ສູນກາງແນວລາວສ້າງຊາດ

Lao Front For National Development

ປະທານແນວລາວສ້າງຊາດແຂວງ ບໍ່ແກ້ວ ລົງເຄື່ອນໄຫວເຮັດວຽກ ຢູ່ເມືອງຕົ້ນເຜິ້ງ

ໃນວັນທີ 9 ກໍລະກົດ 2021 ຜ່ານມານີ້ ຢູ່ທີ່ສະໂມສອນເມືອງຕົ້ນເຜິ້ງ, ທ່ານ ດາລີວັນ ພູສະຫວັນ ຄະນະປະຈໍາພັກແຂວງ ປະທານແນວລາວສ້າງຊາດແຂວງບໍ່ແກ້ວ ພ້ອມດ້ວຍຄະນະ ໄດ້ລົງຊຸກຍູ້ວຽກງານຮອບດ້ານ ໃຫ້ແກ່ ແນວລາວສ້າງຊາດເມືອງ ແລະ ອົງການຈັດຕັ້ງມະຫາຊົນ ເມືອງ, ເຂົ້າຮ່ວມມີ ທ່ານ ບຸນທັນ ບຸນທີ່ໄຊ ຄະນະປະຈໍາພັກເມືອງ ປະທານແນວລາວສ້າງຊາດເມືອງຕົ້ນເຜິ້ງ, ຄະນະກໍາມະການແນວລາວສ້າງຊາດເມືອງ, ຫົວໜ້າ-ຮອງຫົວໜ້າຫ້ອງການ ແລະ ຕາງໜ້າຈາກອົງການຈັດຕັ້ງມະຫາຊົນ ອ້ອມຂ້າງເມືອງ ຕະຫຼອດຮອດພະນັກງານ-ລັດຖະກອນພາຍໃນຫ້ອງການແນວລາວສ້າງຊາດເມືອງ ເຂົ້້າຮ່ວມ.

ກອງປະຊຸມ, ໄດ້ຮັບຟັງການລາຍງານສະພາບລວມ ໃນການຈັດຕັ້ງປະຕິບັດວຽກງານ ຂອງແນວລາວສ້າງຊາດ ແລະ ອົງການຈັດຕັ້ງມະຫາຊົນ ເມືອງ ໃນໄລຍະ 6 ເດືອນຜ່ານມາ ແລະ ທິດທາງແຜນການໃນຕໍ່ໜ້າ ເຊິ່ງໄດ້ຍົກໃຫ້ເຫັນເຖິງຜົນງານທີ່ພົ້ນເດັ່ນຫຼາຍດ້ານ ເປັນຕົ້ນ: ວຽກງານການເຕົ້າໂຮມຄວາມສາມັກຄີປະຊາຊົນລາວບັນດາເຜົ່າ ໃນໄລຍະຜ່ານມາ ສາມາດປະກາດຮັບຮອງຄອບຄົວ ແລະ ບ້ານສາມັກຄີປອງດອງ ໄດ້ 7 ບ້ານ, ມີ 940 ຄອບຄົວ, ເຂົ້າຮ່ວມຕະລຸມບອນຊ່ວຍວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ເມືອງ ຕົ້ນເຜິ້ງ ດ້ວຍຄວາມຮັບຜິດຊອບສູງ, ສາມາດລະດົມທຶນຮອນເພື່ອປະກອບສ່ວນສ້າງພຣະເຈົ້າໃຫຍ່ປຣາລະມີສີໂຄມຄໍາ ເປັນມູນຄ່າ 3 ລ້ານກ່ວາກີບ, ສໍາເລັດການມອບພໍ່ພັນ-ແມ່ພັນໝູ ຈໍານວນ 22 ໂຕ ແລະ ອຸປະກອນຈໍານວນໜຶ່ງ ລວມເປັນມູນຄ່າ 27 ລ້ານກວ່າກີບ ໃຫ້ກັບພໍ່ແມ່ປະຊາຊົນບ້ານຍາງໃຕ້ ແລະ ສໍາເລັດການມອບພໍ່ພັນ-ແມ່ພັນແບ້ ຈໍານວນ 14 ໂຕ ແລະ ອຸປະກອນຈໍານວນໜຶ່ງ ລວມມູນຄ່າ 29 ລ້ານກວ່າກີບ ໃຫ້ກັບພໍ່ແມ່ປະຊາຊົນ ບ້ານຫ້ວຍລົມ.

