ສູນກາງແນວລາວສ້າງຊາດ

Lao Front For National Development

ປາຖະກະຖາວັນສ້າງຕັ້ງອົງການສະຫະພັນແມ່ຍິງລາວ ຄົບຮອບ 62 ປີ

ສະຫະພັນແມ່ຍິງ ສູນກາງແນວລາວສ້າງຊາດ (ສນຊ) ຈັດຕັ້ງພິທີປາຖະກະຖາວັນສ້າງຕັ້ງອົງການສະຫະພັນແມ່ຍິງລາວ ຄົບ ຮອບ 62 ປີ (20 ກໍລະກົດ 1955 – 20 ກໍລະກົດ 2017), ເປັນກຽດປາຖະກະຖາໂດຍ ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ, ມີບັນດາທ່ານຫົວໜ້າກົມ, ຮອງຫົວໜ້າກົມ, ພະນັກງານ-ລັດຖະກອນ ເອື້ອຍນ້ອງ ແມ່ຍິງ ສນຊ ແລະ ແຂກຖືກເຊີນເຂົ້າຮ່ວມ ໃນວັນທີ 18 ກໍລະກົດ 2017 ນີ້.

ໂອກາດນີ້, ທ່ານ ຮອງປະທານ ສນຊ ກໍ່ໄດ້ຫວນຄືນມູນເຊື້ອການກຳເນີດເຕີບໃຫຍ່ຂະຫຍາຍຕົວ, ພາລະບົດບາດ, ສິດ, ໜ້າ ທີ່ ແລະ ຜົນງານການເຄື່ອນໄຫວຂອງອົງການຈັດຕັ້ງສະຫະພັນແມ່ຍິງລາວ ທີ່ໄດ້ອຸທິດຕົນເພື່ອພາລະກິດຕໍ່ສູ້ປົດປ່ວຍຊາດ, ປົກປັກຮັກສາ ແລະ ພັດທະນາປະເທດຊາດ ກໍ່ຄືພາລະກິດພັດທະນາແມ່ຍິງຕະຫຼອດ 62 ປີຜ່ານມາ ແລະ ທ່ານຍັງໄດ້ເນັ້ນວ່າ ໃຫ້ແມ່ຍິງ ສນຊ ຈົ່ງສືບຕໍ່ວຽກງານການສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວພະນັກງານສະມາຊິກສະຫະພັນ ແມ່ຍິງ, ເອົາໃຈໃສ່ເຊື່ອມຊຶມແນວທາງນະໂຍບາຍຂອງພັກ-ລະບຽບກົດໝາຍຂອງລັດ ໃຫ້ແມ່ຍິງລາວບັນດາເຜົ່າ ເພື່ອສ້າງ ໃຫ້ຖັນແຖວແມ່ຍິງມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີຄວາມຈົງຮັກພັກດີຕໍ່ປະເທດຊາດ ແລະ ປະຊາຊົນ; ສືບຕໍ່ຊຸກຍູ້ຜັນຂະຫຍາຍການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ຢ່າງຝົດຟື້ນ ແລະ ກວ້າງຂວາງ ຕິດ ພັນກັບຂະບວນການແຂ່ງຂັນຮັກຊາດ ແລະ ພັດທະນາ ຕາມທິດ 3 ສ້າງ ເຂົ້າສູ່ລວງເລີກ, ເອົາໃຈໃສ່ບຳລຸງດ້ານແນວຄິດຈິດ ໃຈ, ສຸຂະພາບຮ່າງກາຍ, ສຶກສາໃຫ້ມີຄວາມຮູ້ຄວາມສາມາດ ເພື່ອຕອບສະໜອງຕາມໜ້າທີ່ການເມືອງໃນໄລຍະໃໝ່; ສືບຕໍ່ ປຸກລະດົມສະມາຊິກສະຫະພັນແມ່ຍິງ ທີ່ຢູ່ໃນຂອບເຂດຄວາມຮັບຜິດຊອບຂອງຕົນໃຫ້ເປັນແບບຢ່າງທີ່ດີ ໃນການອະນຸລັກ ສົ່ງເສີມຄຸນລັກສະນະທີ່ເປັນມູນເຊື້ອຂອງແມ່ຍິງລາວບັນດາເຜົ່າ ກໍ່ຄືວັດທະນະທຳອັນດີງາມຂອງຊາດລາວເຮົາ, ເປັນແບບ ຢ່າງທີ່ດີໃນການພົວພັນຄອບຄົວ ແລະ ສັງຄົມ.

ພິທີປາຖະກະຖານີ້ມີຄວາມສຳຄັນຫຼາຍເປັນການປະກອບສ່ວນເສີມຂະຫຍາຍບົດບາດຂອງແມ່ຍິງລາວເວົ້າລວມ, ເວົ້າສະ ເພາະແມ່ນສະຫະພັນແມ່ຍິງ ສນຊ, ສ້າງເງື່ອນໄຂໃຫ້ແມ່ຍິງມີຄວາມຕື່ນຕົວ, ມີຄວາມເປັນເຈົ້າການໃນການພັດທະນາຕົນ ເອງ, ຕັ້ງໜ້າເຂົ້າຮ່ວມຈັດຕັ້ງປະຕິບັດແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດ ໃຫ້ ດີຂຶ້ນເປັນກ້າວໆ.

ໂອກາດນີ້, ສະຫະພັນແມ່ຍິງ ສນຊ ໄດ້ເປີດຂະບວນການຂໍ້ແຂ່ງຂັນ ແມ່ຍິງ 3 ດີ ແລະ ເປີດປ້າຍເນື້ອໃນຂໍ້ແຂ່ງຂັນ ດັ່ງກ່າວຕື່ມອີກ.

info@lfnd.org.la | 021 213754 | (856-21) 453191