ສູນກາງສະຫະພັນກຳມະບານລາວ ໄດ້ຈັດພິທີປາຖະກະຖາຫວນຄືນມູນເຊື້ອວັນສ້າງຕັ້ງແນວລາວສ້າງຊາດ ຄົບຮອບ 72 ປີ (13 ສິງຫາ 1950-13 ສິງຫາ 2022) ຂຶ້ນໃນວັນທີ 12 ສິງຫາ 2022 ນີ້, ທີ່ສູນກາງສະຫະພັນກຳມະບານລາວ ໂດຍໃຫ້ກຽດປາຖະກະຖາໂດຍທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ, ເປັນກຽດເຂົ້າຮ່ວມມີ ທ່ານ ນາງ ອາລິຍາວັນ ອັກຄະວົງ ຮອງປະທານສູນກາງສະຫະພັນກໍາມະບານລາວ, ມີບັນດາທ່ານຫົວໜ້າກົມ, ຮອງກົມ ແລະ ພະນັກງານ-ລັດຖະກອນຂອງ ສກລ ທັງໝົດເຂົ້າຮ່ວມ.

ໃນພິທີ ທ່ານ ຮອງປະທານ ສນຊ ໄດ້ຍົກໃຫ້ເຫັນປະຫວັດຄວາມເປັນມາ, ມູນເຊື້ອການກຳເນີດ ແລະ ເຕີບໃຫຍ່ຂະຫຍາຍຕົວໃນຕະຫຼອດໄລຍະ 72 ປີ ໂດຍຜ່ານ 3 ໄລຍະປະຫວັດສາດຄື: ໄລຍະແນວລາວອິດສະຫຼະ, ໄລຍະແນວລາວຮັກຊາດ ແລະ ໄລຍະແນວລາວສ້າງຊາດ ພ້ອມດ້ວຍຜົນງານອັນພົ້ນເດັ່ນໃນແຕ່ລະໄລຍະ ເຊິ່ງໄລຍະທຳອິດນັ້ນ ບໍ່ທັນມີພັກນຳພາ ແນວລາວອິດສະຫຼະ ແມ່ນໄດ້ປະຕິບັດບົດບາດອອກໜ້າແທນພັກ ເພື່ອເຕົ້າໂຮມກ້ອນກຳລັງສໍາພັນທະພາບລະຫວ່າງຊົນຊັ້ນກຳມະກອນ-ຊາວກະສິກອນ ແລະ ບັນດາກຳລັງການເມືອງ, ກຳລັງການຈັດຕັ້ງສັງຄົມຕ່າງໆ, ອອກແຮງເຕົ້າໂຮມຄວາມສາມັກຄີປອງດອງທົ່ວປວງຊົນທັງຊາດ, ສຳພັນພິເສດກັບກອງທັບ ແລະ ປະຊາຊົນຫວຽດນາມອ້າຍນ້ອງ, ສຳພັນ 3 ຊາດອິນດູຈີນ, ເຮັດສຳເລັດພາລະກຳປະຫວັດສາດອັນສະຫງ່າອົງອາດຄື: ປົດປ່ອຍປະເທດຊາດອອກຈາກແອກປົກຄອງຂອງພວກລ່າເມືອງຂຶ້ນແບບເກົ່າ ບັງຄັບໃຫ້ພວກລ່າເມືອງຂຶ້ນແບບເກົ່າຕ້ອງເຊັນສັນຍາເຊີແນວ 1954 ແລະ ຍອມຮັບຮູ້ເອກະລາດ ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ; ພ້ອມກັນນັ້ນຍັງໄດ້ຕາງໜ້າພັກເຄື່ອນໄຫວ ເພື່ອຕໍ່ສູ້ກັບຈັກກະພັດ ແລະ ລູກມືຂາຍຊາດ ທາງດ້ານການເມືອງ, ການທະຫານ, ການຕ່າງປະເທດ ປຸກລະດົມຂົນຂວາຍມະຫາຊົນ ກໍ່ຄືປະຊາຊົນລາວບັນດາຊົນເຜົ່າເຂົ້າຮ່ວມ ສ້າງພື້ນຖານ ແລະ ກຳລັງປະຕິວັດ, ຊຶ່ງໄດ້ສ້າງຖ່ວງທ່າ ແລະ ບາດກ້າວໃໝ່ໃຫ້ແກ່ຂະບວນການປະຕິວັດ, ສ້າງເງື່ອນໄຂ ແລະ ກະກຽມທຸກດ້ານ ເພື່ອສ້າງຕັ້ງພັກປະຊາຊົນລາວ ແລະ ໄດ້ຕາງໜ້າພັກແບກຫາບພາລະກິດອັນໜັກໜ່ວງ, ນຳພາປະຊາຊົນລາວບັນດາເຜົ່າ ຕໍ່ສູ້ຕີເອົາຊະນະຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່ ຈົນໃນທີ່ສຸດກໍ່ສາມາດຢຶດອຳນາດການປົກຄອງທົ່ວປະເທດ “ແບບບົວບໍ່ຊ້ຳນ້ຳບໍ່ຂຸ່ນ” ຄັ້ງວັນທີ 23 ສິງຫາ 1975 ສະຖາປະນາ ສາທາລະນະລັດ ປະຊາທິປະໄຕ ປະຊາຊົນຢ່າງເປັນທາງການ ໃນວັນທີ 2 ທັນວາ 1975.

ໃນໄລຍະໃໝ່ນີ້ ເພື່ອຍົກສູງວຽກງານແນວລາວສ້າງຊາດ ທ່ານຍັງໄດ້ຮຽກຮ້ອງມາຍັງບັນດາທ່ານຜູ້ເຂົ້າຮ່ວມທັງໝົດ ແລະ ປະຊາຊົນບັນດາເຜົ່າ ຈົ່ງສືບຕໍ່ຮັກສາມູນເຊື້ອອັນດີງາມນີ້ໄວ້, ໃຫ້ມີຄວາມສາມັກຄີປອງດອງ ຮັກແພງຊ່ວຍເຫຼືອເຊິ່ງກັນ ແລະ ກັນ ເພື່ອກຳຈັດປັດເປົ່າບັນຫາຄວາມແຕກແຍກລະຫວ່າງເຜົ່າ, ສາສະໜາ ໃຫ້ພ້ອມກັນມາສາມັກຄີກັນຕີຕ້ານທຸກປະກົດການທີ່ເກີດຂຶ້ນໃນສັງຄົມ ແລະ ພ້ອມກັນພັດທະນາໃຫ້ຕົນເອງ ແລະ ການຈັດຕັ້ງໃຫ້ມີຄວາມເຂັ້ມແຂງ, ເປັນແບບຢ່າງນຳໜ້າໃນການຜະລິດເປັນສິນຄ້າໃຫ້ກຸ້ມຕົນເອງ ເພື່ອສ້າງເສດຖະກິດພາຍໃນໃຫ້ມີຄວາມເຂັ້ມແຂງຂຶ້ນໄປເລື້ອຍໆ ເພື່ອແກ້ໄຂບັນຫາເສດຖະກິດ-ການເງິນທີ່ພວກເຮົາພວມປະເຊີນໄດ້ໂດຍໄວ.