ກອງປະຊຸມພົບປະ ລະຫວ່າງ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ກັບຄະນະທິປຶກສາ ແລະ ຜູ້ຮ່ວມງານວຽກງານເສດຖະກິດ ແລະ ກົດໝາຍ ຂອງສູນກາງແນວລາວສ້າງຊາດ ຈັດຂຶ້ນໃນວັນທີ 17 ສິງຫາ 2021 ນີ້ ທີ່ຫ້ອງປະຊຸມສູນຝຶກອົບຮົມ ສູນກາງແນວລາວສ້າງຊາດ, ມີທ່ານ ສູນທອນ ພົມມະຈັກ ຫົວໜ້າຄະນະທີ່ປຶກສາ ແລະ ຜູ້ຮ່ວມງານວຽກງານເສດຖະກິດ ແລະ ກົດໝາຍ ຂອງສູນກາງແນວລາວສ້າງຊາດ ພ້ອມດ້ວຍຄະນະ.

ຈຸດປະສົງຕົ້ນຕໍຂອງກອງປະຊຸມໃນຄັ້ງນີ້ ແມ່ນເພື່ອທົບທືນຄືນຜົນງານການເຄື່ອນໄຫວ ຈັດຕັ້ງປະຕິບັດວຽກງານ ຂອງຄະນະທິປຶກສາ ແລະ ຜູ້ຮ່ວມງານວຽກງານເສດຖະກິດ ແລະ ກົດໝາຍ ຂອງສູນກາງແນວລາວສ້າງຊາດ ໃນໄລຍະຜ່ານມາ ແລະ ພ້ອມທັງປຶກສາຫາລືທິດທາງແຜນການໃນຕໍ່ໜ້າ ເປັນຕົ້ນ ແມ່ນປຶກສາຫາລືວຽກງານກອງທຶນ, ວຽກງານມູນນິທິ ແລະ ວຽກງານຈັດຕັ້ງ ເພື່ອແນໃສ່ເຮັດໃຫ້ວຽກງານແນວລາວສ້າງຊາດ ມີບາດກ້າວໃໝ່ເລື້ອຍໆ.

ທ່ານ ປະທານ ສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈຕໍ່ບັນດາທ່ານ ທີ່ໄດ້ປະກອບຄຳຄິດຄຳເຫັນແລກປ່ຽນນຳກັນ ຊຶ່ງຈະນຳເອົາໄປຄົ້ນຄວ້າ ແລະ ນຳໄປໝູນໃຊ້ເຂົ້າໃນວຽກງານແນວລາວສ້າງຊາດ ເພື່ອເຮັດໃຫ້ວຽກງານໄດ້ຮັບຜົນສຳເລັດດີຂຶ້ນກວ່າເກົ່າ ແລະ ທ່ານ ໄດ້ຮຽກຮ້ອງຕື່ມວ່າ: ໃຫ້ສ້າງການຫັນປ່ຽນທາງດ້ານຄວາມຮູ້ຄວາມສາມາດກ່ຽວກັບວຽກງານແນວລາວສ້າງຊາດ, ຍົກສູງຄຸນນະພາບການເຄື່ອນໄຫວວຽກງານ ຂອງພະນັກງານ, ປັບປັບວິທີການປຸກລະດົມຂົນຂວາຍ ແລະ ປະສານສົມທົບກັບອົງການຈັດຕັ້ງມະຫາຊົນ ເພື່ອຮ່ວມກັນຈັດຕັ້ງເຄື່ອນໄຫວວຽກງານ; ປັບປຸງ ແລະ ຊັບຊ້ອນໜ້າທີ່ ຄະນະທິປຶກສາ ໃຫ້ຖືກກັບຄວາມຮູ້ຄວາມສາມາດ ຂອງແຕ່ລະໜ້າວຽກ; ໃຫ້ມີການປະເມີນກອງທຶນຕ່າງໆໃນໄລຍະຜ່ານມາຄືນ ແລະ ສຶກສາຄົ້ນຄວ້າເພື່ອສ້າງກອງທຶນ ຂອງແນວລາວສ້າງຊາດ.

ພາບ+ຂ່າວ: ເຢ້ ຢ່າ

ບ.ກ: ສຊ ຈື້ໄຊ