ທ່ານ ໄຊສົມພອນ ພົມວິຫານ ກຳມະການກົມການ ເມືອງສູນກາງພັກ ປະທານສູນກາງແນວລາວສ້າງຊາດ ທັງເປັນຫົວໜ້າອະນຸກຳມະການໂຄສະນາ ແລະ ຂະບວນການ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ໄດ້ເຂົ້າຮ່ວມກອງປະ ຊຸມພົບປະກັບຄະນະພັກ ຄະນະປົກຄອງແຂວງ, ແນວລາວສ້າງຊາດແຂວງ, ອົງການຈັດຕັ້ງມະຫາຊົນແຂວງ ແລະ ສະ ຫະພັນນັກຮົບເກົ່າແຂວງຊຽງຂວາງ. ໃນລະຫວ່າງວັນທີ 10 ກຸມພານີ້ ທີ່ຫ້ອງວ່າການປົກຄອງແຂວງດັ່ງກ່າວ.
ທ່ານ ບົວສອນ ສີນວນທອງ ຮອງເລຂາພັກແຂວງ ຮອງເຈົ້າແຂວງໆຊຽງຂວາງ ໄດ້ສະແດງຄວາມຍິນດີຕ້ອນ ຮັບ ແລະ ລາຍ ງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງໃນໄລຍະປີທີ່ຜ່ານມາ ຊຶ່ງປະຈຸບັນ ແຂວງຊຽງຂວາງພວມກະກຽມກອງປະຊຸມໃຫຍ່ 3 ຂັ້ນຂອງແຂວງ, ງານມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງຮັບກຽດເປັນເຈົ້າພາບ ແລະ ງານສະເຫຼີມສະຫຼອງໄຫຫີນເປັນມໍລະດົກໂລກ. ພ້ອມດຽວກັນນັ້ນ, ແຂວງຊຽງຂວາງ ໄດ້ສົ່ງເສີມພໍ່ແມ່ປະຊົນທຳການຜະລິດເປັນສິນຄ້າ ຕິດພັນກັບການປຸງແຕ່ງ, ຕະຫຼາດ ແລະ ສົ່ງອອກ ນັບມື້ນັບເພີ່ມຂຶ້ນ, ເຮັດໃຫ້ສາມາດແກ້ໄຂຄວາມທຸກຍາກ, ຄອບຄົວທຸກຍາກໃຫ້ຫຼຸດໜ້ອຍລົງ, ເອົາໃຈໃສ່ພັດທະນາດ້ານວັດທະນະທໍາ-ສັງຄົມ, ດ້ານວຽກງານກະສິກໍາ-ປ່າໄມ້, ວຽກງານພັດທະນາຊົນນະບົດ ແລະ ການແກ້ໄຂຄວາມທຸກຍາກ, ວຽກງານໂຍທາທິການ, ວຽກງານໄປ ສະນີໂທລະຄົມ ແລະ ສື່ສານ, ວຽກງານທ່ອງທ່ຽວ ແລະ ວຽກງານເກັບກູ້ລະເບີດ ໃຫ້ດີຂຶ້ນເລື້ອຍໆ, ຄຽງຄູ່ກັບການພັດທະນາທາງດ້ານເສດຖະກິດຕາມທິດສີຂຽວ ແລະ ຍືນຍົງ; ເສດຖະກິດຂອງແຂວງຂະຫຍາຍຕົວໃນລະດັບ 7,6%; ປະຊາຊົນພາຍໃນແຂວງໄດ້ເຂົ້າເຖີງການບໍລິການ ດ້ານສາທາລະນະສຸກ, ການສືກສາ ແລະ ການບໍລິການຕ່າງໆ; ໂດຍລວມແລ້ວ ການພັດທະ ນາແຜນເສດຖະກິດ-ສັງຄົມໄດ້ຊ່ວຍເຮັດໃຫ້ຊີວິດການເປັນຢູ່ຂອງປະຊາຊົນພາຍໃນ ແຂວງດີຂື້ນເປັນກ້າວໆ.