ໂອກາດນີ້, ທ່ານ ດາລີວັນ ພູສະຫວັນ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ ທີ່ແນວລາວສ້າງຊາດເມືອງ ແລະ ອົງການຈັດຕັ້ງມະຫາຊົນ ອ້ອມຂ້າງເມືອງ ສາມາດຍາດມາໄດ້ຕະຫຼອດໄລຍະຜ່ານມາ ແລະ ທ່ານໄດ້ເນັ້ນຕື່ມວ່າ: ໃຫ້ແຕ່ລະພາກສ່ວນເອົາໃຈໃສ່ສຶກສາຄົ້ນຄວ້າບັນດາມະຕິຕ່າງໆຂອງແຂວງ, ເມືອງ ເພື່ອສາມາດກຳແໜ້ນບັນດາເນື້ອໃນທີ່ສຳຄັນ ແລະ ເປັນບ່ອນອີງໃນການເຄື່ອນໄຫວວຽກງານ; ສືບຕໍ່ຂະຫຍາຍສະມາຊິກເຂົ້າອົງການຈັດຕັ້ງມະຫາຊົນໃຫ້ກວ້າງຂວາງກ່ວາເກົ່າ ໂດຍສະເພາະແມ່ນທ້ອງຖິ່ນຮາກຖານຂັ້ນບ້ານ, ສືບຕໍ່ສຸມໃສ່ສ້າງ ແລະ ຂຸດຄົ້ນເອົາບັນດາແຜນການ, ແຜນງານ, ໂຄງການ ທີ່ຍັງຄ້າງຄາຢູ່ນັ້ນມາຈັດຕັ້ງຜັນຂະຫຍາຍ ໃຫ້ສອດຄ່ອງກັບສະພາບຄວາມເປັນຈິງ, ຈົ່ງພ້ອມກັນນໍາເອົາຂະບວນການຂໍ້ແຂ່ງຂັນຕ່າງໆ ຕິດພັນກັບການແກ້ໄຂປະກົດການຫຍໍ້ທໍ້ ຢູ່ພາຍໃນ, ທ້ອງຖິ່ນຮາກຖານ ໄປພ້ອມພ້ອມກັບວຽກງານ 3 ສ້າງ, ຕ້ອງພ້ອມກັນປ່ຽນແປງໃໝ່ ທັງຮູບແບບ ແລະ ວິທີການ ເພື່ອເຮັດໃຫ້ໜ້າທີ່ວຽກງານມີການປັບປຸງດີຂຶ້ນກ່ວາເກົ່າ, ໃຫ້ມີສະຕິລະວັງຕົວ ຕໍ່ກຸ່ມຄົນບໍ່ຫວັງດີ ທີ່ຫວັງຈະມ້າງເພທໍາລາຍຄວາມສາມັກຄີພາຍໃນ; ເປັນເຈົ້າການອອກແຮງປຸກລະດົມສຶກສາອົບຮົມທາງດ້ານການເມືອງ-ແນວຄິດ ເພື່ອໃຫ້ລູກຫຼານຂອງພໍ່ແມ່ປະຊາຊົນບັນດາເຜົ່າ ໂດຍສະເພາະແມ່ນເຂດຊົນນະບົດຫ່າງໄກສອກຫຼີກໃຫ້ໄດ້ຮັບການສຶກສາຮໍ່າຮຽນໃຫ້ທົ່ວເຖິງ.

info@lfnd.org.la | 021 213754 | (856-21) 453191