ສູນກາງແນວລາວສ້າງຊາດ

Lao Front For National Development

ປະທານ ສນຊ ຕ້ອນຮັບ ເອກອັກຄະລັດຖະທູດ ແຫ່ງ ຣາຊະອານາຈັກໄທ ປະຈໍາ ສປປ ລາວ

ໃນວັນທີ 9 ມັງກອນ 2020 ນີ້, ທ່ານ ປອ. ໄຊສົມພອນ ພົມວິຫານ, ກໍາມະການກົມການເມືອງສູນກາງພັກ, ປະທານສູນ ກາງແນວລາວສ້າງຊາດ ຕ້ອນຮັບການເຂົ້າຢ້ຽມຂໍ່ານັບຂອງທ່ານ ດໍາຣົງ ໃຄ່ຄວນ, ເອກອັກຄະລັດຖະທູດ ແຫ່ງ ຣາຊະອານາ ຈັກໄທ ປະຈໍາ ສປປ ລາວ, ຢູ່ທີ່ສູນກາງແນວລາວສ້າງຊາດ ເນື່ອງໃນໂອກາດ ມາດໍາລົງຕໍາແໜ່ງ ເປັນເອກອັກຄະລັດຖະທູດຄົນໃໝ່.
ໃນໂອກາດນີ້, ທ່ານປະທານ ສນຊ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ການມາຢ້ຽມຢາມ ຂອງທ່ານ ດໍາຣົງ ໃຄ່ຄວນ ທີ່ໄດ້ຖືກແຕ່ງຕັ້ງໃຫ້ມາປະຕິບັດໜ້າທີ່ການທູດ ຢູ່ ສປປ ລາວ ຊຶ່ງເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ 2 ປະເທດໃຫ້ມີຄວາມແໜ້ນແຟ້ນຍິ່ງໆຂຶ້ນ.
ນອກຈາກນີ້ ທັງສອງຝ່າຍ ຍັງໄດ້ມີການປຶກສາຫາລື ແລກປ່ຽນຄຳຄິດຄຳເຫັນກ່ຽວກັບການຮ່ວມມືທາງດ້ານການຄ້າ-ການລົງທຶນ ໂດຍສະເພາະແມ່ນຂະແໜງກະສີກໍາ, ສາທາລະນະສຸກ ແລະ ການທ່ອງທ່ຽວ ເພື່ອເປັນການສືບຕໍ່ເສີມຂະຫຍາຍສາຍພົວພັນຮ່ວມມືອັນດີງາມລະຫວ່າງ 2 ລັດຖະບານ ແລະ ປະຊາຊົນ 2 ຊາດລາວ – ໄທ ໃຫ້ມີການຂະຫຍາຍຕົວເພີ່ມຂຶ້ນເລື້ອຍໆ ພ້ອມກັນນີ້, ທ່ານ ເອກອັກຄະລັດຖະທູດ ແຫ່ງ ຣາຊະອານາຈັກໄທ ໄດ້ສະແດງຄວາມຂອບໃຈຕໍ່ ທ່ານປະທານສູນກາງແນວລາວສ້າງຊາດ ທີ່ໃຫ້ການຕ້ອນຮັບການເຂົ້າຢ້ຽມຂໍ່ານັບໃນຄັ້ງນີ້ຢ່າງອົບອຸ່ນ, ເປັນກັນເອງ ພ້ອມທັງ ຈະສືບຕໍ່ປະຕິບັດໜ້າທີ່ການທູດຂອງຕົນ ຢູ່ ສປປ ລາວ ໃຫ້ໄດ້ຮັບຜົນສໍາເລັດອັນຈົບງາມ.

ໃນວັນດຽວກັນນັ້ນ ທ່ານ ພູຫວິນ ຟອງສະໜຸດ, ອໍານວຍການໄປສະນີ ພ້ອມດ້ວຍຄະນະ ໄດ້ນໍາເອົາກະຕ່າຂອງຂັວນມາອວຍພອນ ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານ ສນຊ ເນື່ອງໃນໂອກາດປີໃໜ່ສາກົນ. ໃນໂອກາດນີ້ ທ່ານ ປະທານ ສູນກາງແນວລາວສ້າງຊາດ ໄດ້ສະແດງຄວາມຂອບໃຈຕໍ່ຄະນະແລະ ອວຍພອນໄຊອັນປະເສີດໃຫ້ ທ່ານ ຜູ້ອໍານວຍການໄປສະນີ ພ້ອມດ້ວຍຄະນະ ຈົ່ງມີຂຸຂະພາບເຂັ້ມແຂງປະສົບຜົນສໍາເລັດໃນທຸກໜ້າທີ່ວຽກງານ.

info@lfnd.org.la | 021 213754 | (856-21) 453191