ແນວລາວສາ້ງຊາດແຂວງສາລະວັນ ໄດ້ປະເມີນໜ່ວຍ ພັກຂອງຕົນ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ, ເປັນຄັ້ງທີ II , ພາຍໃຕ້ການເປັນປະທານຂອງສະຫາຍ ບຸນທົງ ເມືອງຈັນ ເລຂາໜ່ວຍພັກ, ຮອງປະທານແນວລາວສ້າງຊາດແຂວງ, ມີໜ່ວຍພັກອ້ອມຂ້າງ, ແຂກຖືກເຊີນ, ພະ ນັກງານສະມາຊິກພັກ ຕະຫຼອດຮອດພະນັກງານ-ລັດຖະກອນເຂົ້າຮ່ວມ ໃນວັນທີ 16 ພະຈິກ ຜ່ານມານີ້ ຢູ່ຫ້ອງປະຊຸມແນວລາວສ້າງຊາດແຂວງ.

ທ່ານ ໜູການ ຊາທິລາດ ຮອງເລຂາໜ່ວຍພັກ, ຮອງປະທານແນວລາວສ້າງຊາດແຂວງ ໄດ້ຂື້ນຜ່ານຮ່າງບົດສະຫຼຸບຕີລາຄາການຈັດຕັ້ງປະຕິບັດ ແຜນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນລຍະ 1 ປີຜ່ານມາ ແລະ ທິດທາງແຜນການສູ້ຊົນຈັດຕັ້ງປະຕິບັດໃນ 1 ປີຕໍ່ໜ້າ ປະຈຳປີ 2021, ໜ່ວຍພັກແນວລາວສ້າງຊາດແຂວງ ປະກອບມີ 5 ຂະແໜງ, ມີຄະນະພັກ 3 ສະຫາຍ, ມີພະນັກງານ-ລັດຖະກອນທັງໝົດ 27 ສະຫາຍ, ຍິງ 11 ສະຫາຍ, ມີສະມາຊິກພັກ ທັງໝົດ 18 ສະຫາຍ, ຍິງ 8 ສະຫາຍ, ໃນນັ້ນ ສຳຮອງ 2 ສະຫາຍ, ຍິງ 1 ສະຫາຍ; ດ້ານການເມືອງ-ແນວຄິດ ຄະນະໜ່ວຍພັກໄດ້ເອົາໃຈໃສ່ໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ສ້າງສະມາຊິກພັກໃຫ້ມີຄຸນທາດການເມືອງທີ່ໜັກແໜ້ນ, ມີຄຸນສົມບັດສິນທຳປະຕິວັດ, ມີຄວາມຈົງຮັກພັກດີຕໍ່ອຸ ດົມການຂອງພັກ. ວຽກງານແນວລາວສ້າງຊາດ ທີ່ພົ້ນເດັ່ນໃນ​ໄລຍະ 1 ປີ ທີ່​ຜ່ານ​ມາແນວ​ລາວ​ສ້າງ​ຊາດ​ແຕ່ລະ​ຂັ້ນ ​ໄດ້​ປັບປຸງ​ກົງຈັກ​ການຈັດ​ຕັ້ງ​ຂອງ​ຕົນ​ໃຫ້​ມີ​ຄວາມ​ໜັກ​ແໜ້ນ​ເຂັ້ມ​ແຂງ, ​ຫັນ​ລົງ​ກໍ່ສ້າງ​ຮາກ​ຖານ, ປຸກລະດົມ​ຊຸກຍູ້​ໃຫ້​ກຳມະ ການ​ແນວ​ເມືອງ, ຄະນະ​ກຳ​ມະ​ການ​ແນວ​ບ້ານ​ ໃຫ້​​ເຄື່ອນ​ໄຫວຕາມ​ພາລະ​ບົດບາດ​ຂອງ​ຕົນ. ໄດ້ສຳ​ເລັດ​ການ​ປັບປຸງ​ການຈັດ​ຕັ້ງ​ແນວ​ຂັ້ນ​ບ້ານ ມີ​ກຳມະການ​ແນວ​ບ້ານ​ທັງ​ໝົດ 4.792 ທ່ານ, ຍິງ 561 ທ່ານ, ພຣະສົງ 114 ອົງ; ສຳ​ເລັດ​ກອງ​ປະຊຸມ​ໃຫ່ຍ​ແນວ​ລາວ​ສ້າງ​ຊາດ​ແລ້ວ 8 ​ເມືອງ, ມີ​ກຳມະການ​ແນວ​ເມືອງ​ທັງ​ໝົດ 