ສູນກາງແນວລາວສ້າງຊາດ

Lao Front For National Development

ປະທານ ສນຊ ຕ້ອນຮັບການເຂົ້າພົບປະຂອງຄະນະຂົນຂວາຍປະຊາຊົນສູນກາງພັກກອມມູນິດຫວຽດນາມ.

 

ໃນວັນທີ 11 ທັນວາ 2023 ນີ້, ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ (ສນຊ) ໄດ້ຕ້ອນຮັບການເຂົ້າພົບປະຢ້ຽມຢາມຂອງທ່ານ ຈ໋ຽວ ຕ໋າຍ ວິງ ຮອງຫົວໜ້າຄະນະຂົນຂວາຍປະຊາຊົນສູນກາງພັກກອມມູນິດ ສສ ຫວຽດນາມ ພ້ອມຄະນະ ທີ່ສູນກາງແນວລາວສ້າງຊາດເນື່ອງໃນໂອກາດເດີນທາງມາເຂົ້າຮ່ວມກອງປະຊຸມແລກປ່ຽນບົດຮຽນວຽກງານຂົນຂວາຍໃຫ້ແກ່ສະມາຊິກພັກ-ພະນັກງານ ແນວລາວສ້າງຊາດໃນທົ່ວປະເທດ.

 

ທ່ານ ສິນລະວົງ ຄຸດໄພທູນ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ສະຫາຍ ຈ໋ຽວ ຕ໋າຍ ວິງ ພ້ອມຄະນະ ທີ່ໄດ້ມາເຄື່ອນໄຫວປະຕິບັດວຽກງານ ຢູ່ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນເສີມສ້າງສາຍພົວພັນມິດຕະພາບຄວາມສາມັກຄີແບບພິເສດ ລະຫວ່າງ ສອງພັກ-ສອງລັດ ປະຊາຊົນ ສອງຊາດ ນັບມື້ໄປສູ່ລວງເລິກ ແລະ ບັນລຸຕາມຈຸດປະສົງລະດັບຄາດໝາຍທີ່ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້.

 

ໃນໂອກາດນີ້, ທ່ານ ຈ໋ຽວ ຕ໋າຍ ວິງ ກໍໄດ້ສະແດງຄວາມຂອບໃຈຕໍ່ປະທານ ສນຊ ພ້ອມຄະນະທີ່ໄດ້ໃຫ້ຕ້ອນຮັບຢ່າງອົບອຸ່ນ ແລະ ຍັງໄດ້ແຈ້ງໃຫ້ຮູ້ຄວາມສຳຄັນໃນການມາປະຕິບັດວຽກງານຂົນຂວາຍຢູ່ ສປປ ລາວ ໃນຄັ້ງນີ້ຕື່ມອີກ.

info@lfnd.org.la | 021 213754 | (856-21) 453191