ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ເຂົ້າຮ່ວມກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ວຽກງານ 3 ສ້າງ ທົ່ວປະເທດ, ພາຍໃຕ້ການເປັນປະທານ ແລະ ຊີ້ນຳກອງປະຊຸມໂດຍ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ມີບັນດາທ່ານການນຳພັກ-ລັດ ຂັ້ນສູນກາງ ແລະ ທ້ອງຖິ່ນທົ່ວປະເທດເຂົ້າຮ່ວມ.

ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ໄດ້ກ່າວເປີດກອງປະຊຸມຢ່າງເປັນທາງການ. ຫຼັງຈາກນັ້ນ, ກອງປະຊຸມໄດ້ຮັບຟັງການສະຫຼຸບຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ວຽກງານ 3 ສ້າງ ໄລຍະແຕ່ປີ 2016-2021 ແລະ ທິດທາງແຜນການຮອດປີ 2025; ພ້ອມກັນນັ້ນ ຍັງໄດ້ຮັບຟັງບົດປະກອບຄຳເຫັນໃນຫົວຂໍ້ຕ່າງໆ ກ່ຽວກັບວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ວຽກງານ 3 ສ້າງ ຕາມພາລະບົດບາດຂອງກະຊວງ ແລະ ຈຸດພິເສດຂອງແຕ່ລະທ້ອງຖິ່ນ ຈາກບັນດາທ່ານລັດຖະມົນຕີ ແລະ ເຈົ້າແຂວງຈຳນວນໜຶ່ງ.

ກອງປະຊຸມດັ່ງກ່າວ ດຳເນີນມາເປັນເວລາໜຶ່ງວັນເຄິ່ງ ນັບແຕ່ຕອນເຊົ້າວັນທີ 14-ຕອນເຊົ້າວັນທີ 15 ກັນຍາ 2022 ນີ້ ທີ່ນະຄອນຫຼວງວຽງຈັນ.