431 ທ່ານ, ຍິງ 34 ທ່ານ, ພຣະສົງ 30 ອົງ, ໄດ້ເອົາໃຈໃສ່ຊຸ​ກຍູ້​ປະຊາຊົນສ້າງ​ຕັ້ງ​ກອງ​ທຶນ​ພັດ​ທະ​ນາ​ຂັ້ນ​ບ້ານ ໄດ້ 3 ເມືອງຄື: ເມືອງ​ຄົງ​ເຊ​ໂດນ, ເມືອງວາ​ປີ ແລະ ເມືອງ​ຕະ​ໂອ້ຍ, ມີ 6 ບ້ານ, ມີທຶນໝູນວຽນທັງໝົດຈໍານວນ 535.785.000 ກີບ, ສ້າງກອງທຶນຊ່ວຍເຫຼືອເຊິ່ງກັນແລະກັນ ພາຍໃນອົງການແນວລາວສ້າງຊາດແຂວງ ປະຈຸບັນມີທຶນໝູນວຽນທັງໝົດ 261,387,000 ກີບ; ວຽງານສາສະໜາໄດ້​ເຄື່ອນ​ໄຫວສຶກສາອົບຮົມເຕົ້າໂຮມ​ຄວາມ​ສາມັກຄີ, ສ້າງ​ຄວາມ​ປອງ​ດອງ​ບັນດາ​ສາ​ສະໜາ​, ​ສາສະ​ນິກະ​ຊົນ ​ໃນ​ທົ່ວ​ແຂວງ​ຢ່າງ​ກ້ວາງ​ຂວາງ ປະຕິບັດ​ນະ​ໂຍບາຍ​ກ່ຽວ​ກັບ​ສິດ​ເສລີພາບ​ໃນ​ການ​​ເຊື່ອ​ຖື ​ແລະ ບໍ່​​ເຊື່​ອຖື​ສາສະໜາ​ ບົນ​ພື້ນຖານ​ແນວທາງ​ນະ​ໂຍບາຍ​ຂອງ​ພັກ-ລັດ ກໍ່​ຄື​ດຳລັດ 315/ລບ, ວ່າ​ດ້ວຍ: ການຄຸ້ມ​ຄອງ ​ແລະ ປົກ​ປ້ອງ​ການ​ເຄື່ອນ​​ໄຫວສາສະໜາ; ວຽກ ງານຊົນເຜົ່າ ເອົາໃຈໃສ່ວຽກງານ 3 ສ້າງ ໃນການສ້າງຕົວແບບບ້ານສາມັກຄີປອງດອງ ຂອງແນວລາວສ້າງຊາດ ໄດ້ທັງໝົດ 354 ບ້ານ ເທົ່າ 61% ຂອງຈຳນວນບ້ານທັງໝົດ 579 ບ້ານ, ສ້າງຄອບຄົວສາມັກຄີປອງດອງໄດ້ 48,450 ຄອບຄົວ ເທົ່າກັບ 55% ຂອງຈໍານວນຄອບຄົວທັງໝົດ 87,674 ຄອບຄົວ. ສຳລັບທິດທາງແຜນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈຳປີ 2021 ສືບຕໍ່ໃນການເຊື່ອມຊືມບັນດານິຕິກຳ, ຄຳສັ່ງ, ລະບຽບກົດໝາຍຂອງພັກ-ລັດວາງອອກຢ່າງ ເຂັ້ມງວດ ແລະ ສືບຕໍ່ສຶກສາອົບຮົມດ້ານການເມືອງ-ແນວຄິດ ໃຫ້ພະນັກງານສະມາຊິກພັກ, ພະນັກງານ-ລັດຖະກອນ, ຕະຫຼອດຮອດປະຊາຊົນບັນດາເຜົ່າ ໃຫ້ເຂົາເຈົ້າມີແນວຄິດອຸ່ນອ່ຽງທຸ່ນທ່ຽງ ເຊື່ອໝັ້ນຕໍ່ແນວທາງຂອງພັກ-ລັດ. ພ້ອມດຽວ ກັນນີ້ຍັງໄດ້ເປີດກ້ວາງໃຫ້ບັນດາຄະນະໜ່ວຍພັກ, ແຂກຖືກເຊີນມີຄຳເຫັນໃສ່ຮ່າງບົດສະຫຼຸບການນຳພາ ຮອບດ້ານຂອງ ໜ່ວຍພັກແນວລາວສ້າງຊາດແຂວງ ປະຈຳປີ 2020 ແລະ ທິດທາງແຜນການສູ້ຊົນສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2021.