ສູນກາງແນວລາວສ້າງຊາດ

Lao Front For National Development

ປາຖະກະຖາ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 63 ປີ

ໃນວັນທີ 20 ມີນາ 2018, ທີ່ສໍານັກງານສູນກາງແນວລາວສ້າງຊາດ (ສນຊ) ໄດ້ຈັດພິທີປາຖະກະຖາ ຫວນຄືນມູນເຊື້ອ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 63 ປີ (22/3/1955-22/3/2018) ໃນຫົວຂໍ້ “ບົດຮຽນວຽກງານກໍ່ສ້າງຮາກຖານການເມືອງ ຕິດພັນກັບການກໍ່ສ້າງພັກ-ພະນັກງານ”

ເປັນກຽດເຂົ້າຮ່ວມຂອງທ່ານ ນ ຄໍາຈັນ ພົມແສງສະຫວັນ, ຮອງປະທານ ສນຊ ໂດຍເປັນກຽດປາຖະກະຖາຂອງທ່ານ ບຸນໃຈ ບູ່ຕາວົງ ຫົວໜ້າກົມທ້ອງຖິ່ນຮາກຖານ ຫ້ອງວ່າການສູນກາງພັກ, ມີບັນດາທ່ານຮອງປະທານ ສນຊ, ກໍາມະການ ສນຊ ອ້ອມຂ້າງສູນກາງແນວລາວສ້າງຊາດ, ບັນດາຫົວໜ້າ-ຮອງຫົວໜ້າກົມ ຕະຫຼອດຮອດພະນັກງານ-ລັດຖະກອນ ສນຊ ເຂົ້າຮ່ວມ.

ໃນພິທີຄັ້ງນີ້ ທ່ານ ບຸນໃຈ ບູ່ຕາວົງ ໄດ້ຫວນຄືນມູນເຊື້ອການກໍາເນີດ ແລະ ການເຕີບໃຫຍ່ຂະຫຍາຍຕົວຂອງພັກປະຊາຊົນປະຕິວັດລາວ ຕະຫລອດໄລຍະເວລາ 63 ປີ ຜ່ານມາ ແລະ ຂະບວນການຕໍ່ສູ້ກູ້ຊາດຕ້ານພວກຈັກກະພັດລ່າເມືອງຂຶ້ນແບບເກົ່າ ແລະ ໃຫມ່ ພາຍໃຕ້ການຊີ້ນຳ-ນຳພາອັນສະຫຼາດສ່ອງໃສຂອງພັກເຮົາ ທີ່ສາມາດຍາດໄດ້ໄຊຊະນະເປັນກ້າວໆ ພັກເຮົາຍາມໃດກໍ່ຢຶດໝັ້ນລັດທິມາກ-ເລນິນ, ແນວຄິດປະທານໄກສອນ ພົມວິຫານ ເປັນພື້ນຖານແນວຄິດທິດສະດີຂອງພັກເປັນວຽກງານຍຸດທະສາດ, ເປັນວິທີການປະຕິບັດຕົວຈິງ, ເຮັດຢ່າງຕໍ່ເນື່ອງລຽນຕິດ ແລະ ໃນທີ່ສຸດ ມາຮອດວັນທີ 2 ທັນວາ 1975 ປະເທດຊາດໄດ້ຮັບການສະຖາປານາເປັນ ສາທາລະນະລັດ ປະຊາທິປະໄຕ ປະຊາຊົນລາວ. ຕໍ່ຈາກນັ້ນ, ພັກປະຊາຊົນປະຕິວັດລາວ ຍັງໄດ້ສືບຕໍ່ຊີ້ນຳ-ນຳພາ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ຈົນເຖິງທຸກວັນນີ້.


ພ້ອມກັນນີ້, ທ່ານຍັງໄດ້ຍົກໃຫ້ຮູ້ກ່ຽວກັບບາງເນື້ອໃນບົດຮຽນວຽກງານກໍ່ສ້າງຮາກຖານກາເນເມືອງເປັນຕົ້ນ: ວຽກງານກໍ່ສ້າງຮາກຖານການເມືອງແມ່ນຫຍັງ? ມີຄວາມສໍາຄັນແນວໃດ?; ວຽກງານດັ່ງກ່າວແມ່ນມູນເຊື້ອຂອງພັກເຮົາແຕ່ໃດມາ, ທັດສະນະຂອງພັກຕໍ່ວຽກງານກໍ່ສ້າງຮາກຖານການເມືອງ, ວິທີຈັດຕັ້ງປະຕິບັດ ແລະ ພຶດຕິກໍາຕົວຈິງ ຢູ່ປະເທດເຮົາ ແລະ ບັນດາປະເທດສັງຄົມນິຍົມ. ການເຮັດວຽກໃນຂົງເຂດການເມືອງຍິ່ງມີສໍາຄັນຫຼາຍ ໂດຍສະເພາະສະມາຊິກພັກ-ພະນັກງານ ຕ້ອງກໍາໃຫ້ໄດ້ 4 ເນື້ອໃນ, 4 ຄາດໝາຍ ແລະ 4 ທິດນໍາຂອງພັກ.

info@lfnd.org.la | 021 213754 | (856-21) 453191