊາດແຂວງໄຊຍະບູລີ ພ້ອມດ້ວຍ​ຄະນະ ໄດ້ລົງຊຸກຍູ້ວຽກງານຮອບດ້ານຂອງອົງ​ການແນວລາວສ້າງຊາດ ຢູ່ເມືອງຄອບ, ໂດຍ​ການ​ຕ້ອນ​ຮັບ​ຂອງທ່ານ ອ່ອນຈັນ ອິນທະພົມ ກຳ​ມະ​ການ​ປະ​ຈຳພັກເມືອງ ປະທານແນວລາວສ້າງຊາດເມືອງ.

ທ່ານ​ປະ​ທານ​ແນວ​ລາວ​ສ້າງ​ຊາດ​ເມືອງ ໄດ້ລາຍງານສະ​ພາບການຈັດຕັ້ງປະຕິບັດວຽກງານ ຂອງ​ແນວລາວສ້າງຊາດເມືອງ ໃນໄລຍະຜ່ານມາ ຊຶ່ງທ່ານໄດ້ໃຫ້ຮູ້ວ່າເມືອງຄອບມີ 28 ບ້ານ ມີພົນລະເມືອງມີທັງໝົດ 21,154 ຄົນ, ຍິງ 10,432 ຄົນ, ມີ 6 ເຜົ່າ ແລະ ໄດ້ເປີດຂະບວນການສ້າງຄອບຄົວ ແລະ ບ້ານສາມັກຄີປອງດອງສຳເລັດແລ້ວ 28 ບ້ານ, ໄດ້ລົງກວດກາປະເມີນແລ້ວ 26 ບ້ານ, ໄດ້ປະກາດເປັນບ້ານສາມັກຄີ ປອງດອງສຳເລັດແລ້ວ 25 ບ້ານ ແລະ ໄດ້ມອບໃບຢັ້ງຢືນຄອບຄົວສາມັກຄີປອງດອງແລ້ວ 23 ບ້ານ.

ໃນຕອນທ້າຍ ທ່ານ ປະທານແນວລາວສ້າງຊາດແຂວງໄຊຍະບູລີ ໄດ້ສະແດງຄວາມ​ຍ້ອນ​ຍໍຊົມເຊີຍຕໍ່ບັນດາຜົນງານ ແລະ ຜົນສໍາເລັດທີ່​ຄະ​ນະ​ກຳ​ມະ​ການ​ແນວ​ລາ​ວ​ສ້າງ​ຊາດເມືອງ ຍາດມາໄດ້ໃນໄລຍະຜ່ານມາ ແລະ ທ່ານຍັງໄດ້ເນັ້ນຕື່ມວ່າ ໃຫ້ຄະນະກຳມະການແນວລາວສ້າງຊາດເມືອງ, ພະນັກງານ-ລັດຖະກອນ ຈົ່ງສືບຕໍ່ເຕົ້າໂຮມຄວາມສາມັກຄີປອງດອງ ປະຊາຊົນບັນດາເຜົ່າ ໃຫ້ເປັນປຶກແຜ່ນແໜ້ນໜາ, ມີຄວາມຊ່ວຍເຫຼືອເຊິ່ງກັນ ແລະ ກັນ, ພະນັກງານແຕ່ລະຄົນຕ້ອງໝັ່ນຄົ້ນຄວ້າບັນດາກົດໝາຍ ແລະ ນິຕິກໍາຂອງແນວລາວສ້າງຊາດໃຫ້ຫຼາຍຂື້ນ ເຮັດໃຫ້ສາມາດຮັບຮູ້, ເຂົ້າໃຈ ເພື່ອເປັນບ່ອນອິງໃນການເຄື່ອນໄຫວວຽກງານ ໃຫ້ໄດ້ຮັບຜົນສຳເລັດຫຼາຍຶ້ນ, ເອົາໃຈໃສ່ສືບຕໍ່ຈັດຕັ້ງປະຕິບັດວຽກງານຂະບວນການສ້າງຄອບຄົວ ແລະ ບ້ານສາມັກຄີປອງດອງ ເພື່ອເຮັດໃຫ້ສາມາດປະກາດເມືອງຄອບເປັນເມືອງສາມັກຄີໃນຕໍ່ໜ້າ ເພາະວ່າແຂວງໄຊຍະບູລີ ແມ່ນຈະໄດ້ເປີດເປັນແຂວງສາມັກຄີປອງດອງ ໃນປີ 2024.

info@lfnd.org.la | 021 213754 | (856-21) 453191