ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ໄດ້ຕ້ອນຮັບການເຂົ້າພົບປະຢ້ຽມຢາມ ຂອງທ່ານ ໂທຊີໂອະ ນາກາເສ ຫົວໜ້າຜູ້ຕາງໜ້າອົງການຮ່ວມມືສາກົນ ຍີ່ປຸ່ນ ໄຈກາ ປະຈໍາ ສປປ ລາວ ພ້ອມດ້ວຍຄະນະ ໃນວັນທີ 7 ມິຖຸນາ 2022 ນີ້, ທີ່ສູນກາງແນວລາວສ້າງຊາດ.

ການພົບປະຢ້ຽມຢາມຄັ້ງນີ້, ສອງຝ່າຍໄດ້ປຶກສາຫາລື ແລະ ນຳສະເໜີແນວຄວາມຄິດໃນການຮ່ວມມືວຽກງານຊັ້ນຄົນ, ສະມາຄົມຊາວນາ ເພື່ອເປັນການສົ່ງເສີມການຜະລິດກະສີກໍາ ເປັນທຸລະກິດຂະໜາດນ້ອຍ ເພື່ອພັດທະນາຊີວິດການເປັນຢູ່ຂອງປະຊາຊົນໃຫ້ດີຂຶ້ນ.

ຫົວໜ້າຜູ້ຕາງໜ້າອົງການຮ່ວມມືສາກົນ ຍີ່ປຸ່ນ ໄຈກາ ປະຈໍາ ສປປ ລາວ ໄດ້ລາຍງານ ໃຫ້ທ່ານ ປະທານ ສນຊ ຮັບຊາບ, ໄລຍະຜ່ານມາອົງການໄຈກາ ໄດ້ສົ່ງເສີມການກະສິກໍາ ຢູ່ແຂວງ ສະຫວັນນະເຂດ ໂດຍແມ່ນໃຫ້ປະຊາຊົນຢືມແນວພັນກັບປຸຍ ທີ່ມີດອກເບ້ຍຕໍ່າ ຫຼັງຈາກທີ່ເກັບກ່ຽວແລ້ວ ຈຶ່ງສົ່ງຄືນ ໂດຍແມ່ນແນວລາວສ້າງຊາດແຂວງເປັນຜູ້ກະຈາຍແນວພັນໃຫ້ແກ່ປະຊາຊົນ ເຊິ່ງກົນໄກ ແລະ ຮູບແບບການເຮັດທົດລອງໃນໄລຍະຜ່ານມາແມ່ນເຮັດໄດ້ດີ ນອກຈາກນີ້, ຍັງໄດ້ທົດລອງໃນການປູກໝາກກີວີ ຢູ່ແຂວງ ຊຽງຂວາງ ຕື່ມອີກ.