ວັນທີ 16 ມີນາ 2023 ຜ່ານມາ, ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ໄດ້ຕ້ອນຮັບການເຂົ້າພົບປະຢ້ຽມຢາມຂອງ ທ່ານ ນາງ ມໍລະກົດ ສີສະຫວັດດີ ເອກອັກຄະລັດຖະທູດ ແຫ່ງຣາຊະອານາຈັກໄທ ປະຈໍາ ສປປ ລາວ ໃນໂອກາດ ມາດໍາລົງຕໍາແຫນ່ງ ເປັນເອກອັກຄະລັດຖະທູດ ປະຈໍາ ສປປ ລາວ ຄົນໃຫມ່.

ທ່ານ ສິນລະວົງ ຄຸດໄພທູນ ໄດ້ສະແດງຄວາມຍິນດີຕ້ອນຮັບ, ພ້ອມທັງຕີລາຄາສູງ ແລະ ຊົມເຊີຍຕໍ່ທ່ານ ນາງ ມໍລະກົດ ສີສະຫວັດດີ ທີ່ໄດ້ຮັບການແຕ່ງຕັ້ງໃຫ້ມາດໍາລົງຕໍາແຫນ່ງເປັນເອກອັກຄະລັດຖະທູດ ແຫ່ງ ຣາຊະອານາຈັກໄທ ປະຈໍາ ສປປ ລາວ ຄົນໃຫມ່ ເພື່ອສືບຕໍ່ປະກອບສ່ວນອັນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດໃຫ້ແຫນ້ນແຟ້ນ ແລະ ເພີ່ມທະວີການຮ່ວມມືລະຫວ່າງ ອົງການພຸດທະສາສະໜາ ລາວ-ໄທ ທີ່ເຄີຍສ້າງກິດຈະກໍາຮ່ວມກັນ ໃນອົງການທໍາມະຍາດຕາ ລຸ່ມແມ່ນໍ້າຂອງ ແລະ ເພື່ອທີ່ຈະສືບຕໍ່ສ້າງກິດຈະກໍາຮ່ວມລະຫວ່າງອົງການແນວລາວສ້າງຊາດ ແລະ ສະຖານທູດໃນການປຸກລະດົມປະຊາຊົນລຽບຕາມຊາຍແດນລະຫວ່າງສອງປະເທດຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ, ແນໃສ່ຮັບປະກັນໃຫ້ການທ່ອງທ່ຽວ, ການໄປ-ມາ ຫາສູ່ກັນເຊິ່ງກັນ ແລະ ກັນ, ການທໍາມາຫາກິນຂອງປະຊາຊົນທັງສອງປະເທດ ໃຫ້ມີຄວາມ ສະດວກສະບາຍ ແລະ ຮັບປະກັນໄດ້ຄວາມສະຫງົບປອດໄພຍິ່ງຂຶ້ນ ພ້ອມກັນນັ້ນ, ຍັງໄດ້ປຶກສາຫາລື ແລກປ່ຽນບາງບົດຮຽນກ່ຽວກັບວຽກງານການສົ່ງເສີມຊາວກະສິກອນລາວໃຫ້ເປັນຮູບປະທໍາ.

ທ່ານ ນາງ ມໍລະກົດ ສີສະຫວັດດີ ໄດ້ສະແດງຄວາມຂອບໃຈຕໍ່ທ່ານປະທານສູນກາງແນວລາວສ້າງຊາດ ພ້ອມຄະນະ ທີ່ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ ແລະ ພ້ອມກັນເຮັດໃຫ້ການພົວພັນຮ່ວມມືຢ່າງຮອບດ້ານ ແນໃສ່ຮັບປະກັນໃນການປະຕິບັດວຽກງານດ້ານການທູດໃຫ້ມີຄວາມໜັກແໜັນເຂັ້ມແຂງ ແລະ ໄດ້ຮັບຜົນສໍາເລັດຫລາຍຂຶ້ນກວ່າທີ່ຜ່ານມາ.

ບກ: ທ່ານ ນາງ ກົງແກ້ວ ທຳມະໂຄດ

ພາບ: ສຸກສຳລານ

ຂ່າວ: ສຸວັນລີ