ໂອກາດນີ້, ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວ ລາວສ້າງຊາດ, ທັງເປັນຫົວໜ້າອະນຸກຳມະການໂຄສະນາ ແລະ ຂະບວນການ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ, ໄດ້ສະແດງຄວາມຊົມເຊີຍຕໍ່ຜົນງານຂອງອົງການປົກຄອງແຂວງຍາດມາໄດ້ໃນໄລຍະຜ່ານມາ ໂດຍສະ ເພາະ ແມ່ນຜົນສຳເລັດໃນການຈັດຕັ້ງບັນດາແຜນງານຕ່າງໆທີ່ວາງອອກ; ພ້ອມດຽວກັນນີ້, ທ່ານກໍ່ໄດ້ເນັ້ນໃຫ້ແຂວງເອົາໃຈໃສ່ແກ້ໄຂບັນຫາປະ ກົດການຫຍໍ້ທໍ້ໃນສັງຄົມໃຫ້ຫຼຸດຫນ້ອຍລົງ; ແກ້ໄຂບັນດາຫນໍ່ແໜງທີ່ບໍ່ດີ, ເອົາໃຈໃສ່ວຽກງານກວດກາສໍາມະໂນຄົວ ແລະ ຄຸ້ມຄອງຊາຍແດນ, ເພື່ອເຮັດໃຫ້ຊາຍແດນມີສັນຕິພາບ, ເປັນຊາຍແດນມິດຕະພາບ ແລະ ການຮ່ວມມືພັດທະນາ, ໂດຍສະ ເພາະ ແມ່ນໄລຍະຈະດໍາເນີນ ກອງປະຊຸມໃຫຍ່ສາມຂັ້ນ ຂອງແຂວງໃຫ້ມີຄວາມສະຫງົບ 100%; ເອົາໃຈໃສ່ສືບຕໍ່ກະ ກຽມ ແລະ ດໍາເນີນກອງປະຊຸມໃຫຍ່ສາມຂັ້ນ ໃຫ້ມີຜົນສໍາເລັດຕາມລະດັບຄາດຫມາຍ ແລະ ຮັບປະກັນໃຫ້ມີຄວາມສະຫງົບ, ການ ດໍາເນີນກອງປະຊຸມໃຫຍ່ ແມ່ນມີຄວາມຫມາຍສໍາຄັນ ດ້ານຍຸດທະສາດ ໃນການກໍ່ສ້າງພັກ ແລະ ປັບປຸງພັກ, ເນື້ອແທ້ແມ່ນ ການປັບປຸງພາຍໃນພັກ, ດ້ານການແນວຄິດ-ການເມືອງ, ການຈັດຕັ້ງ ແລະ ແບບແຜນວິທີນໍາພາ, ໃຫ້ເອົາໃຈໃສ່ບັນຫາເນື້ອໃນຂອງບົດລາຍງານ ການເມືອງ ທີ່ອະນຸກໍາມະການເນື້ອໃນຂັ້ນສູນກາງ ໄດ້ແນະນໍາ, ຄົ້ນຄ້ວາບຸກຄະລາກອນໃຫ້ລະອຽດຖີ່ຖ້ວນ, ຮອບດ້ານ ແລະ ປະຕິບັດໃຫ້ຖືກຕ້ອງຕາມຂັ້ນຕອນການທາບທາມ ແລະ ຮັບປະກັນຫຼັກການລວມສູນປະຊາທິປະໄຕຢ່າງແທ້ຈິງ, ໃຫ້ເອົາໃຈໃສ່ວຽກງານໂຄສະນາ ແລະ ຂະບວນການກະກຽມໃຫ້ແກ່ກອງປະຊຸມໃຫຍ່ສາມຂັ້ນ ເປັນຕົ້ນແມ່ນ ການປຸກລະດົມຂະບວນການໃຫ້ມະຫາຊົນເຂົ້າຮ່ວມຢ່າງຕັ້ງຫນ້າ ໃນການກໍ່ສ້າງພັກ ໃຫ້ປອດໃສ, ເຂັ້ມແຂງ ແລະ ຫນັກແຫນ້ນ.
ພ້ອມດຽວກັນນັ້ນ ທ່ານ ປະທານສູນກາງແນວລາວສ້າງຊາດ ໄດ້ມອບຄອມພິວເຕີໂນ໊ດບຸກ ຈໍານວນ 6 ໜ່ວຍ ແລະ ຄອມພິວເຕີຕັ້ງໂຕະ 2 ຊຸດ ໃຫ້ແນວລາວສ້າງຊາດແຂວງ ເພື່ອນໍາໄປມອບຕໍ່ໃຫ້ແນວລາວສ້າງເມືອງ ແລະ ໄດ້ໄປຢ້ຽມ ຢາມຟາມງົວ ບ້ານຄັງສີ, ຢ້ຽມຊົມ ການກຽມຄວາມພ້ອມຂອງສະໜາມກິລາ ທີ່ຈະຈັດງານມະຫາກຳກິລາແຫ່ງຊາດ ຄັ້ງທີ 11 ປີ 2020 ທີ່ແຂວງຊຽງຂວາງເປັນເຈົ້າພາບຕື່ມອີກ.